Инсонлар ўртасидаги ишончсизлик

بِسْمِ اللهِ الرَّحْمٰنِ الرَّحِيم

Ишонч, аввало, унга лойиқ бўлган инсонга билдирилади. Лекин баъзида атрофингизга қараб ишончингизга лойиқ инсонни топа олмайсиз. Бундай ҳолат ҳақида ўйлаб кўрилса, савол туғилиши табиий, яъни шундай бўлишига сабаб нима? Келинг, шу масалага қисқача киришиб ўтсак-да, қолганлари тўғрисида фикрлашни ўзингизга қолдирсак.

Аввало, Исломдан ростгўйлик, омонатгўйлик, ваъдага вафо, садоқат тўғрисида кўплаб керакли нарсаларни ўрганишимиз мумкин. Лекин шундай бўлса-да, орамизда бу нарсалар камёб, нодир нарсаларга айланиб қолди. Шундай экан, бунинг сабабини билиб уни бартараф қилишимиз ва бугунги ҳолатимизни тузатишимиз керак. Бунинг сабаби нимада? Ҳар бир инсон бу саволга жавоб топишга интилса ва холис туриб баҳо берса, шу нарса аён бўладики, бу борадаги барча изланишлар ҳаётимизда Ислом йўқлигига бориб тақалади.

Исломни тушунмаслик оқибатида ҳаётда ундан узоқлашиш вужудга келди ва мусулмонлар жамиятига капиталистик тушунчалар сингдирилиб, Исломга хос бўлмаган сифатлар шаклланди. Шунинг учун жамият ҳаётига назар солинса, ака-ука, ота-ўғил ўртасида ҳам бир-бирларига ишончсизликни кўришимиз мумкин. Бошқа инсонлар билан муносабатларни эса, гапиришга ҳожат йўқ. Бузуқликлар авж олган жамиятда эру хотин ўртасидаги ишончсизлик оддий ҳолга айланди. Шу ўринда бир биродаримизнинг бир неча йиллар аввал айтган гапи ёдимга тушди. У биродар: “Эркак кишининг кўчага чиқиб зино қилмай уйига қайтиб келиши катта иш бўлиб қолди”, – деган эди. Хозирги кунда эса, бу борада аёлларга ҳам шундай таъриф берилса бўладиган ҳолатга келди. Бу гапларни айтишдан мақсад кимнидир бузуқликда айблаш эмас, бир-бирларининг ўрталарида ишонч катта аҳамият касб этадиган инсонларда ҳам ишончнинг йўқлигига эътибор қаратишдир.

Демак, жамиятдаги инсонлар орасида ишончнинг йўқолиб кетганлиги ҳам Исломсиз яшашнинг бир кўриниши экан. Бу ҳолатни, яъни ҳаётимизни ўзгартириш ҳар бир мусулмонга вожибдир. Бунинг учун бугунги ҳаётимизни тубдан ўзгартиришимиз, заррача ботил фикрларга йўл бермай фақат исломий тушунчалар билан ҳаётимизни шакллантиришимиз керак бўлади. Шундагина айтиб ўтилган ва бошқа иллатлардан қутуламиз, ин ша Аллоҳ!

Ҳизб ут-Таҳрирнинг Ўзбекистондаги медиа офиси. Абдуллоҳ

11.11.2019й