Ислом бошқаларнинг ғамига шерик бўла олишни ўргатди
Ислом бошқаларнинг ғамига шерик бўла олишни ўргатди
بِسْمِ اللهِ الرَّحْمٰنِ الرَّحِيم
وَيُؤْثِرُونَ عَلَى أَنفُسِهِمْ وَلَوْ كَانَ بِهِمْ خَصَاصَةٌ
– “Гарчи ўзларининг эҳтиёжлари бўлса ҳам (яъни ўзлари муҳтож бўла туриб) бошқаларга илинадилар”. (Хашр:9)
Фикрлаб кўринг, изланинг, ўзганинг манфаатини худди ўзиникидек ҳимоя қилишни фақат Исломда кўрасиз, ҳатто баъзи уламо, дея танилган инсонларнинг мақтаётгани демократия бу ҳақда ўйлаб ҳам кўрмаган, балки ўйлаш тушига ҳам кирмаган, десак тўғри бўлади.
Ўзинг яхши кўрган нарсани бошқага раво кўр, дея ўргатган динимиз кўплаб жиҳатларни қамраб олдики, бу жиҳатлар нафақат моддий, балки инсоннинг руҳий, ахлоқий, инсоний жиҳатларидан иборатдир. Мусулмоннинг шаънини шунчалик юксакликка кўтардики, Аллоҳнинг муқаддас байтидан ҳам юқорига қўйди. Бир мўминнинг сабабсиз ўлдирилиши Каъбатуллоҳнинг вайрон бўлишидан ёмонроқ эканлиги таъкидланди.
Ҳатто бир мўмин йўқлигида унинг шаънини ҳимоя қилиш иккинчи бир мўмин учун катта ажр ваъда қилинадиган амаллардан ҳисобланади. Ҳеч қайси эътиқод, на демократия ва на социализм инсон ҳақида бунчалик ўйлаб, қайғурган эмас. Аксинча, демократия ва социализм фақат моддий жиҳатнигина ўйлайди, холос.
Исломда мусулмон эркаклар ака-ука эканлиги, муслима аёллар опа-сингил эканликлари таъкидланган. Бу нарса мўминнинг қалбига чуқур ўрнашади ва оғир кунда албатта бир-бирларига ёрдамга шошилишади. Бошқа мўминнинг боласига ўз боласидек эътибор беради. Аждодларимиздан қолган бир болага етти маҳалла ота-онадир, деган мақоллар ҳам бежизга эмас.
Бу жиҳатларни ўйлаб кўрган инсон ҳаётимизга Ислом татбиқ қилинса, ҳаётимиз қанчалик ўзгариб кетишини тасаввур қилиши мумкин. Бироқ бу айтиб ўтилганлар Исломнинг кичик бир қисми холос. Ислом татбиқ қилинса, нафақат бу кичик қисм, балки ҳар бир соҳада буюк ўзгаришлар юз беражак.
Аслини олганда, Исломни бу жиҳатлар билан бошқа эътиқодлардан юксак эканлигини ёки шу жиҳатлар орқали Исломнинг тўғрилигини исбот қилишдан йироқмиз. Чунки юқорида айтиб ўтганимиздек, бу жиҳатлар Исломнинг бир жузъи, холос. Диннинг, тузумнинг тўғрилигини далилловчи ўз ўлчови бор. Яъни бу ўлчов ақидаси орқали текширишдир. Чунки ақида тузумларнинг пойдеворидир. Шунинг учун ақида текширилганда тўғрилиги маълум бўлса, ундан келиб чиққан шариат ёки тузум ҳам тўғри бўлади. Ислом ақидаси тўғри бўлган ва ундан келиб чиққан тузуми тўғри бўлган ягона мабдадир.
Ҳизб ут-Таҳрирнинг Ўзбекистондаги медиа офиси. Абдуллоҳ
04.04.2020й
