Бизнинг қувват манбаимиз Исломдир

بِسْمِ اللهِ الرَّحْمٰنِ الرَّحِيم

Бу ҳаётда жуда кўп нарсалар қувват манбаига муҳтож. Масалан, электрон соатларнинг қувват манбаи электр-энергияси. Батарейка билан ишлайдиган соатларнинг батарейкасидаги қувват тугаб қолса соат ҳам ишлашдан тўхтайди. Тўғридан-тўғри электр манбасига улаб ишлатиладиганларини ҳам электрдан узиб қўйсангиз улар ҳам ишлашдан тўхтайди. Ёки автомобилларнинг ёқилғиси тугаб қолса қаерда бўлишидан қатъий назар ишлашдан тўхтаб қолади. Катта ва кичик саноат мажмуалари ҳам энергия манбаларисиз фаолият кўрсата олмайди. Ҳарбий техникалар – танк, вертолёт, самолёт кабилар ҳам ёқилғисиз бир уюм металл бўлаги бўлишдан бошқасига ярамайди. Инсон доимий равишда овқатланиб, суюқлик ичиб юрмаса ҳаёти хавф остида қолади. Хуллас, қувват манбалари турли-туман бўлиб, улар бу ҳаётда жуда муҳим ўринга эга. Уларсиз жонли ва жонсиз нарсалар ўзларига юклатилган вазифани тўлақонли равишда амалга ошира олмайдилар. Бир сўз билан айтганда, улар ўз вазифасини бажаришда қувват манбаларига жуда муҳтождирлар.

Юқорида инсоннинг инсон сифатида муҳтож бўладиган қувват манбаини айтиб ўтдик. Энди Ислом Умматига Аллоҳ томонидан юклатилган вазифа – Исломни олий қилиш ва уни бутун дунёга етказишда мусулмонлар нимадан қувват олишлари керак, деган саволни ўртага ташлаймиз. Бу ўринда қувват деганда моддий қувват назарда тутилгани йўқ, балки руҳий ва маънавий қувват назарда тутиляпти. Бу маънода мусулмонлар учун Исломдан бошқа қувват манбаи йўқ. Айнан Ислом биз учун ягона қувват манбаи бўлиши лозим. Биз ўз вазифамизни бажаришда Исломнинг битмас-туганмас қувватидан фойдаланишимиз зарур.

Тарихга қисқача назар солсак, Ислом келишидан олдин араблар тубан ва тарқоқ қавм эди. Улар фикрий ва моддий жиҳатдан ўта заиф ҳамда дунё халқлари орасида энг қуйи даражада эдилар, ҳеч ким улар билан ҳисоблашмасди ҳам. Ислом ақидасини қабул қилганларидан сўнг улар фикрий юксалишга эришдилар, Мадинада илк Ислом Давлатини ўрнатдилар, бу эса уларни битта Ислом Уммати вужудига айлантирди. Лекин моддий куч-қувват жиҳатидан аҳволлари ўша-ўша эди. Бироқ бу Форс ва Рум империяларини тиз чўктиришларига монелик қилмади. Моддий ва ҳарбий жиҳатдан бу империялардан бир неча баробар заифроқ бўлгани ҳолида уларга қарши туриш, нафақат қарши туриш, балки уларга ҳужум қилиш ташқаридан қараганда ақл бовар қилмайдиган ишдек туюлиши табиий ҳол. Аммо Ислом Уммати бу вазифани қисқа муддатда уддалади. Бунинг натижасида Ислом Араб яриморолидан ташқарига чиқиб, бутун дунёга ёйила бошлади. Кеча заиф бўлган араблар бугун азиз ва қудратли халққа айланди. Ва Исломга кирган бошқа халқлар ҳам Ислом Уммати вужудининг ажралмас қисмига айланиб, аввалги хорликларидан азизликка чиқдилар. Ислом Уммати ўзи эътиқод қилаётган Исломга маҳкам ёпишиб, ундан қувват олган пайтда мана шундай буюклик ва куч-қудратга эга бўлди. Унинг душманлари ҳар қанча ҳаракат қилмасинлар доимо мағлубият аламини тотдилар.

Афсуски, бугунга келиб Ислом Уммати яна заиф ва қолоқ аҳволга тушиб қолди. Бу аҳволга Исломдан узоқлашиш ва унинг қувватидан узилиб қолиш сабаб бўлганини ҳар бир онгли мусулмон яхши тушунади. Исломнинг туганмас қувватидан узилиб қолган Ислом Уммати ўзига Аллоҳ томонидан юклатилган вазифани уддалай олмаслиги табиий ҳолдир. Аллоҳ бизга оғир вазифа юклагани баробарида бу вазифани бажаришимиз учун тенги йўқ қувват манбаини – Исломни ҳам бериб қўйди. Шу қувват манбаидан куч олишни бошламас эканмиз, худди ёқилғиси тугаган техникадек ҳеч нарсага яроқсиз аҳволда қолаверамиз.

Ҳизб ут-Таҳрирнинг Ўзбекистондаги медиа офиси. Фаррух

08.07.2019й