Кийимларингизни ёқиб юбордим ака!
“Зиндон хотиралари” туркумидан
Кийимларингизни ёқиб юбордим ака!
بسم الله الرحمن الرحيمُ
Барча “террористлар”ни бир ойда қўлга олишни Каримовга вазир (Зокир Алматов) нинг ўзи ваъда берган ўша 99 йиллар…
Оммавий қамашлар бошланди. Заррача дин ғами бўлган мусулмон оилаларга ўша йиллар ғам йиллари бўлди. Бирор жиноий гуруҳдан деб гумон қилган кишини қийноқлар чиғириғидан ўтказиб, унинг тушига ҳам кирмаган жиноятларни бўйнига юклаб ўрганган расво тузум фикрий ва сиёсий ҳизб аъзоларини аниқлашда бу услубни қўллаш ортидан қанчадан-қанча иймон аҳлини кўз кўриб, қулоқ эшитмаган зулмларга дучор қилди. Ҳизбийлардан бирини қамаб қийноққа солса, бас, қолганлари илашиб келаверади, деган хомхаёл билан ишга киришган ИИВ ва МХХ ўзаро “мусобақа”ни бошлади.
Отангни шоҳ ўлдирса, дардингни кимга айтасан, деганларидек бечора халқ ўз дардини кимга айтишни билолмай қолди. Ҳар шаҳар, туман, қишлоқдан бир неча ҳизбийни ёки бошқа Исломий гуруҳнинг бирор вакилини топишса, зулм “тегирмони”га ташлаб, тирноқларини суғуриб, оёқларидан осиб, соатлаб калтаклаб ёки кўзи олдида хотинини яланғочлаш каби жирканч услублар ҳар иккала қаттол, репрессив аппарат (МХХ ва ИИВ) да авж ола бошлади.
Менинг хонадонимга ҳам 1999 йилнинг 24 мартида ярим тунда бир гала олабўжилар бостириб кириб, тинтув ўтказишди. Уйимдаги тезкор тинтув натижасида битта граната, портловчи пакет, ўқ-дорилар ва бир неча адабиётларни “топиб” олишди ва “гувоҳлар” ёрдамида тасдиқлаб, мени олиб кетишди. Ажабланарлиси, холис бир адвокат ишни пухта кузатиб, хонадонимдан “топилган” граната ва пакет, ўқлардаги номерлардан бу қуроллар бир неча биродарларнинг уйларидан чиққанлигини исботлаб, бу қуролларни атайлаб ходимлар тарафидан ташлаб қўйилганлигини исботлагач, негадир йўқ бўлиб қолди. Биз кабиларни ҳимоя қилишга кучли адвокатлар ҳам қодир бўлолмай қолди. Зеро, бу қаттолларнинг бунақа аҳмоқликлари устида кофир, яҳудий, золим шоҳнинг ўзи турарди. МХХ терговчилари:
– Менга қара, кимсан, кимнинг ҳалқасида дарс олгансан, кимларга дарс бергансан, шуларни айтгинда уйингга кет, деганида:
– Айтмасам-чи, дея жавоб кутгандим, жавоб ўрнига икки МХХ қаттоллари тепкилай кетди. Шохли калта дубинка ва оддий дубинка билан турли жойларимни пала-партиш савалаб, кейин товоним тагига беаёв уришди. Қайта саволига ҳам ўша жавобни олишгач, янада қутуришди…
Кўзимни очганимда яланғоч эдим. Камерада кимдир сув сепди ва чанқоғим қонгунча сув берди. Камерадаги аристон устимга чопон ёпиб “бироз дам олинг” деди. Кийимларимни сўрагандим, яхшигина кийимларни бериб “сизникини дежур бермади, манавиларни ҳам ўша дежур мелиса олиб келиб берди” деди. Эшик очилиб ўша дежур кирди. Ва:
– Ака кийимларни ҳаммомдан чиқиб киясиз. Агар қийин бўлмаса бир ювиниб чиқинг, анави онангни …лар ИВС(вақтинчалик тергов хибсхонаси)дан чиқиб кетди, деди.
– Ўзимнинг уст-бошларим қани? — десам, яна ҳам болахонали қилиб анави қаттолларни сўкиб:
– Қўяверинг ака, мен кийимларингизни ёқиб юбордим, дегач, тушундим, золимлар ҳушимни йўқотган пайтимда кийимларимни ёқиб юборишга мажбур бўладиган жирканч ишни қилишган экан. (Ўшаларга Аллоҳнинг лаънати бўлсин!) Навбатчининг ортидан ювинишга чиқарканман, мендан аллақандай бадбўй ҳид келгандай бўлди.
وَسَيَعْلَمُ الَّذِينَ ظَلَمُوا أَيَّ مُنقَلَبٍ يَنقَلِبُونَ
– “Золим кимсалар яқинида қандай оқибатга қараб кетаётганларини билиб қолурлар”. (Шуъаро:227)
(Кийимларимни ёқиб юборган ўша пенсионер ходим билан 21 йилдан кейин фавқулотда учрашиб қолиб эслаганимиз – ўша хотиралардан)
Ҳизб ут-Таҳрирнинг Ўзбекистондаги матбуот бўлими аъзоси Зайниддин
18.04.2022й
