“Зиндон хотиралари” туркумидан

Вой, нимага у қамоқдамас?!

بسم الله الرحمن الرحيم

Бугун бир биродаримнинг хонадонини зиёрат қилдим. Ўзи ҳали ҳам зонада. У билан сўнгги уч йилликда Қашқадарёнинг Косон шаҳрида жойлашган 51-сонли қамоғида бирга бўлгандим. Акамизга берган ваъдам туфайли ўша мазлумлар оиласини зиёратига набирам билан бирга бордим. Мазлумлар оиласи деганимнинг сабаби, бу хонадонда қамалмаган икки гўдак қолган эди, холос. Ота, она, ўғил-қизлари ва куёвларидан ташқари, биродаримнинг сингиллари, укаси, тоғаси ва унинг ўғиллари ҳам золим яҳудий зиндонида ўта даҳшатли изтиробу азобларни бошидан кечирган кишилар эди. Буни қарангки, ўғли ҳали вояга етмай туриб қамалган бўлса, қизи 18 ёшга эндигина кирганда қамоққа ташланиб, она-бола биргаликда зона машаққатларини бошларидан ўтказгандилар… Энг ҳайратланарлиси, бу мазлум оиланинг каттадан кичиги қишлоқ аҳли наздида ахлоқда ўрнак саналган кишилар эди. Тиббиёт ва педагогика институтларини тамомлаб, ўз соҳасида таниқли мутахассис бўлиб етишган зиёли оила эдилар.

Биродаримнинг мўъжазгина, хафсала билан супурилган ҳовлисига кичик ўғлининг етовида кирарканман, мени таниган онахон, қамоқдан чиққан қизлари ва бошқа ҳижобли аёллар (эҳтимол зонадан бирин-кетин чиққан сингиллари бўлса керак) дадаларининг қадрдони эканлигим эътибориданми ёки ўта соғинган дадаларининг хабарига интиқликлари сабабми, ихлос ва самимият билан кутиб олдилар. Ва чорпояга ўтиргач дуога қўл очилди. Тилимдан чиққан ҳар жумлага титроқ овоз ила омин дер эканлар кўзлари ёшга тўлди. Шундан кейин қизларим билан зиндонда тақдирдош бўлган қизлари дадалари ҳақида сўрадилар. Ва бу мазлумлар хонадонида шундай ноёб суҳбат тикландики, уни бунда сиз ўқувчиларга сўзлагим келса-да, баъзи эҳтимоллар сабабли ўзимни тиймоқни маъқул кўрдим. Бунинг учун сиз азизлардан узр сўрайман.

Аммо эътиборингизни набирам ва ўша биродаримнинг беғубор набираси ўртасидаги қисқа суҳбатга қаратишни ўринли деб топдим. Қўғирчоқдек жажжигина қизалоқ менинг набирамдан сўраб қолди:

– Бу тоға ким?

Набирам менга мулойимгина қараб олди-да, “оподадам” дея жавоб берди. Шунда, биродаримнинг набираси кўзларини катта очиб менга обдон қараб олди-да:

– Вой, нега у қамоқдамас? – деб қайта таажжубланди.

Бу жажжилар суҳбати барчамизни бир зум аламли табассумга қолдириб, кўзларимизни яна ёшга тўлдирди… Бу каби юзлаб мазлумлар хонадонидаги гўдаклар дадаларини, боболарини қамоқда таниганлиги боис барча намозхон оиланинг эркаклари албатта қамоқда бўлишлари керак, деб болаларча фикрлаб қолгандилар.

Биродарим хонадонидан чиқарканман сиз азиз ҳалққа:

Эй азизликка ҳақли биродарларим! Чорак асрдан буён зиндонларда қолаётган ўзингиз таниган, орангиздан қўллари МХХ ходимлари томонидан кишанланиб, олиб кетилганлар хусусида бу ҳукумат нима деб сизга туҳматлар тўқиди?! Ахир, кечагина яхшиларингиз бўлганларни бу золимлар “халқ душмани”, “ватан хоини”, “экстремист”, “террорист” деса, “ҳа, шундай экан-да” деб қолаверасизми?! Яқин ўтмишда боболаримиз орасидаги зиёли қатламни худди шу каби атамалар билан олиб кетиб, сургун қилган, қирғинбарот этган кофирлар тузумини унутдингизми?! Қолаверса, бу инсонларнинг бор-йўқ “айблари” мусулмонча яшайлик, миллатлар ўртасига кофир чизиб қўйган сунъий чегаралардан озод бўлиб, барча мусулмонлар қуда-анда бўлиб, Шариат асосида яшаб, Аллоҳ Таоло ҳузурига ёруғ юз ила борайлик, деганлари эди, холос. Бу олий ғояни ва Исломнинг тузум сифатида ҳаётга қайтиши лозимлигини танитиб келаётган Ҳизб ут-Таҳрир фикрлари ҳақида анави ҳаққингизга ҳар куни хиёнат қилувчи ҳукумат вакиллари ва уларнинг сўзларига “шаръий тўн” кийдириб, бежаб бераётганлар нағмасини текшириб кўришга бугун имконингиз бор-ку, йигирма беш йилдан бери зиндонда сақланаётганлар хақида 25 дақиқа фикрласангиз бўлади-ку,  дея хайқириб, роса дод солгим келади-ю, аммо аксар эркаклари қувғинда, қамоқда, ўрис кўчаларида супурги кўтариб тирикчилик дардида овора-ю сарсон эканини эслаб ўзимни босаман. Юртда қолганларнинг аксарлари гўдаклар ва қариялардир. Анави навқирон ёшлар орасидаги артистлар, маддоҳ қўшиқчилар, масхарабозлар, мелиса ва ДХХ, ИИБ ходимлари, депутатлар, хокимлару уларнинг тўда-тўда фаросатсиз тарафкашларига дардингизни сўзламоқ, А. Қодирий таъбири билан айтганда, мозористонда хитоб қилинган “ҳайяалалфалаҳ” каби мантиқсизлик бўлур эди. Шундай бўлса-да, бу унсиз нидога лаббай дейувчилар топилиб қолар, деган илинжда шу сатрларни қоғозга туширдим.

يَا قَوْمَنَا أَجِيبُوا دَاعِيَ اللَّهِ وَآمِنُوا بِهِ يَغْفِرْ لَكُم مِّن ذُنُوبِكُمْ وَيُجِرْكُم مِّنْ عَذَابٍ أَلِيمٍ

– “Эй қавмимиз, Аллоҳга даъват қилгувчи (нинг даъвати)ни қабул қилинглар ва унга иймон келтиринглар, (шунда Аллоҳ) сизларнинг гуноҳларингизни мағфират қилур ва сизларга аламли азобдан паноҳ берур”.                 (Аҳқоф:31)

(Зиндон аҳллари ҳақида сўраладиган Кундан қўрқиб айтилган  шу куннинг оғриқларидан)

Ҳизб ут-Таҳрирнинг Ўзбекистондаги матбуот бўлими аъзоси Зайниддин

16.08.2022й