Ҳафталик муҳим воқеалар таҳлили
Ҳафталик муҳим воқеалар таҳлили
بسم الله الرحمن الرحيم
﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾
“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”
Хабар (kun.uz 27.06.2023й): 27 июнь куни Ўзбекистон Президентининг Фармони билан икки нафар марҳум шайхлар Муҳаммад Содиқ Муҳаммад Юсуф ва Зиёвуддинхон ибн Эшон Бобохон “Олий даражали Имом Бухорий” ордени билан мукофотланди.
Изоҳ: Олимларни эъзозлаш халқимизнинг урф-одатига айланиб, қон-қонига сингиб кетган яхши ишлардан. Ш. Мирзиёевнинг ҳам давлат раҳбари сифатида марҳум олимларни хотирлагани таҳсинга лойиқ иш. Лекин бу ўринда мантиқий бир савол туғилади: нега бу икки олим (Аллоҳ уларни раҳмат қилсин) хотирланяпти-ю, КГБ айғоқчилари таъқиблари остида шаҳид кетган Раҳматуллоҳ аллома, 1995 йил август ойида Тошкент аэропортида сирли равишда ғойиб бўлган Абдували қори ва яна улар каби Каримов қатағонига учраган ўнлаб уламолар умуман тилга олинмаяпти?! Уларни хотирлаш у ёқда турсин, уларнинг маърузаларига ҳануз экстремистик таълимот сифатида қараб, ҳатто эшитиш ва тарқатиш жиноят ҳисобланяпти?! Ўзбек ҳукумати қачон ўзининг Раббоний уламолари – улар хоҳ ҳаёт бўлсин, хоҳ дунёдан ўтган бўлсин – қадрига етади ва уларнинг илми, илмий меросларидан истифода қилишдан халқни маҳрум қилаётган турли хил тўсиқларни олиб ташлайди?! Қолаверса, юзлаб даъватчи олим йигитларимиз чорак асрдан буён зиндонларда қолиб кетяпти, ҳатто улардан айримлари шаҳид бўлиб чиқяпти. Ёки бир онахон Қуръондан таълим бергани, талаба йигит нашида тарқатгани учун жазога тортиляпти, қамаляпти! Шунингдек, уйғурлар устидан геноцид ўтказаётган кофир, золим Хитой ва ота-боболаримиз қонини дарёдай оқизган ўрис билан муносабатлар дўстона давом этяпти. Буларнинг бари ҳамон кўз ўнгимизда содир бўлаётган бир пайтда, Мирзиёевнинг икки марҳум шайхни эслаб қолишидаги “ҳикмат”ни қайси маънода англаш мумкин?! Бу сайлов олди “очко олиш” кампаниясининг бир кўриниши эмасмикин ёки бўстонга ўт қўйиб, ортидан суғориш учун сув қуйишга ўхшамаяптими?!
Хабар (sputniknews.uz 27.06.2023й): Таъкидланишича, 2023 йил 1 июль санасидан Тошкент шаҳридаги тиббиёт муассасаларида давлат тиббий суғуртаси тизими механизмларини жорий этиш белгиланган. ССВ хабарига кўра, сўнгги кунларда давлат тиббий суғуртаси механизмларининг моҳияти тўлиқ англаб етилмасдан жамоатчилик орасида "энди оилавий поликлиника хизматлари пулли бўлар экан" деган нотўғри тушунча пайдо бўлмоқда.
Изоҳ: Албатта, одамларнинг ушбу тизим ишга тушиши ортидан келадиган хавфлар борасидаги хавотирлари ўринли. ССВнинг ушбу тарқалаётган “миш-миш”ларга қарши берган раддияси буни тасдиқлаб турибди. Унда айтилишича, фуқароларга давлат томонидан кафолатли бепул тиббий хизмат кўрсатилиши учун улар поликлиникаларда рўйхатдан ўтишлари керак бўлади. Демакки, рўйхатдан ўтмаганлар бепул тиббий хизмат ололмайдилар. Шу ўринда ССВ бепул тиббий хизмат деганда, нимани назарда тутгани тушунарсиз эканлигини таъкидлаш керак. Ахир одамлар ҳар қандай даволаниш ёки ҳатто жуда енгил операциялар учун ҳам ёнларидан пул тўлашади-ку! Юртимиз аксар аҳолисининг турмуш даражаси шунчалар пастладики, оддий касалликка чалинсалар ҳам, пул кетади деб даволанмай қўя қолишяпти. Оғирроқ касалликка чалинганлар эса, даволанишга ўзларининг қурби етмагани учун ноилож минг хил истиҳола билан, турли медиалар орқали халққа мурожаат қилиб ёрдам сўрашгача боришяпти. Буларнинг барчасига ва йиғлаб-зорланиб қилинаётган бундай мурожаатларга ҳукумат эътибор қаратмаяпти. Бироқ бу қийинчиликлар ҳали бошланиши холос. Негаки, янги жорий қилинаётган “суғурта тизими” Ғарб давлатлари тиббиёт тизимидан кўчириб олинган. Ҳозирча ҳукумат буни бепул демоқда, чунки муҳими — ҳозир тизимни ишга тушириб олиш зарур. Кейинчалик бу босқичма босқич пулли бўлиб боради ва охир-оқибат “ғарбча тизим” тўлиғича жорий қилинади. Асосийси шуки, агар тиббий суғурта алоҳида шартнома шаклида бўлса, у шаръан ножоиз битим ҳисобланади. Юртимиз аҳлига айтамизки, ҳақиқий маънодаги бепул тиббий хизмат – у хоҳ енгил, хоҳ оғир касалликлар борасида бўлсин – фақат Ислом тузуми татбиқ қилинсагина жорий қилинади. Чунки одамлар соғлигини сақлаш – инсоннинг асосий эҳтиёжларидан бири бўлганлиги сабабли Давлат зиммасида бўлади.
Хабар (kun.uz 29.06.2023й): Ижтимоий тармоқларда тарқалган видеоларда Turon World Cooperation xususiy bandlik agentligi МЧЖ томонидан Германияга ишга юборилган йигитлар айни пайтда Мюнҳэндаги темирйўл вокзалида қолишаётгани кўринади. МЧЖ вакиллари эса қаергадир ғойиб бўлгани айтилмоқда.
Изоҳ: Ушбу ачинарли ҳолатдан ҳукумат гўё ижтимоий тармоқларда тарқалган видеолардан сўнггина “хабар топди” ва муносабат билдиришга мажбур бўлди. Бироқ ижтимоий тармоқдаги манбалар Мюнҳендаги темирйўл вокзалида 300 га яқин ўзбекистонликлар бир неча кундан бери тунашаётгани айтилган бўлса, ҳукуматнинг бир расмий идораси баёнотида уларнинг 102 нафар эканлиги, бошқаси эса 98 нафар эканлигини айтди. Бу расмий идоралар ёрдамга муҳтож мигрантлар сонини қасддан камайтириб кўрсатганлиги ҳақида шубҳалар пайдо қилади. Борди-ю ўша сарсон бўлаётганлар сони 300 та эмас, 98 та ёки 48 та бўлса, уларни эътиборсиз, ҳимоясиз ташлаб қўйса бўлаверармиди? Иккинчидан, ҳукумат мамлакат ичкарисида аҳолини иш билан таъминлаб, яшаш шароитларини таъминлаб беролмаётган экан, ҳеч бўлмаса уларнинг ўша бегона юртларга соғ-омон етиб бориб, ҳақ-ҳуқуқлари ҳимояланган ҳолда бехавотир ишлаб келишларини кафолатламайдими? Ёки ҳукуматнинг иши омма-халқ мулкини мустамлакачилар ва уларга ҳамтовоқ бир ҳовуч амалдор монополистлар қўлига “эплаб” топширишми? Ҳақиқатда, ҳукумат оддий халқ қатламини ўша кўйларга солаётган улкан порахўрлик-ҳаромхўрликнинг олдини ололмаяпти. Ваҳоланки, хавфсизлик идоралари бундан бир неча йил аввал ёшларнинг нашида эшитганини ёки ёши кекса бир аёлнинг қайсидир диний маърузага “класс” босганини… қидириб юриб топишди. Лекин ажибки, бурнининг тагида уюштирилаётган фирибгарликлардан “бехабар” қолди. Бу – ҳукуматнинг халқни рози қилиш учун қайғураётгани ҳақидаги баландпарвоз даъволари таги пуч эканидан далолатдир. Қолаверса, йигитларни алдаб, аро йўлда ташлаб кетган МЧЖ масъулларидан уларга етказилган зарарни ундириб бериш чораларини кўраётгани ҳақида ҳам ҳозиргача ҳеч қандай маълумот чиқмади. Аслида, бу бечора йигитларнинг сарсоналикда арзимаган ҳақ эвазига ҳар қандай қора ишларни қилишга ҳам рози бўлиб четга ишлагани кетаётганларига ҳукумат ва у татбиқ қилаётган капиталистик тузум айбдор. Халқимиз учун балоларнинг боши ана шу тузум эканлигини идрок қилиш ва уни илдизи билан қўпориб ташлаш учун ҳаракат қилиш бугуннинг энг долзарб масаласидир.
Хабар (lex.uz 30.06.2023й): 2023 йил 1 июлдан бошлаб кўпикланадиган ва табиий вино маҳсулотлари акциз маркалари билан маркаланмайди.
Изоҳ: Ҳукумат спиртли ичимликлардан келадиган даромадни кўпайтириш мақсадида ишлаб чиқарувчилар ва уларга керак бўладиган қатор техник-технологик импорт маҳсулотларига имтиёзлар бериб келяпти. Юқорида келтирилган имтиёз ҳам шулар жумласидан. Бундан аввал, 2022 йилнинг 1 январидан бошлаб кўпикланадиган ва табиий винонинг 1 далига (ўлчов бирлиги) акциз солиғи 1 сўм этиб белгиланган. 2020 йилнинг 1 августидан эса, шу турдаги ичимликларни телевидение ва бошқа жойларда реклама қилишга рухсат берилганди. 2020 йилда президент фармони ва қарорига асосан “Ўзбекистон Республикаси Алкоголь ва тамаки бозорини тартибга солиш ҳамда виночиликни ривожлантириш агентлиги” ташкил қилинган эди. Ҳукумат ушбу агентлик орқали алкоголли ичимликларнинг ишлаб чиқарилиши ва савдосини бошқаряпти, назорат қиляпти ва ривожлантиряпти. Бу билан у халқимиз, айниқса ёшларимизни ичкиликка ружу қўйишга ўргатиб, ақлан ва жисмонан соғлом авлод бўлишларига зимнан болта уряпти. Бир тарафдан спиртли ичимликларга рухсат бериб, бошқа тарафдан уларнинг зарари ҳақида огоҳлантириб қўйишда ҳеч қандай мантиқ йўқ. Ҳар бир иймонли шахсга сир эмаски, спиртли ичимликларни ишлаб чиқариш, сотиш, сотиб олиш, олиб келиб бериш, ҳатто қуйиб беришни ҳам Аллоҳ ҳаром қилган, Росулуллоҳ ﷺ лаънатлаганлар. Бундан ташқари, ҳадисларда ароқни “уммул-хобаис”, яъни хабис(ифлос-кир иш)ларнинг онаси, дейилади. Демак, ҳукумат бу очиқ мункар иш ривожига қонуний имтиёзлар бериш билан жамиятда турли жиноятларнинг урчишига кенг йўл очяпти. Ҳа, реал воқелик, гарчи аччиқ бўлса-да, бундан ўзгача эмас. Зеро, бугун татбиқ қилинаётган бу демократик тузум ва режимлардан бундан бошқасини кутиш нодонликдир.
Ҳизб ут-Таҳрир Ўзбекистон матбуот бўлими аъзоси Форуқ
03.07.2023й
