Ҳафталик муҳим воқеалар таҳлили
Ҳафталик муҳим воқеалар таҳлили
بسم الله الرحمن الرحيم
﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾
“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”
Хабар (қалампир.уз 17.04.2023й): Ижтимоий тармоқларда Тошкент шаҳридаги автобус салонининг ички қисмида аёллар ва эркаклар учун алоҳида жой ажратилганига ишора қилувчи эълон акс этган суратлар тарқалди. Эълонда аёл ёки эркалар ўзларига тегишли бўлмаган жойда турмаслиги ҳамда ўтирмаслиги айтилган. Ҳолат юзасидан “Тошшаҳартрансхизмат” Акциядорлик жамияти расмий муносабат билдирди. Унга кўра, мазкур ҳолат 8-Автобус саройи филиали тассаруфидаги 43-сонли Isuzu русумли автобус йўналишида юз берган. Бу бўйича тезкор тадбир ўтказилиб, автобус салонидаги мазкур эълон тезкорлик билан олиб ташланган.
Изоҳ: Ўзбекистон аҳолисининг аксар қисми мусулмонлар эканлигига қарамай, халқ эътиқоди умуман эътиборга олинмайди. Ушбу ҳолатда ҳам қайсидир кофир рус блогер танқидига жуда тезкорлик билан реакция билдирилган. Кўринишидан жамоат транспорти ҳайдовчисининг шахсий ташаббуси бўлган аёллар ва эркакларнинг бир-бирига аралашмаган ҳолда туришлари ва ўтиришлари ҳақидаги эълони Исломий маданиятга хосдир. Қолаверса, қонуний жиҳатдан бунга ҳеч қандай жазо белгиланмаган ҳамда бу ишдан шахс ва жамиятга ҳеч қандай зарар йўқ. Аксинча, аёл ва эркакларнинг жамиятда бир-бири билан беҳуда аралашуви ортидан жамият бузуқликларга тўлиб-тошган. Бу борада юртимиздаги жамоатчилик фаоллари ҳам жамоавий транспортда аёллар ва эркакларни алоҳида қилиш ҳақида таклифлар билдирган эди. Бироқ ҳукумат тарафидан бунга ҳеч қандай эътибор берилмади, аксинча биргина кофир руснинг бир оғиз танқидига тезкорлик билан жавоб берди. Шунинг учун ҳам ҳукумат даъво қилаётган демократияси қуруқ сафсатадан иборат бўлган иккиюзламачи тузумдир.
Хабар (stat.uz 19.04.2023й): Ўзбекистонлик фуқаролар сўнги уч ой давомида рекорд даражада бойиган… Ўзбекистон аҳолисининг реал даромадлари 2023 йилнинг январь-март ойларида ўтган йилга нисбатан 4,9 фоизга ошган. Яъни 2022 йилнинг биринчи чорагида 5,9% ўсиш қайд этилган бўлса, шу йилнинг мос даврида 10,8% ўсиш кузатилган. Бу эса мазкур даврдаги рекорд даражадаги ўсиш ҳисобланади.
Изоҳ: Ушбу ҳисоботни эълон қилган статистика агентлигининг бошқа ҳисоботлари таҳлили асосида эълон қилинган кун.уз сайти мақоласида жумладан шундай дейилади: “2023 йилнинг март ойида истеъмол секторидаги товарлар ва хизматлар ўртача 1 фоизга қимматлашиб, йиллик инфляция даражаси 11,7 фоизга етди. Озиқ-овқат маҳсулотлари секторидаги инфляция эса 14,6 фоизни ташкил қилмоқда. Жумладан, охирги 1 йилда Ўзбекистонда гуруч нархи 35,7 фоизга, буғдой уни 35,1 фоизга, тухум 32,5 фоизга, шакар 31,1 фоизга, суякли мол гўшти 11 фоизга, кунгабоқар ёғи 2,7 фоизга қимматлашган”. Агар ҳақиқатдан ҳам аҳоли даромади фақат қоғозда эмас, реал воқеликда ошган бўлган тақдирда ҳам уни нархлар билан солиштирганда йўқ бўлиб кетади. Соддароқ қилиб айтганда, инфляция ошган даромадларни “еб юборади”. Бундан ташқари, пулнинг қадрсизланиши ҳам даромадларнинг “ошишига” сабаб бўлиши мумкин. Бундай ҳолатда ҳеч қандай ижобий ўзгариш бўлмайди, чунки бу билан пулнинг харид қобилияти ошиб қолмайди. Қоғозда ҳар қанча ошириб кўрсатилмасин ҳозиргидек ғайриисломий иқтисодий тузумда одамларнинг яшаш даражаси ўта пастлигича қолаверади.
Хабар (president.uz 20.04.2023й): Ўзбекистон Республикаси Президенти Шавкат Мирзиёевнинг Европада хавфсизлик ва ҳамкорлик ташкилоти Демократик институтлар ва инсон ҳуқуқлари бўйича бюроси (ЕХҲТ ДИИҲБ) миссияси раҳбари Альберт Йонссон билан 20 апрель куни бўлиб ўтган учрашувида Ўзбекистон Республикаси Конституциясига ўзгартиришлар киритиш бўйича референдумга тайёргарлик кўриш ва уни ўтказиш масалалари кўриб чиқилди.
Изоҳ: ЕХҲТ ДИИҲБнинг 30 апрелда ўтказилиши кутилаётган референдумни кузатиш миссияси Ўзбекистонга 28 март куни келган эди. Унинг вазифаси референдумга тайёргарлик кўриш ва уни ўтказишга доир барча тадбирларни кузатиб боришдир. Ҳукумат ва айниқса Мирзиёев учун бу ташкилотнинг ижобий хулосаси жуда муҳим. Чунки конституциявий ўзгартиришларга ҳаракатлар бошланганидан бери турли халқаро ташкилотлар ва Ғарб давлатлари бу жараёнларни кузатиб боришяпти. Бу ишда ўзбек ҳукумати хато ва камчиликларга йўл қўядиган бўлса, бу ўзига қарши босим сифатида ишлатилиши мумкин. Ҳукумат хатога йўл қўймаслик учун ҳамма ишни демократик қонун-қоидаларга тўлиқ амал қилган ҳолда ўтказишга қаттиқ уриняпти ва буни анави ташкилотларга намойиш қиляпти. Зеро, Мирзиёев учун референдум ҳаёт-мамот масаласи бўлгани туфайли уни муваффақиятли ўтказиш ва Ғарбни рози қилишга жиддий эътибор беряпти. Ғарбнинг розилиги бу ҳукумат учун жуда муҳим, ҳатто мусулмон халққа демократиядек заҳри қотил тузумни тиқиштиришга тўғри келса ҳам, ҳатто бу билан Аллоҳга қарши уруш очишдек оғир мункар ишга қўл уришга тўғри келса ҳам.
Хабар (Фарғона ИИБ 21.04.2023й): ИИБ ТЭҚКБ ходимлари томонидан тезкор тадбир ўтказилган. Тадбир давомида, Фарғона тумани Миндон маҳалла ҳудудида М.Ф. исмли аёл 2023 йилнинг февраль ойидан буён 9 нафар аёлга ноқонуний диний таълим бериб келаётгани аниқланган. Ҳолат юзасидан Ўзбекистон Республикаси Маъмурий жавобгарлик тўғрисидаги кодекснинг 241-моддаси билан ҳужжатлар расмийлаштирилиб, М.Ф. исмли аёлга нисбатан Жиноят ишлари бўйича Фарғона шаҳар суди томонидан жарима жазоси тайинланган.
Изоҳ: Ҳукумат мусулмонларни ўз динини ўрганишдан мосуво қилгани ҳолда Ғарбнинг бузуқлик ва куфрга тўла бўлган таълим дастурларини мактаб дарсликларига киргизишда бош-қош бўляпти, тил ўргатиш бўйича лойиҳаларини бемалол амалга оширишларига шароит яратиб беряпти. Қисқача айтганда, Исломий сақофатни таъқиқлаб, Ғарб сақофатини кенг ёйяпти. Ҳукумат динни монополия қилиб олиб, уни ўз сиёсатига хизмат қиладиган диний идора орқали назорат қилиб келяпти. Кимдир ушбу диний идорадан берухсат таълим берадиган бўлса, уни жиноятчига чиқариб жазога тортяпти. Ва бу ҳақда матбуотда ваҳимали хабарлар тарқатиб халқни қўрқитишга уриняпти. Назоратнинг ўта даражада қаттиқ эканлиги ҳукумат мусулмонларнинг ўз Исломига интилишидан қанчалик қўрқишини англатади. Чунки бундай интилиш охир-оқибат Исломий бошқарувни талаб қилишга олиб бориши тайиндир.
Ҳизб ут-Таҳрирнинг Ўзбекистондаги матбуот бўлими аъзоси Форуқ
25.04.2023й
