Ҳафталик муҳим воқеалар таҳлили
Ҳафталик муҳим воқеалар таҳлили
بسم الله الرحمن الرحيم
Хабар (ИИББ 03.03.2023й): Тошкент шаҳар Ички ишлар бош бошқармаси (ИИББ) япон комиксларидан бирининг қаҳрамонларидан илҳомланган “Рёдан” халқаро ёшлар ҳаракати ҳақида ота-оналарни огоҳлантирди. Идора бу ҳаракатнинг мухлислари юртимизда ҳам борлиги ҳақида хабарлар олган.
Изоҳ: “Рёдан” ҳаракати япон анимация мухлислари бўлиб, ўсмирларни қизиқишлари бўйича бирлаштирган. Ушбу ҳаракатнинг Россия, Украина, Беларус ва бошқа давлатларда оммавий тартибсизликлар уюштиргани маълум қилинганди. Ҳукумат Ислом ва унинг аҳкомларини жамиятимиздан сиқиб чиқариб, энди бошқа маданиятларга қарши курашишда ота-оналарни огоҳ бўлишга чақиряпти. Бу худди жангга чиққан аскарнинг қўлидаги қуролни олиб қўйиб, энди бориб жанг қил, дейишга ўхшайди. Ахир, ҳар қандай бузғунчи ва ботил маданиятларга қарши тура оладиган ягона мафкура Ислом эмасми?! Жамиятни энг қудратли мафкурадан маҳрум қилиб, энди ўзингизни ўзингиз ҳимоя қилинг, дейиш қайси мантиққа тўғри келади?!
Хабар (ОАВ 03.03.2023й): ОАВда тарқалган хабарларга кўра, 27 феврал куни соат 08:40 ларда Шаҳрихон тумани “Бобочек” маҳалласи “Қизил араб” кўчасида яшовчи 11 ёшли Ғ.М. исмли бола яшаш хонадонидаги омборхона тўсинига сомон пресс ипига ўзини-ўзи осиб, ўз жонига суиқасд қилган. Бу ҳолатни кўриб қолган онаси унга ёрдам берган ва боланинг ҳаёти сақлаб қолиниб, туман шифохонасига ётқизилган. Ҳозирда Шаҳрихон туман прокуратураси томонидан М.Ғ.ни жонига қасд қилганлик сабабларини аниқлашга қаратилган терговга қадар текширув ҳаракатлари ўтказилмоқда.
Изоҳ: Одамлар жамиятни ларзага солган бир мудҳиш воқеадан ҳали ўзига келмай туриб навбатдагиси юз беряпти. 12 ёшли қизалоқнинг ўлдирилиши ҳақида баҳс-мунозаралар тугаб-тугамай туриб, мана энди 11 ёшли боланинг ўз жонига қасд қилгани ҳақида хабар тарқалди. Ўзи 20 ёшга тўлмаган ёш йигит-қизлар орасида суицид ортиб бораётган бир пайтда энди у кескин “ёшариб” ҳам кетди. Энди яхши-ёмонни ажратишни бошлаган бу болани ўз ҳаётига нуқта қўйишга нима мажбур қилган бўлиши мумкин? Наҳот, бу дунёдан тўйиш учун энди озгина улғайишнинг ўзи кифоя қилса?! Гарчи 11 ёшли боланинг ўз жонига қасд қилганининг сабабини билмасак-да, жамиятимизда этни жунжуктирадиган, даҳшатли ҳодисаларнинг кети узилмай қолганлигини бош сабабини яхши биламиз. Ўйлаймизки, ушбу мудҳиш воқеа ҳам ушбу бош сабабга, яъни жамиятимиз Ислом ва унинг аҳкомлари татбиқидан йироқлаштириб юборилаётганига бориб тақалади. Зеро, Ислом татбиқ қилинган даврларда бундай даҳшатли ҳодисалар ва жиноятлар юз берганлиги ҳақида маълумот йўқ. Аксинча, ҳозирда ўзини юксак маданият соҳиби сифатида намоён қилишга уринаётган Ғарб ва бошқа кофир мустамлакачи давлатларнинг тарихида турли жирканч ва тил билан таърифлашга ожизлик қиладиган мудҳиш воқеа-ҳодисалар тўлиб-тошиб ётибди.
Хабар (кун.уз 02.03.2023й): Бундан 3 йил аввал синфдошига Telegram мессенжери орқали диний нашида юборгани ортидан 5 йилга қамалган 21 яшар Сардор Раҳмонқулов 2 март куни апелляция суди якунида озодликка чиқди.
Изоҳ: Ҳукмнинг бундай тарзда ўзгартирилишига жамоатчилик фикри таъсир қилган кўринади. Чунки бу иш жамиятимизда кучли норозилик уйғотди. Буни Олий суднинг бу ҳақдаги баёнотидан ҳам билиш мумкин, унда жумладан шундай дейилган: “жамоатчиликнинг кенг муҳокамаси эмас, балки қонунчиликда назарда тутилган адолат ва шахсни ахлоқан қайта тарбиялаш сингари тамойилларга асосланган”. Ваҳоланки, ушбу мусулмон йигит ҳам хавфсизлик органларининг “плани”га тушган эди. Бундай ҳолатларда эса, “план”га тушган одамнинг қутулиб кетишини деярли имкони йўқ. Бироқ ҳали бу адолат қарор топди, дегани эмас. Чунки суд бу йигитни оқламади, балки уни жиноятчи сифатида қолдирди ва фақат жазони енгиллатди холос.
Хабар (ОАВ 04.03.2023й): ОАВ ва ижтимоий тармоқларда Қашқадарё вилояти Ғузор туманида яшовчи фермер Ж.П. нoрозилик сифатида туман ҳокимлиги биноси олдига чорва молларини ҳайдаб келгани ҳақида хабарлар тарқалди. Хабарларда, фермер хориждан зотдор мол олиб келганини, етарлича ер ажратилмагани учун моллари оч қолгани, масъуллар эса унинг мурожаатларига эътибор беришмаётгани учун шундай йўл тутишга мажбур бўлганини айтган. Бу иш бўйича суд фуқаро Ж.П.ни 7 сутка қамоқ жазосига ҳукм қилган.
Изоҳ: Бундай норозилик билдиришлар аввал ҳам бир неча марта юз берган ва афтидан бу охиргиси ҳам эмас. Одамлар масъулларни ўз муаммоларига эътибор қаратишлари учун мана шундай йўл тутишдан бошқа чора топа олмаяптилар. Кўп ҳолатларда бундай ишлар норозилик билдирганни ўзини жазолаш билан якун топяпти. Юртимизда ўнлаб йиллар давомида вайрон қилинган фермерлик ва чорвачилик соҳаси чуқур таназзулда эканини шундан ҳам билиш мумкин. Арзон ва сифатли сут ва гўшт маҳсулотлари билан бемалол ўзини таъминлаб, экспорт қилиши мумкин бўлган юртимиз уларни импортига муҳтож мамлакатга айланди. Ҳозирда бу маҳсулотлар жуда қиммат бўлиб, кўпчилик уларни истеъмол қилишга қурби етмайдиган аҳволда. Ваҳоланки, ер ва сувимиз ушбу соҳанинг гуллаб-яшнаши учун кифоя қилади. Бироқ ҳукуматнинг коррупцияга ботганлиги ва қасддан нотўғри сиёсат юргизгани оқибатида бу соҳа деярли ўлик аҳволга келиб қолди.
