Матбуот баёноти

Яҳудий вужудининг Ғарбий соҳил аҳлини мажбурий кўчиришга қаратилган янги қарорлари: буни ким тўхтатади?!

Яҳудий вужудининг тор доирадаги вазирлар кабинети қабул қилган қатор янги қарорлар Фаластин аҳлининг ўз заминида яшаш ҳуқуқига таҳдид солмоқда. «Исроил кабинети фаластинликлар мулкларини яҳудийларга сотиш бўйича мавжуд чекловларни бекор қилиш ва Фаластин назорати остидаги ҳудудларда биноларни бузишга рухсат бериш орқали Ғарбий соҳилда яҳудийлар турар-жойларини қуришни тезлаштириш ҳақидаги қарорларни тасдиқлади. Бундан ташқари, Халил шаҳри, Иброҳимий масжиди атрофи ва Байтлаҳмдаги лойиҳалаш ваколатлари яҳудий вужуди ихтиёрига ўтказилди. (Ал-Жазира). Фаластин маъмурияти эса бу қарорга нисбатан фақат қоралов ва норозилик баёнотлари билан чекланмоқда. «У мазкур хатти-ҳаракатлар аннексия ва мажбурий кўчириш режаларининг амалдаги ижроси эканини, шунингдек, улар Озодлик ташкилоти билан яҳудий вужуди ўртасида имзоланган келишувларга зид эканини таъкидлади». (Al-Jazeera Net).

Шу тариқа, маъмурият бир томондан яҳудийларни – ўзи Фаластиннинг катта қисмидан улар фойдасига воз кечиш эвазига имзолаган шартнома ва келишувларни бузишда – айбламоқда, иккинчи томондан эса айни шу келишувларга маҳкам ёпишиб олмоқда. Ҳолбуки, мазкур келишувлар унга ўша улкан хиёнатдан ўзга ҳеч қандай самара бермади. Аксинча, улар маъмурият танасига бадбўйлиги бурунни ачитадиган коррупцияни сингдирди, Фаластин аҳлининг мол-мулкини ботил йўллар билан ейишга кенг майдон очиб берди.

Маъмурият тилидаги қоралов баёнотларини унинг амалий қилмишлари батамом рад этади. Зеро, яҳудий вужудининг хатти-ҳаракатларини «аннексия» ва «мажбурий кўчириш» деб таърифлаётган маъмуриятнинг ўзи Фаластин аҳлига нисбатан яҳудий сиёсатига ҳамоҳанг тарзда солиқ, божхона ва молия соҳасидаги қарорлар орқали уларни сиқувга олмоқда. Қолаверса, айнан шу маъмурият яҳудий вужуди ҳамда Европа Иттифоқининг истаклари ва талабларига кўра, ўқув дастурларига учинчи марта ўзгартириш киритди. Бу ўзгартишлар натижасида ўқув дастурларида Исломга оид ҳар қандай из, Исро ва Меърож замини ҳақидаги эслатма, шунингдек, мусулмонлар фатҳ этган ва ўз ақидасига маҳкам боғланган ушбу заминни босқинчидан ҳимоя қилиш йўлидаги кураш ҳақидаги бирор эслатма ҳам деярли қолдирилмади. Бундан ташқари, айнан шу маъмурият босқинчи билан «хавфсизлик ҳамкорлиги»ни ҳанузгача тўхтатгани йўқ. Ана шу ҳамкорлик туфайли маъмурият босқинчининг хавфсизлик ричагига айланиб, Фаластин аҳлига нисбатан ҳам худди ўша золимлар каби зулм ўтказувчи мустабид тузилмага айланиб қолди. Маъмурият қилган ишларнинг «энг яхшиси» ҳам аслида кенг тарқаладиган ёмонликдир. Жумладан, у Франция ва Европа васийлиги остида, шубҳали «CEDAW» конвенцияси ҳамда феминистик ташкилотлар иштирокида «Маъмуриятдан давлатга ўтиш» деган ниқоб остида вақтинчалик конституцияни тасдиқлади. Ваҳоланки, Смотрич кабилар бу «давлат»ни гап билан эмас, амалда йўққа чиқараётганини ҳар куни очиқ-ойдин айтмоқда.

Мусулмонлар юртларидаги режимларга – Ғазони Трампга «сотиб», унинг аҳлини яҳудий вужуди ихтиёрига ташлаб қўйган режимларга – келсак, улардан қоралаш, норозилик билдириш ва яҳудий вужуди қарорларини халқаро ҳуқуққа зид деб аташдан ўзга ҳеч қандай амалий қадам кўринмади. Аслида эса, айни шу «халқаро ҳуқуқ» Фаластиннинг катта қисмини яҳудийлар фойдасига расман «мулк» қилиб берган. Хоин режимлар эса уни қабул қилиб, Росулуллоҳ ﷺ Умматини Фаластинни озод қилиш йўлидан айнан шу ҳуқуқ билан занжирбанд этди. Жиноятчи вужуд Фаластин аҳлининг Фаластин заминидаги ҳеч қандай ҳақ-ҳуқуқини тан олмаётган бир шароитда, бу режимлар ҳануз «икки давлат ечими» деган шиорни такрорлаб, халқаро ҳуқуқ ва БМТ қарорлари асосида Фаластиннинг катта қисмини яҳудий вужудига топширишни талаб қилишдан тўхтамаяпти!

Шу тариқа, 1948 йил босиб олинган ерлардаги Фаластин аҳли қандай қурбон қилинган бўлса, бугун Ғарбий соҳил аҳли ҳам, Ғазо аҳли ҳам худди шу йўсинда қурбон қилинмоқда. Бунинг барчаси ҳаромзода яҳудий вужудига «қонунийлик» ниқобини тақдим этган БМТ ҳамда «халқаро ҳуқуқ» деб аталмиш тизимнинг «ҳимояси» остида содир бўлмоқда. Муборак заминга қарши биринчи бўлиб тил бириктирган, Исломий Умматни яҳудий вужудига чек қўйиш ва уни куннинг бир соатидаёқ йўқ қилиш учун ушбу замин сари юриш қилишдан тўсган режимлар бугун қуруқ қоралаш ва норозиликлар билан чекланмоқда. Ана шу қуруқ баёнотлар соясида Фаластин аҳли қирғин қилинмоқда.

Яҳудий вужуди қабул қилаётган мазкур қарорлар ниҳоятда хавфли. Зеро, улар келгинди яҳудийларнинг фақат Фаластин аҳли яшайдиган ҳудудлар четларида эмас, балки айнан уларнинг марказида ҳам жойлашиб олишини таъминлайди. Мазкур қарорларнинг ижроси қонли тўқнашувларни кучайтириши, келгинди яҳудийлар тажовузини эса ҳозиргидан бир неча баробар ошириши муқаррар. Бундан кўзланган асосий мақсад – Фаластин аҳлининг ҳаётини чидаб бўлмас азоб-уқубатга айлантиришдир. Токи улардан ҳеч бири ўзи ва оиласининг хавфсизлигидан хотиржам бўлмасин ва оқибатда кўчиб кетишга мажбур бўлсин.

Фаластин аҳли бошидан кечираётган тазйиқлар, ўз ерларидан мажбуран сургун қилиниши, босқинчи вужуднинг уларнинг ўзлари ва уй-жойлари устидан ҳукмронлик ўрнатиши, бу жараёнда яҳудий вужудига илк кунданоқ ўзини унинг қучоғига ташлаган маъмуриятнинг кўмаклашаётгани, шунингдек, ўз мавжудлигини яҳудий вужудининг мавжудлигига боғлаб қўйган режимларнинг уни ҳимоя қилиб келаётгани, Исломий Уммат олдида ҳаракатга келишдан бошқа ҳеч қандай танлов қолдирмайди. Зеро, фақат Фаластин аҳлининг саботига таяниш қурбоннинг ўз жаллоди қаршисидаги саботига суяниш билан баробардир. Шунинг учун Кучли ва Азиз Аллоҳдан умидимиз шуки, У Зот Уммат ичидаги куч-қудрат ва ҳимоя аҳлининг қалбини очсин. Токи, улар Уммат оммасининг турткиси билан вазиятни ўзгартирсинлар; яҳудий вужудини йўқ қилишга киришишдан аввал эса уни ҳимоя қилиб турганларни тахтдан ағдарсинлар. Агар улар Аллоҳга садоқат билан турсалар, нафақат Фаластиндаги манзарани, балки бутун дунёдаги вазиятни ўзгартиришга қодир бўладилар. Зеро, саҳро қаъридан чиқиб, Форс ва Румни фатҳ этган, сўнгра дунёни тиз чўктирган Уммат Фаластинни озод қилишдан ҳам, бутун ер юзи Аллоҳнинг динига бўйсунгунига қадар тарих саҳифаларини қайтадан ёзишдан ҳам асло ожиз эмас. Ана шундай амал билан улар Росулуллоҳ ﷺнинг қуйидаги башоратларини рўёбга чиқарадилар:

«إِنَّ اللهَ ‌زَوَى لِي الْأَرْضَ، فَرَأَيْتُ مَشَارِقَهَا وَمَغَارِبَهَا، وَإِنَّ أُمَّتِي سَيَبْلُغُ مُلْكُهَا مَا ‌زُوِيَ لِي مِنْهَا»

«Аллоҳ ерни менга йиғиб кўрсатди. Шунда унинг кун чиқишидан кун ботишигача барча жойларини кўрдим. Аниқки, Умматим мулки менга йиғиб кўрсатилган жойларгача етиб боради». (Муслим ривояти).

Ҳизб ут-Таҳрирнинг

муборак Фаластин заминидаги матбуот бўлими