Аҳволимизнинг яхшиланиши ўзимизга боғлиқ
بِسْمِ اللهِ الرَّحْمنِ الرَّحِيمِ
Аҳволимизнинг яхшиланиши ўзимизга боғлиқ
Инсон зоти борки, ҳозирги ҳаётидан яхшироқ ҳаёт кечиришга, аҳволининг ҳозиргидан кўра яхшироқ бўлишига доимий интилиб яшайди. Бу нарса инсоннинг барча жиҳатларига, яъни иқтисодий, ижтимоий, маънавий, руҳий ва ҳоказоларга тааллуқлидир. Янада тушунарлироқ бўлиши учун битта мисол билан мустаҳкамлаб қўямиз. Сизнинг эскирган машинангиз бор, сиз бунга асло рози бўлмайсиз ва янгисини олишга ёки озгина минилган бўлса ҳам, ўзингизникидан яхшироғини олишга ҳаракат қиласиз. Энди бунинг миқёсини кенгайтириб, бутун бир умматга кўчирадиган бўлсак, ҳозирда мусулмонлар умматларнинг энг қолоғи, энг қашшоғи, энг хорланаётгани, умуман олганда, энг паст сортдаги одамлар бўлиб қолди. Агар ким бу фикрга қўшилмайдиган бўлса, демак у мусулмонларнинг аҳволидан ҳам, ўзининг аҳволидан ҳам бехабар экан.
Хўш, мусулмонлар яна олдинги қудратларини тиклашлари ва азизликларини қайтаришлари учун нима қилишлари керак? Аллоҳ инсонларнинг ҳар қандай ҳолатларига энг тўғри ечимни бериб қўйганидек, бу ҳолатга ҳам ечимни кўрсатиб қўйган:
إِنَّ اللَّهَ لَا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ
– “Аниқки, то бирон қавм ўзларини ўзгартирмагунларича, Аллоҳ уларнинг аҳволини ўзгартирмас”. [13:11]
Субҳоналлоҳ, буни қарангки, буюк куч-қудрат Соҳиби бу оятда инсоннинг бутун бир ҳаётидаги асосни айтиб қўйибди. Бундай илм фақат Аллоҳгагина ҳос бўлган илмдир. Аллоҳ бу оят билан бандаларининг аҳволларини қайси ҳолатда яхшиланиши мумкинлигини икки оғиз сўз билан таърифлаб қўйибди. Аллоҳ бизга бу ояти билан “Аҳволларинг ёмонми, демак, ўзларингда бир хатолик бор, ўзларингни текширинглар”, деяпти. Бизнинг энг катта хатомиз мана шу нарсага беэътибор бўлаётганимиздир, яъни биз бор эътиборимизни атрофимизни ўзгартиришга сарфлаб юборяпмиз. Ваҳоланки, ишни аввал ўзимиздан бошлашимиз керак, аввал ўз хатоларимизни тўғрилашдан бошлашимиз керак. Шундан кейингина аҳволимизни яхшиланишидан умид қилишимиз мумкин.
Ўзимизни текширишда эса, энг аввало, тушунчамизни асосидан бошлаб текшириб чиқишимиз керак бўлади. Чунки инсонни тушунчаси бошқаради. Масалан, агар компютерга эски ва ўзига мос тушмайдиган программа юкланса, компютер секин ва нотўғри ишлаши мумкин. Энди агар компютерга ўзига мос ва тўғри программа юкланса, у тўғри ва тез ишлайди. Бу ерда программа компютернинг тушунчаси, яъни ана шу программа компютерни бошқаради. Шунга ўхшаб, инсон ҳаётини ўзгартиришни мақсад қилган бўлса, ўз тушунчасини ўзгартириши керак бўлади.
Бас, шундай экан, эй мусулмонлар! Аллоҳнинг раҳм-шавқатидан ўзимизга тўғри хулоса чиқарайлик. Бу Зот бизнинг қўлимизга жуда содда ва тушунарли бўлган ҳаёт низомини бериб қўйибди. Биз бунинг учун Аллоҳга то ўлгунимизча ибодат қилсак ҳам шукрини адо этолмаймиз. Аллоҳнинг бундай раҳматига, Ўз бандаларига бўлган муҳаббатига биз қандай жавоб қайтаряпмиз? Ёки Аллоҳнинг ваъдасига шубҳа қиляпсизми, сизни нима тўхтатиб турибди Аллоҳгагина итоат қилишдан? Кўча тили билан айтганда, биз ўзимизга жавоб бераверайлик, қолгани Яратувчини қўлида. Яратувчи эса ҳеч қачон ваъдасига хилоф қилмайди.
Ҳизб ут-Таҳрирнинг Ўзбекистондаги медиа офиси Фаррух
28.02.2015й
