بِسْمِ اللهِ الرَّحْمنِ الرَّحِيمِ

Каримов режимининг зулмлари дастидан Ўзбекистон фуқароларига на давлат ичкарисида хотиржамлик бор, на давлат ташқарисида

Биз бу мақоламизни Каримовни қадимги Юнон афсоналаридаги каби, (тинчликни таъминлаб турибди дея) тинчлик худоси сифатида таърифлайдиганлар ҳам ўқишларини хоҳлар эдик.

Шу кунларда Россиядаги Ўзбекистон фуқароларининг уйларига қайтиши муаммо бўлиб қолмоқда. Озодлик сайтидан иқтибос:

“Москвадаги меҳнат мухожирлари ҳуқуқларини ҳимоя қилувчи "Ёрдам" ташкилоти раҳбари Баҳром Ҳамроевга кўра, эски паспортларнинг амал қилиш муддати ҳақида аҳолига аниқ маълумот берилмагани хориждаги минглаб ўзбекистонликларни мушкулотлар қаршисида қолдирган:

– Кўпчилик бу ерда 2018 йилга узайтирилди, деб хотиржам юрганди. Энди ундай эмас бўлиб чиқяпти. Ҳозир  энди улар катта пул тўлаб справка олишлари керак. Қанчасини учоқ билети куйиб кетди. Гўёки буни ҳукумат атайлаб қилгандай. Қарангда минглаб одам элчихона олдида турибди, справка олиш учун жонини беришга тайёр. Таниш-билишчилик бўлиб кетяпти, пора аралашяпти, – дейди Баҳром Ҳамроев”.

Бу ҳолатни кузатиб турган кишида қуйидаги савол туғилиши табиий. Ўз фуқароларини хатто ўзга юртда муаммоли вазиятга солиб қўяётган Каримов режими қандай қилиб бу жамиятда фаровон ҳаётни таъминлаб бера олади? Ўз фуқаролари борасида ҳукумат бундай аҳволларга эътибор бермайдими? Ёки уларнинг фаровон ва тинч ҳаёт тўғрисидаги қарашлари жамиятдаги инсонлар қарашларидан  бошқачами?  Бизда бундай саволларнинг пайдо бўлишида фақат юқоридаги маълумотга таянаётганимиз йўқ.

Озодлик 16.01.2016 “Шаҳрисабзда "экстремист ўғли" учун сазойи қилинган ўқитувчи аёл ўзини осди” номли хабардан:

“Ҳамкасблари ва маҳалладошларининг айтишича, Шаҳодат Баҳодирова ўғли экстремизмда айбланиб қамалиши ортидан миллий хавфсизлик ходимлари ва раҳбарларнинг қаттиқ босими остида қолган ва таҳқирларга чидай олмай ўз жонига қасд қилган бўлиши мумкин.

– Ўғли қамалганидан кейин лицей директори уни чақиртириб, ўғлинг экстремист, деб ҳақоратлаган ва ишдан бўшатиб юборган. Уни қизини ҳам институтдан ҳайдашган. Ўзини доим органларга чақиртириб сўроқ қилишган. Охири ўзини осган. Бу ҳақда хат ҳам ёзиб қолдирган экан, – дейди ўзини осган аёлнинг ҳамкасбларидан бири.”

Бу ҳолатга қандай бахо бериш керак? Бир ўғил Россияга ишлагани бориб келса ва намоз ўқигани учун қамалса, буни ортидан уни онаси хақоратланса, давлат идоралари томонидан босимга учраса ва намоз ўқигани учун қамалган йигитнинг яқинлари хатто ишлаётган ва ўқиётган жойларидан хайдалса, бу ҳолатга қандай бахо бериш керак?! Наҳотки бу ҳолат ҳам фаровон ҳаётнинг бир кўриниши ёки фаровон ҳаёт қуришдаги ҳаракатлардан хисобланса?!

Фаровонлик тўғрисида айтиб ўтганимиздек жамиятда зиддиятли қарашлар мавжуд. Бу борада, бир воқеликни кимдир фаровонлик сари қадам деб айтса, иккинчи бир одам айнан шу воқеликни ҳукумат томонидан жамиятдаги инсонларга қилинаётган зулм сифатида бахо беради. Келинг юқоридаги хабардан бошқа хабарларни ҳам кўриб ўтайлик. Озодлик сайти тарқатган хабар:

“Арманистондаги миллатдошларидан ўғлини адолатсизликдан қутқаришда ëрдам сўраб мурожаат қилган Арамаис Авакяннинг онаси Флора Сакунц¸ арман омбудсмани расмий мактубида ëзилишича¸ ўғлининг ҳибсхонада қийноққа солинаëтганини билдирган.

“Флора Сакунцнинг бизга билдиришича¸ 2016 йил 6 январь куни бўлиб ўтган маҳкамада у ўз ўғлини ниҳоятда озиб-тўзиб кетган ва  тушкун бир ҳолда кўрган. Мурожаатчига кўра¸ жиноятга иқрор қилиш мақсадида ҳуқуқ-тартибот идоралари Арамаис Авакянни қийноққа солишган – у сўнгги суд мажлисига оëғи синга ҳолда келтирилган….”, дейилади арман омбудсмани томонидан Тошкентга йўлланган мактубда.”

Нима учун Каримов режими томонидан оддий фуқароларга нисбатан бундай қийноққа солишлар одатий ҳолга айланди? Наҳотки бу ҳолат фаровон ҳаёт қуриш омили бўлса?! Бундай ҳолатлар хатто шу режим томонидан қабул қилинган қонунлар бўйича ҳам жиноят хисобланади. Кўриниб турибдики, Каримов режими ўзлари томонидан қабул қилинган қонунларга ҳам амал қилмаяпти. Мана шу хабарга тааллуқли бир нарсани эслатиб ўтмоқчимизки, Арамаис Авакяннинг турмуш ўртоғи уни мусулмон эмаслигини, насроний эканлигини айтган. Лекин Каримов режими уни насроний эканлигига ҳам қарамай “ИШИД” ташкилотига алоқадорликда айбламоқда.

Яна бошқа хабарларга мурожаат қиламиз. Озодлик сайти 12.01.2016:

“Прокуратура бутун Ўзбекистон бўйлаб бюджет маблағларининг сарфланишини тафтиш қилди. Текширув якунларига кўра, деярли барча вилоятларда давлат мулозимларининг бюджет маблағларини ноқонуний сарфлагани аниқланган. Жумладан, Бухоро вилоятида элликка яқин мулозим ишдан олинган, Самарқандда эса қонунбузарликка йўл қўйган мулозимларга қарши жами 125та жиноий иш қўзғатилган.”

Эътибор беринг Бухоро вилоятида элликка яқин мулозим ишдан олинган, Самарқандда эса қонунбузарликка йўл қўйган мулозимларга қарши жами 125та жиноий иш қўзғатилган. Аҳвол шу даражага етгунга қадар бу ҳукуматнинг кўзи қаерда эди? Бу ҳолатлар Каримов режими томонидан олиб борилаётган “самарали ислоҳотлар” меваси эмасми? Аҳолига берилмаётган табиий газнинг бошқа давлатга сотилиши, мамлакат миқёсидаги муҳим корхона ва заводларнинг ноқонуний тарзда ўзлаштирилиб тўлиғича чет эл инвесторларига сотиб юборилиши, иқтисодиётда ўсиш бўлаётгани тўғрисида ёлғон даъволар қилиниши, янада аҳамиятлироғи Андижон қирғини, буларнинг барчаси Каримов режимининг юқорисида жиноятчи тўда ўтирганлигини далилласа, Озодлик сайтида келтирилгани каби маълумотлар бу режимнинг нафақат юқори поғонаси, балки халқ билан бевосита ишловчи тузилмалари ҳам жиноятчи эканлигини кўрсатиб турибди. Қидириб кўрсак бундай хабарлар кўплаб топилади. Хатто жамият ҳаётига озроқ аҳамиятли бўлсангиз бундай ҳолатларга ўзингиз ҳам гувоҳ бўлишингиз мумкин. Каримовнинг, хеч қандай асоссиз, чорак асрдан буён президентлик курсисини бўшатмай келаётганлиги ҳам бу режимнинг ёлғонларга таянишига исбот хисобланади.

Барчамизни қизиқтирадигани ва қизиқтириши керак бўлган савол, бу ҳолатлар қачонгача давом этади? Биз бу жамиятда инсонлар фаровон ҳаёт кечиришларини истар эканмиз, бу истагимиз амалга ошишлиги борасида кимларга ишониб, кимлардан умид қилаётганимизни тафаккур қилиб кўрайлик. Улар, бизнинг ишончимизга ёки бизнинг улардан умидланишимизга лойиқ инсонларми? Рад этиб бўлмас шунча маълумотлар, хабарлар аниқ далил сифатида бизларга тақдим этилаётган бир вақтда яна улардан ҳаётимиз учун яхшиликларни кутишлигимиз тўғрими?

Биз хеч ҳам бирор инсоннинг зулмланишини хоҳламаймиз. Биз, Аллоҳ томонидан берилган ҳақ ҳуқуқларни хеч ким топтамаслигини ва Аллоҳ томонидан юклатилган бурчларини бемалол адо этилишида хеч ким ва хеч нарса тўсиқ бўлмаслигини истаймиз. Устимизда адолатли бошлиқлар бўлишини ҳамда улар бизлар учун ва келажак авлодларимиз учун хотиржамлик бера оладиган, ёлғон эмас, чин фаровон ҳаёт қуришимизда етакчи бўлишларини истаймиз. Асло, ўзларининг манфаатлари ортидан жамиятдаги инсонларнинг манфаатларини унутадиган, ўзларининг бурчларини ва масъулиятли вазифаларини суистеъмол қиладиган инсонларга алданмасликни истаймиз. Кимки бизнинг истакларга қўшилса адолатли, фаровон ҳаётни қуришимизда Аллоҳ томонидан бизларга тақдим қилинган Ислом йўлини танласин.

Ҳизб ут-Таҳрирнинг Ўзбекистондаги медиа офиси Абдуллоҳ

26.01.2016й.