Матбуот баёноти

Афғонистондаги кенг тарқалган ва мустаҳкам ўрнашиб қолган қашшоқлик – Исломий Иқтисод низомини татбиқ қилишдаги муваффақиятсизлик ҳамда Республика даври иқтисодий тафаккурининг давом этиши натижасидир

Сўнгги ҳисоботлар, жумладан, Би-Би-Сининг Ғур вилоятидан берган даҳшатли ҳисоботи, Қобулда бир муҳандиснинг ўзига ўт қўйиши ва одамларнинг ўз буйракларини сотаётгани ҳақидаги такрорий хабарлар ҳар бир мусулмоннинг қалбини қон қилувчи гуманитар фалокатни очиб берди. Айрим шаҳарларда иш излаётган, очлик ва қашшоқликдан азият чекаётган одамларнинг узун навбатлари кўзга ташланадиган аччиқ реалликка айланди. Ўта қашшоқлик ва қарзлар гирдобида қолган бошқалар эса оиланинг қолган аъзолари ҳаётини сақлаб қолиш учун ўзларининг ёш қизларини сотишга мажбур бўлмоқдалар! Бирлашган Миллатлар Ташкилоти Тараққиёт Дастурининг ҳисоботлари шуни кўрсатадики, Афғонистон халқининг ҳар тўрт кишисидан учтаси ўзларининг асосий яшаш эҳтиёжларини қондира олмайди ва уларнинг ўн фоиздан ортиғи очарчилик ёқасида турибди.

Ҳизб ут-Таҳрир Афғонистон вилояти матбуот бўлими шуни таъкидлайдики, ушбу инқирознинг илдизлари фақатгина қурғоқчилик ёки хорижий ёрдамларнинг узилишида эмас, балки носоғлом иқтисодий тузилмалар, Респкблика даврида ҳукмрон бўлган иқтисодий тафаккур ҳамда капитализмга асосланган иқтисодий сиёсатларнинг давом этаётганидадир. Амалдаги мутасаддилар мавжуд қашшоқликни сўнгги йигирма йил ичидаги «сунъий иқтисодиёт» қулашининг натижаси сифатида изоҳламоқдалар. Бироқ бу оқлов бойликнинг адолатли тақсимланмаётганлигидан иборат аччиқ ҳақиқатни яшира олмайди.

Афғонистон ресурслар жиҳатидан қашшоқ мамлакат эмас, зеро у улкан минерал захираларга, қишлоқ хўжалиги ерларига, сувга, муҳим стратегик географик жойлашувга, ёш ишчи кучи ва улкан ишлаб чиқариш салоҳиятига эга. Асосий муаммо ресурсларнинг етишмаслигида эмас, балки ушбу ресурсларни адолат, шаффофлик ва Шариатга асосланган масъулият негизида бошқарадиган низомнинг йўқлигидадир.

Бугунги кунда ҳокимларга яқин бўлган элита гуруҳ иқтисодий ресурслар, маъмурий лавозимлар ва иш ўринларини катта миқёсда монополия қилиб олган. Шаффофликдан йироқ ва одилона рақобатсиз олиб борилаётган фойдали қазилмаларни қазиб олиш эса бойликнинг муайян гуруҳлар қўлида тўпланишига олиб келди. Бу – капиталистик тузумнинг табиатидир: у халқнинг асосий эҳтиёжларини таъминлаш ўрнига иқтисодиётнинг юзаки ўсишига ва бозорга эътибор қаратади, ва бу бозор бойликни озчилик қўлида тўплаб, кўпчиликни ҳалокатга етаклайди.

Бизнинг Исломга асосланган ҳужжатимиз аниқдир:

• Исломда қашшоқлик – бу шахснинг ўз асосий эҳтиёжларини: озиқ-овқат, кийим-кечак ва бошпанани таъминлай олмаслигидир. Ҳар қандай низомнинг ушбу эҳтиёжларни таъминлай олмаслиги унинг иқтисодий сиёсатининг муваффақиятсизлигига далилдир.
• Иқтисодиётнинг муваффақияти ишлаб чиқариш ҳажми ёки давлат даромадларининг ошиши билан эмас, балки бойликни тақсимлаш ва ҳар бир шахснинг асосий эҳтиёжларини кафолатлаш қобилияти билан ўлчанади. Ислом бойликнинг ҳар бир шахсга етиб боришини кафолатлашни давлат зиммасига юклади, амалдаги давлат эса самарали иқтисодиётни барпо этишда ва бойликни адолатли тақсимлашда муваффақиятсизликка учради.
• Ислом низомида агар шахс меҳнат қилишга қодир бўлмаса ёки унга иш имконияти яратилмаса, унинг эҳтиёжларини қондириш, биринчи навбатда, унинг меросхўрлари, сўнгра эса Байтулмол зиммасига тушади. Отанинг шунчаки даволаниш харажатларини тўлаш ёки озиқ-овқат сотиб олиш учунгина ўз ўғлини сотишга мажбур бўлиши давлат ва жамият масъулиятсизлигининг далолатидир.
• Олтин, нефт ва газ каби йирик конлар омумий мулк (милкият ул-омма) ҳисобланади ва уларнинг даромадлари хусусий компаниялар, урушаётган давлатлар ёки ҳокимият идоралари ихтиёрига топширилмай, балки халқ фаровонлиги учун сарфланиши шарт. Ҳозирги ёндашув, аслида, Ислом уммати бойликларини тизимли равишда талон-торож қилишдан бошқа нарса эмас.

Афғонистоннинг амалдаги ҳокимлари англаб етмоқлари лозимки, камбағалларга оғир солиқлар юклаш мустамлакачи давлатларнинг лойиҳалари ва уларнинг ёрдамларига умид боғлаш каби вақтинчалик ечимлар эса камбағаллар ва етимларнинг қорнини тўйдирмайди. Нажот йўли – Республиканинг иқтисодий тафаккур сарқитлари ва капиталистик иқтисодий сиёсатидан бутунлай воз кечиш ҳамда адолат, инсон қадр-қиммати ва бойликнинг адолатли тақсимотига асосланган Рошид Халифалик соясидаги Исломий Иқтисод низомига қайтишдир. Ушбу низом қашшоқликни табиий ҳолат эмас, балки таг-томири билан йўқ қилиниши лозим бўлган фавқулодда ҳолат деб билади.

﴿وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكاً﴾

“Ким Менинг эслатмамдан юз ўгирса, бас, албатта унинг учун танг ҳаёт бўлур”

Ҳизб ут-Таҳрир Афғонистон вилояти матбуот бўлими