بِسْمِ اللهِ الرَّحْمٰنِ الرَّحِيمِ

Матбуот баёноти

Афғонистонда болалар очликдан ҳалок бўлаётган экан, халқаро ҳамжамият уларнинг ҳаётлари эвазига сиёсат олиб бормоқда

БМТга кўра, Афғонистон энг оғир гуманитар кризисга юз тутиш арафасида. У ерда аҳолининг ярми мисли кўрилмаган даражада қашшоқлик ва очарчиликка дуч келган. Бунга қаттиқ қурғоқчилик, йигирма йиллик Ғарб истилоси, халқаро ҳамжамиятдан инсонпарварлик ёрдамларининг тўхтаб қолиши ва ўтган август ойида Толибоннинг юртни эгаллаб олиши ортидан миллиардлаб долларлик давлат активларининг АҚШ томонидан музлатиб қўйилиши сабаб бўлган. БМТнинг Жаҳон озиқ-овқат дастури (WFP) ижрочи директори Дэвид Бисли аҳолининг 95 %и етарли озиқ-овқатга эга эмаслигини, тахминан 23 миллион афғон очликдан ўлим хавфи остида қолганини, озиқ-овқат хавфсизлиги бутунлай барбод бўлганини таъкидлади. У шунингдек, «Биз фалокатни кутмоқдамиз», дея билдириб, Афғонистонни «ер юзидаги жаҳаннам» бўлишини таъкидлади. Дарҳақиқат, Афғонистонда 14 миллион бола очлик хавфи остида қолган. БМТнинг Жаҳон озиқ-овқат дастури (WFP) ҳамда UNICEF ташкилотлари агар зудлик билан чора кўрилмайдиган бўлса, 1 миллионга яқин бола бу қишда очликдан ўлишидан огоҳлантирди. Шундоқ ҳам, уларнинг аксари тўйиб овқатланишни аллақачон унутган, ейишга нон бурдаларидан бошқа ҳеч нарсалари йўқ. Келгуси қаҳратон қиш ойларида Афғон халқининг аҳволи янада оғирлашиши башорат қилинмоқда.

Халқаро ҳамжамият, Жаҳон Банки ва Халқаро Валюта Фонди гуманитар ёрдамларга қарам бўлиб келган Афғонистонга миллиардлаб долларлик ёрдамларни тўхтатиб қўйди… АҚШнинг янги маъмурияти мамлакатнинг 10 миллиард долларлик активларини музлатиб қўйди. Буларнинг барчаси иқтисодиёт, соғлиқни сақлаш ва бошқа давлат хизматларини фалаж қилди… Ўз навбатида ҳалокатли гуманитар кризисга олиб келди. Булардан мақсад, Ғарбнинг илмоний либерал қадриятларига мос келадиган Ислом версиясини татбиқ қилиши учун Толибон ҳукуматига босим ўтказишдир. Шунинг учун Ғарб давлатлари ва халқаро ҳамжамият ўз сиёсий мақсадларини амалга ошириш ва мамлакатнинг илмонийлик асосида бошқарилишини таъминлаш учун очлик ва очарчиликдан восита сифатида фойдаланишмоқда. Бу режаларини улар йигирма йиллик ваҳший босқинчиликлари даврида жанговар йўл билан амалга ошира олмагандилар. Улар Афғонистонда фаровонлик ва хотин-қизлар ҳуқуқини таъминлаш, деган бемаъни даъволарни илгари суришмоқда. Бироқ аслида, у ерда аёллар ва болалар очликдан қирилмоқдалар, соғлиқни сақлашдан ва ижобий келажакдан маҳрум қолмоқдалар ва бунга Ғарб давлатлари ва халқаро ҳамжамиятнинг афғон халқини иқтисодий жиҳатдан бўғиши сабаб бўлмоқда. Human Rights Watch ташкилотига кўра, «Афғонистондаги молиявий кризис асосан хотин-қизларга оғир таъсир қилган, улар озиқ-овқат, соғлиқни сақлаш ва молиявий ресурсларни қўлга киритишда жуда катта тўсиққа дуч келганлар».

Бизнинг Толибон биродарларимизга айтар сўзимиз шуки, кўз ўнгингизда намоён бўлаётган ушбу гуманитар фалокат бевосита хорижий кучлар ва ташкилотларга қарам бўлиш оқибатидир. Аслида, БМТ каби ташкилотлар Афғонистонга ўхшаш давлатларда ўлим хавфидан башорат қиляпти-ю, лекин бу мамлакатларда ўлим тузоқларини қўяётганлар БМТга аъзо йирик давлатлардир. Уларнинг ёрдам бериш тўғрисидаги ваъдаларининг сариқ чақалик аҳамияти йўқ. Чунки буларнинг барчаси Исломга нисбатан душманлик режаларини амалга оширишга қаратилган. Хўш, йигирма йиллик халқаро ёрдам Афғонистонга коррупциялашган иқтисодиёт ва ёрдамга қарам давлатдан бошқа нимани берди?! Афғонистон очлик ва қаҳатчилик бўйича дунё давлатлари орасида иккинчи ўринда туради. Ҳозир эса, биринчи ўринни эгаллашга қараб кетмоқда.

Афғонистон ва бошқа мусулмон юртлари Халифалик тузуми томонидан татбиқ қилинажак Ислом кўз-қарашини қабул қилмас экан, доимий беқарорлик, иқтисодий кризис ва гуманитар фалокатларга маҳкум бўлиб қолаверади. Зеро, исломий кўз-қараш заифлик ва хорижий давлатларга қарамликни кучайтирувчи илмоний миллий давлат моделини йўқ қилади. Модомики, исломий кўз-қараш қабул қилинмас экан, Ислом олами ажнабийлар назорати остида, уларнинг буйруқларига бўйсунган ва душманлар шафқатини кутган ҳолатда қолиб кетади. Аллоҳ Таоло айтади:

﴿فَإِمَّا يَأْتِيَنَّكُم مِنِّي هُدًى فَمَنِ اتَّبَعَ هُدَايَ فَلاَ يَضِلُّ وَلاَ يَشْقَى + وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى﴾

«Бас, сизларга Мен тарафдан ҳидоят келганида ким Менинг ҳидоятимга эргашса, йўлдан озмас ва бахтсиз бўлмас. Ким Менинг эслатмамдан юз ўгирса, бас, албатта унинг учун танг-бахтсиз ҳаёт бўлур ва Биз уни қиёмат кунида кўр ҳолда тирилтирурмиз»                                          [Тоҳа 123-124]

Ҳизб ут-Таҳрирнинг Покистондаги матбуот бўлими