Ҳафталик муҳим воқеалар таҳлили
Ҳафталик муҳим воқеалар таҳлили
بسم الله الرحمن الرحيم
﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾
“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”
Хабар (uza.uz 23.04.2024й): Британия ташқи ишлар вазири Дэвид Кэмерон бошчилигидаги делегация ташриф билан Ўзбекистонга келди.
Изоҳ: Кэмероннинг Ўзбекистонга ташрифидан бир кун олдин, яъни 22 апрелдан бошлаб Мирзиёев таътилга чиққанлиги эълон қилинди. МОнинг қолган давлатлари президентлари билан учрашган Кэмерон Мирзиёев билан учраша олмай кетди. Англиядек йирик давлатнинг обрўли ва халқаро сиёсатда кўзга кўринган сиёсатчиларидан бири бўлган Дэвид Кэмероннинг илк ташрифи бўлишига қарамай, у билан мамлакат президенти сифатида Мирзиёевнинг учрашмаганлиги – жуда ғайриоддий ҳолатдир. Балки шу йўл билан Мирзиёев “рус оғаси”ни кўнглини олишни кўзлагандир. Чунки бундан аввал НАТО делегациясининг Ўзбекистонга ташрифи Россиянинг ғашига теккан эди. Ҳолбуки, матбуот Кэмерон МО давлатларининг “қийинчилик билан эришган суверенитетини” қўллаб-қувватлашга қаратилган чора-тадбирларни эълон қилиши ва ривожланиш учун 50 млн. фунт стерлинг ажратилиши ҳақида хабар тарқатди. Буни зимдан Россияга қарши қаратилган ишлар сифатида баҳолаш мумкин. Мустамлакачи кофир давлатларнинг МОга бўлган қизиқишлари Россия-Украина уруши фонида кўчайиб бормоқда. Бунга бир томондан МОнинг геосиёсий жойлашуви ва улкан табиий бойликлари сабаб бўлаётган бўлса, бошқа томондан эса ушбу мусулмонлар яшайдиган минтақада сиёсий Ислом ёйилишини олдини олишдир. Кэмерон ташрифи давомида муҳокама қилган хавфсизлик ва иқтисодий масалалар ҳам бунга ёрқин мисолдир. Айниқса, Англия ҳақида гапирганда, албатта, у ва унинг малайи лаънати Мустафо Камол томонидан қулатилган Ислом умматининг қалқони бўлмиш Халифалик давлатини эсга олмай иложи йўқ. Ушбу машъум кундан бошлаб мусулмонлар ор-номуси бемалол топталадиган, қонлари дарё бўлиб оқизиладиган, юрт бойликлари очиқчасига талон-тарож қилинадиган бўлди. Бундан ташқари, Муборак Фаластин заминида 100 йил олдин мусулмонларни қирғин қилиш тамал тошини қўйиб берган ҳам, сўнгра у ерда босқинчи яҳуд вужудини пайдо қилган ҳам айнан шу Англия бўлади. Шунинг учун ҳам Англия каби мустамлакачи давлат билан ҳар қандай соҳада заҳриқотил битимлар тузиш, дўстлашиш, ҳамкорлик қилиш оқибати омонликка олиб борадиган иш эмас! Аллоҳ таоло шундай дейди:
يَا أَيُّهَا الَّذِينَ آمَنُوا لَا تَتَّخِذُوا الْيَهُودَ وَالنَّصَارَىٰ أَوْلِيَاءَ
– “Эй иймон келтирганлар! Яҳудий ва насороларни ўзингизга дўст тутманг”. (Моида:51)
Хабар (islom.uz 23.04.2024й): 23 апрель куни Саудия Арабистони пойтахтида Ислом олами уюшмаси Олий Кенгашнинг 46-йиғилиши бўлиб ўтди. Ушбу йиғилишда Муфтий шайх Нуриддин Холиқназаров Ислом олами уюшмаси олий кенгашига аъзо бўлди.
Изоҳ: Ўзбекистон муфтийси Ислом фиқҳ академиясига ҳам аъзо бўлган эди ва умумий ҳисобда шу каби тўртта уюшма ва ташкилотларга аъзо қилинди. Ушбу Исломий деб аталадиган ташкилот аъзоларини асосан Америкага қарам бўлган араб давлатлари ташкил қилганини эътиборга олсак, демак, уларга Ўзбекистон муфтийсини аъзо қилиш билан Американинг юртимиздаги диний соҳани ҳам ўз назоратига олишга уриниши сифатида баҳолаш мумкин. Чунки Америка мусулмон юртларга аксар ҳолларда мўътадил Ислом орқали киришга уринади. Ўзбекистонда эса мусулмонлар диний идораси рус хавфсизлик хизматлари таъсиридан қутулолмаётган ички ишлар органлари назорати остида қолмоқда. Бундан ташқари, муфтийни фалон обрўли ташкилотларга аъзо бўлди, дейиш билан уни халқ орасидаги нуфузи ва таъсирини кўтариш кўзланаётган бўлиши ҳам эҳтимолдан холи эмас. Аслида, бу каби буюртмачиларнинг кўрсатмаси асосида ишлайдиган қўғирчоқ ташкилотларнинг Ислом умматига ҳеч қандай нафи йўқлиги аллақачон исботини топиб улгурган. Мана, ушбу йиғилишда ҳам бугунги кунда энг долзарб бўлиб турган Ғазо, Фаластин масаласи жиддий муҳокама марказида бўлмади ва табиийки, унга тааллуқли тўғри Исломий ечим ҳам айтилмади. Бугунги кунда Ислом умматининг бирлигини, Исломий қадриятлар ҳимоясини юқоридаги каби ташкилот ва анжуманлар билан таъминлаб бўлмайди. Зотан, бундай ташкилотлар Исломни тузум сифатида тушунишдан буришга қаратилган бўлиб, уларни ташкил этиш ёки унга аъзо бўлиш ростмона Аллоҳ ва Росули ﷺга хоинлик қилишга олиб боради. Чунки мусулмонларнинг муаммоларига ечим бериш, уларнинг моли, жони ва обрўсини ҳимоя қилиш – Халифалик давлати бўлсагина амалга ошадиган ишдир. Шунинг учун асосий масала қандайдир ташкилотларга аъзо бўлиш эмас, балки ана шу муборак давлатни тиклаш бўлиши лозим. Расулуллоҳ ﷺ дедилар: “Имом (яъни Халифа) қалқондир, унинг ортида туриб (душманга қарши) жанг қилинади ва у билан ҳимояланилади”.
Хабар (qalampir.uz 25.04.2024й): Миллий либосларни тарғиб қилган аёлларни ҳақоратлаган эркак 15 суткага қамалди.
Изоҳ: Хабарда айтилишича, апрел ойида “Замонавий аёллар” клуби томонидан “Atlas Party” номли миллий либослар тарғибот тадбири ўтказилиб, тадбирдан лавҳалар ижтимоий тармоқларга жойлаштирилган. Ушбу лавҳаларга нисбатан бир мусулмон йигит, бироз қўполлик билан бўлса-да, Исломий нуқтаи назардан туриб ўз фикрини билдирган. Мана шу “айби” учун унга 15 сутка қамоқ жазоси берилган. Ҳа, Бухорий ва Термизийлар етишиб чиққан буюк юртимизнинг ҳозирги аҳволи мана шу – мусулмон жамиятда ёмонликдан қайтариб, яхшиликка чақириш жиноят, аёлу қизларни ярим яланғоч саҳнага олиб чиқиш эса мақтовга лойиқ ва қонунан рухсат этилган ишдир. Хотин-қизлар қўмитаси ҳам мазкур ишга муносабат билдириб, йигитни юртдаги аёллар шаъни ва қадр-қимматини камситишда айблаб чиқди. Ана холос! Аслида, жирканч ажнабий маданиятни тарғиб қилаётганлар юртимиз аёлларининг обрўси ва шаънини оёқости қилмаяптиларми?! Ўзи бу ҳукумат ҳам, анави қўмита ҳам фақат ярим яланғочларни ҳимоя қилишдан бошқасига ярамай қолганга ўхшайди. Масалан, таълим муассасаларида ҳижоб кийиб боргани учун дарсдан ҳайдаб чиқарилаётган муслима қизларни ҳимоя қилганини бирор марта кўрмадик. Шундай бўлгач, юртимизда болалаб бораётган мункар ишларни ҳатто тили билан ҳам қайтаришдан ожиз қолаётган анави салла-чопонлар лом-мим демаётганидан кейин, мард ва ғаюр мусулмон эр кишилар аёл-қизларимизга Ғарбнинг бузуқ маданиятини тарғиб қилаётганларга қарши гапиришга журъат қилишмоқда. Ушбу мард ўғлонларга Аллоҳнинг розилиги бўлсин! Ҳукумат бундай мусулмон йигитларнинг овозини ўчириш билан гуноҳ ишга, жиноятга қўл ураётгани етмаганидек, аёлларни гендер тенглик ва феминизмнинг заҳарли фикрлари билан фитналашга қаратилган тарғибот-ташвиқот ишларига кенг йўл очиб беряпти ва керак бўлса ҳомийлик ҳам қиляпти. Халқимизнинг сукути уларга шундай ишларга бемалол қўл уришга журъат беряпти. Шунинг учун мусулмонлар сукут сақлашни бас қилиб, ўз Исломи учун курашга, шунингдек, уни ҳокимият тепасига олиб келиш йўлидаги ҳаракатларини бирлаштиришга ўтишлари лозим.
وَاعْتَصِمُوا بِحَبْلِ اللَّهِ جَمِيعًا وَلَا تَفَرَّقُوا ۚ
– “Ва барчангиз бир бўлиб Аллоҳнинг арқонига (Қуръонга) боғланингиз ва бўлинмангиз!” (Оли Имрон:104)
Хабар (uza.uz 25.04.2024й): Жорий йилнинг I чорагида бюджетга 40,3 трлн. сўмлик солиқ тушумлари таъминланиб, ўтган йилнинг мос даврига нисбатан 2,4 трлн. сўмга, яъни 6 фоизга ўсишига эришилди, – дейди Солиқ қўмитаси Бюджет даромадларини прогнозлаштириш бошқармаси бошлиғи Ҳамдам Бобожонов.
Изоҳ: Хабарда айтилишича, “Ўзбекистон – 2030” стратегиясида солиқ тизимига оид қатор вазифалар белгиланган. Солиқ қўмитасининг маълум қилишича, белгиланган вазифалар ижросини таъминлаш бўйича солиқ тўловчилар билан манзилли ишлашни ташкил қилиш орқали солиқ базасини кенгайтириш борасида тизимли ишлар амалга оширилмоқда. Бу фуқаролар елкасидаги солиқ юки янада оғирлашишига далолат қилади. Хабар давомида айтилишича, даромадларни ошириш бўйича кўрилаётган чора-тадбирлар натижасида ўтган йилнинг мос даврига нисбатан мол-мулк солиғи бўйича тушумлар 31 фоизга (+402 млрд. сўмга), ер солиғи 30 фоизга (+428 млрд. сўмга), ер қаъридан фойдаланганлик учун солиқ 20 фоизга (+718 млрд. сўмга), жисмоний шахслардан олинадиган даромад солиғи 17 фоизга (+1,1 трлн. сўмга) ўсди. Бу солиқ тизими капиталистик тузумнинг яроқсиз иқтисод низомидан келиб чиққан бўлиб, унда одамларга инсон сифатида эмас, балки даромад манбаи сифатида қаралади. Шунинг учун ҳар қандай инсон, у бой ёки камбағал бўлсин, солиққа тортилишга маҳкум. Ушбу солиқ системаси одамларни безиллатиб қўйгани сабабли ҳам “яширин иқтисод” пайдо бўлган ва у кенг ёйиляпти. Умуман олганда, ўзбек ҳукумати томонидан татбиқ қилинаётган солиқ системаси асосидан бошлаб шариатга зиддир. Яъни булар Аллоҳ ҳаром қилган солиқлардир. Пайғамбаримиз ﷺ бу ҳақида шундай дейдилар: “Солиқ йиғувчи жаннатга кирмайди”. Яна бошқа ҳадисда эса: “Мусулмоннинг моли мамнуният билан берсагина ҳалол бўлади”, – дедилар.
Хабар (daryo.uz 26.04.2024й): Ўзбекистонда таваккалчиликка асосланган ўйинларни ташкил этиш ва букмекерлик фаолиятини амалга оширишга рухсат этилади.
Изоҳ: Президентнинг “Лотереялар ва таваккалчиликка асосланган ўйинларни ташкил этиш ва ўтказишни тартибга солишни такомиллаштириш чора-тадбирлари тўғрисида”ги фармонига асосан 2025 йил 1 январдан бошлаб ушбу иш, яъни қимор ўйинларини ташкил қилиш мумкин бўлади. Фармонга кўра, бундай фаолият туридан 4% солиқ олинади ва ундан топилган даромадга солиқ солинмайди. Жамиятимиз шундоқ ҳам турли хил бузуқлик ва ёмон иллатларга кўмилиб бораётганига қарамай, ҳукумат Аллоҳ ҳаром қилган яна бир мункар ишга рухсат бермоқда. Шу ўринда, ҳукуматнинг ғайриисломий сиёсатини оқлашдан бошқасига ярамай қолган имом-домлалардан сўрагиси келади одамни. Хўш, бунга нима дейсизлар энди? Сизлар мусулмон халққа, у ҳалол, бу ҳаром дея уқтирмоқчи бўлаётган пайтингизда, ҳукумат қимор каби очиқдан-очиқ ҳаром ишларга рухсат берса ва бу мункарга сиз лом-мим демасангиз, яъни наҳй мункар қилмасангиз қолган гапингизнинг кимга таъсири бўлади? Ёки яна Ўзбекистон демократик давлат, бизда дин давлатдан ажратилган, деган важ-карсон билан қутулмоқчи бўласизларми?! Агар Аллоҳдан озгина қўрққанингизда эди, бу каби ботил қарор ва қонунларга, албатта, қарши чиққан бўлардингиз! Мусулмон халқимизга бош бўлиб, уни ҳукуматнинг бу ва бошқа ғайриисломий қонунларига қарши чиқишга ундаган бўлардингиз! Ҳайф сизларга илм ҳам, меҳроб ҳам демоқдан бошқа чора қолдирмаяпсиз. Ҳали бу бошланиши холос, агар аҳвол шу кетишда бўладиган бўлса, ҳукумат келгусида бундан-да жирканчроқ қарорлар чиқарса ажабланмаса ҳам бўлади. Ўзи аслида Аллоҳ ҳаром қилган нарсани ҳалол қилишдан-да улканроқ жиноят йўқ. Ҳукумат эса арзимас манфаатни, яъни қимордан олинадиган солиқ билан ғазнага солиқ тушумиини кўпайтиришни ёки хожаларини рози қилишни кўзлаб шу ишга қўл урди. Чунки Ғарб мустамлакачи давлатлар мусулмонлар жимиятида эркинлик, гендер тенглик каби лойиҳалар орқали бузуқлик, турли фисқ-фасодларнинг кенг ёйилишини кўзламоқда. Демак, ҳукумат бу қарорни қабул қилиш билан Аллоҳнинг ғазабини келтирадиган ва қолаверса, келгусида янада каттароқ муаммоларга олиб борадиган ишни қилди. Халқимиз бу ҳукуматни ҳам, унинг ҳар бир ишига чапак чаладиган “дин пешволари”ни ҳам яхши таниб олишлари лозим, токи Исломни ҳокимият тепасига олиб келмагунча бундай расвогарчиликларга чек қўйиб бўлмаслигини тушуниб етсинлар! Расулуллоҳ ﷺ шундай дедилар: “Сизлардан кимки бир мункарни кўрса, уни қўли билан ўзгартирсин. Агар бунга қодир бўлмаса, тили билан ўзгартиришга ҳаракат қилсин, бунга ҳам қодир бўлмаса, дили билан инкор этсин ва бу эса иймоннинг энг заифидир”.
Хабар (kun.uz 27.04.2024й): Марғилонлик Нуруллоҳ Мавлонов Қўқонда новвойчилик билан шуғулланувчи таниши ва бошқа шахсларнинг экстремистик оқимга аъзо экани, Ўзбекистонда ўта оғир жиноятларни содир этишга тайёргарлик кўраётгани ҳақида ёлғон маълумот берган. Судланувчи судда ушбу ёлғонни ўйлаб топишидан асосий мақсади қарзларидан қутулиш бўлганини билдирган.
Изоҳ: Маълумки, Каримов диктаторлиги давридаги МХХ номли хавфсизлик идораси омма-халқ қалбига шундай қўрқув солдики, унинг ишлаш принципи собиқ Совет Иттифоқидаги энг ёвуз ташкилот – КГБни эсга солиб юборарди. Бирор мафкурага эга бўлмаган Каримов бошлиқ ҳукумат халқни қўрқув асосида бошқарди ва бунда МХХ муҳим қурол бўлиб хизмат қилганди. МХХнинг энг жирканч услубларидан бири “қулоқ” тизими эди, яъни халқ ичидан чиққан ўта пасткаш ва озгина манфаат учун ҳар қандай ишга тайёр сотқинлардан фойдаланар эди. Ҳозирда ДХХга ўзгартирилган мазкур ташкилот, афтидан, бу жирканч услубдан ҳали ҳам воз кечмаган кўринади. Ҳозир ҳам давлат бирор мафкурани ушламаганлиги сабабли куч билан бошқаришга мажбур бўляпти ва табиийки, бунда ҳукумат ДХХнинг йиллар давомида орттирган “тажриба”сига таянмасдан бошқа иложи йўқ. Албатта, ушбу хабардаги ёлғон маълумот эвазига бирор манфаатга эришишни кўзлаган анави шахс ҳам бекорга ДХХга мурожаат қилмаган. Бўлиб ҳам бу маълумот экстремизм ва терроризм билан боғлиқ, яъни ДХХ учун энг қимматли маълумот ҳисобланади. Аллоҳ билади, қанчадан-қанча бегуноҳ одамлар мана шундай туҳмат ва ёлғонлар ортидан қамоқда ўтирибди экан. Халқни қўрқитиб бошқариш ва бунда хавфсизлик (жосуслик) тизимини асосий қуролга айлантириб олиш – ҳукуматнинг заифлигини, татбиқ қилаётган тузумининг адолатсиз эканлигини кўрсатади холос. Адолат йўқ жойда эса одатда ноҳақлик, зулм “тантана” қилади. Хусусан, ўз фуқаролари устидан жосуслик қилиш давлат учун қатъиян ҳаром қилинган ишдир. Зеро, у жамиятда одамларнинг ўзаро ва давлатга бўлган ишончига путур етказади. Ислом тузумини татбиқ қилиш билангина бундай жирканч ишларга бутунлай чек қўйилади. Миқдод ва Абу Умомадан ривоят қилинган ҳадисда Пайғамбар ﷺ шундай деганлар:
«إِنَّ الْأَمِيرَ إِذَا ابْتَغَى الرَّيْبَةَ مِنَ النَّاسِ أَفْسَدَهُمْ»
“Агар амир одамлардан шубҳа қидирса, уларни бузади”.
Ҳизб ут-Таҳрир Ўзбекистон матбуот бўлими аъзоси Форуқ
29.04.2024й
