بسم الله الرحمن الرحيم

Аллоҳнинг розилигини қачон истайсиз?!

Кимдир учун ҳаётнинг мазмуни ота онасини рози қилишда, ким учун фарзандининг бахту камолини кўришда, яна ким учун эса, дўсту биродарларининг хурсандлигида… Хуллас яшашдан мақсад қилиб олинган бундай истакларнинг саноғи кўп. Лекин бундай истакларнинг бирига интилган инсонлар бошқа ёқдан нималарнидир унутиб қўяётганини ва хатто кўп ҳолларда ўзи интилган мақсадга ҳам ета олмаётганини кўрамиз. Фикрлаб кўрайлик юқоридагиларнинг барчасига бирдек ёки буларга қўшимча бўлган бошқа истакларимизга ҳам ета олиш имконияти борми? Албатта, бу саволга жавоб бериш ҳамма учун ҳам оддий бўлган ҳолат эмас.

Келинг мана шу саволга жавоб бериш учун фикрлаб кўрсак. Ахир ҳаёт кечиришимиз учун, яшаш тарзимизни белгилашимиз учун маълум бир мақсад бўлиши керакку?! Бунинг учун аввало бу дунё ҳаётининг асл мазмунини англаб олишимиз шарт бўлади. Чунки, шундагина биз яшаш жараёнидаги баъзи иккиламчи мақсадларимизни умумий равишдаги, яшаш тарзимиз учун ғоя қилиб белгилаб олмаймиз.

Аввало биз “Қандай яшаябмиз” – деган, саволга жавоб бериб кўрайлик. Бугунги кунда бизнинг жамиятда қомус дея эътироф этиладиган, яшаш тарзимиздаги барча чегаралару муқаддас нарсаларни белгилашда асос сифатида танланган конституция деб аталмиш қонун қоидалар тўпламига нуқтаи назаримизни қаратайлик. Бу қонун қоидалар тўплами бизнинг ҳаётда бажарадиган амалларимиз чегарасини, бизнинг яшашдан мақсадимиз ва ғоямизни белгилашга яроқлими?! Бу қонун қоидалар яшаш тарзимизнинг асл мазмунини ифода эта оладими?! Шу қонун қоидаларни ўрганиб чиқиб ўзингизнинг қалбингиз хотиржам бўлган яшаш тарзини кўз олдингизга келтира олганмисиз?! Мана шу қонун қоидалар асосида яшаш асл инсонга хос яшаш тарзидир деб айта оласизми?! Бу қонун қоидалар сизнингча адолатли, фаровон ҳаётни қуришга тўғри дастур бўла оладими?! Биз бу саволларнинг барчасига “Йўқ” – дея жавоб берамиз. Чунки бу жавоб учун бизда асос етарли. Бу қонун қоидалар на адолатли ҳаётни шакллантиришимизда йўлланма бўла олади ва на инсоний бурч вазифаларимизни бажаришда дастур бўла олади.

Конституция деб аталмиш қомус сифатида эътироф қилинадиган қонун қоидаларнинг келиб чиқиш манбаси сизу бизга ўхшаган инсонларнинг ақли маҳсули хисобланади. Бу қонун қоидалар кимгадир манфаатли бўлгани учун адолатли бўлиб туюлса шу инсоннинг манфаатини амалга ошириш билан бир вақтда, шу қонун қоидалар орқали бошқа инсонларга зулм қилинаётганини кўришингиз мумкин. Бу қонун қоидалар чиқарилишида таъсир этиладиган бизга кўринмайдиган “Қўллар ва кучлар” ни эътиборга олмасакда, бу қонун қоидалар барча муаммоларимизнинг ҳар бирига етарли даржада ечим бера олаётганини кўрмаймиз. Яъни бу қонун қоидаларни ишлаб чиқишдаги инсонларни “адолатли” деб тасаввур қилганимизда ҳам уларнинг ақллари барча муаммоларимизга бирдек тўғри ечимни бера олмаслигини тан олишга мажбурмиз. Қолаверса “қомус” қилиб белгилаб олинган қонунлар мажмуаси инсонлар томонидан, айнан шу қонунлар мажмуасини татбиқ қилувчилар томонидан бир неча марта, бутун халқнинг кўз ўнгида бузилаётганига гувоҳ бўлиб турибмиз. Бу бузилишлардан кўришимиз мумкинки шу қонунлар мажмуасини татбиқ қилувчиларларнинг ўзлари уни яроқсизлигини исбот қилишди. Лекин улар ўзлари бемалол бузаётган яроқсиз қонунлар мажмуасини “қомус” дея халқни алдашда давом этишмоқда.

Чунки кўп марта такрорлаганимиздек инсоннинг ўзи ва шу жумладан унинг ақли ноқис, ожиз ва доимо ўзидан бошқа нарсаларга муҳтождир.  Яъни инсон ва унинг ақли мукаммал эмас. Демак, инсон ақлидан келиб чиқадиган қонунлар бизнинг муаммоларимизга мукаммал ечим бўла олмайди. Мукаммал бўлмаган ечимларни ўз муаммоларимиз учун ечим қилиб танлашимиз оқибатида, биз инсонлар бахтсизликка мубтало бўлишимиз аниқдир.

Муаммоларга мукаммал ечимлар Мукаммал Зот бўлган Аллоҳ Таъолонинг бизларга берган Ислом шариатида мавжуд. Аллоҳ Таъоло мукаммал, барча нарсани билгувчи Зотдир. Аллоҳ Таъолонинг мукаммал ечимлари орқали муаммоларимизни бартараф қилишимиз ва Унинг шариати орқали яшаш тарзимизни тартибга солишимиз бизларни албатта бахтли бўлишимизга, икки дунё саодатига эришимизга сабаб бўлади. Ислом шариати асосида яшашимиз Аллоҳ Таъолони рози қилади. Ислом тузуми бузулишларга йўл қўймайди ва у ўзгартиришларга муҳтож эмас. Чунки Ислом тузуми айтиб ўтганимиздек Мукаммал Зотнинг мукаммал тузумидир.

Юқоридагилардан хулоса қиладиган бўлсак, барча истак ва хоҳишларимизга етишда учрайдиган муаммолар учун адолатли ечим Исломда. Ҳамда бизнинг мақсадларимиз Исломга мувофиқ бўлар экан бундай мақсадлар Аллоҳ Таъолони рози қиладиган мақсадлар бўлиб хисобланади. Ва шу билан бирга Аллоҳнинг розилигига интилиб У Зотнинг шариати асосда яшашимиз юқорида айтиб ўтилган ҳаёт кечиришимиз асносидаги мақсадларимизга етишимизда ишончли йўлланма ва дастур бўла олади. Бунинг учун инсоннинг ақлидан келиб чиққан қонунлардан воз кечиб, Аллоҳ Таъолони рози қиладиган йўлдан, яъни Ислом йўлидан юришимиз шарт ва мусулмонлар учун бу йўлдан юриш вожибдир!

Ҳизб ут – Таҳрирнинг Ўзбекистондаги медиа офиси Абдуллоҳ

22.09.2016й.