Британия ва Франция Ливияга босқин қилишга ҳозирлик кўрмоқда
Роя газетаси:
Британия ва Франция Ливияга босқин қилишга ҳозирлик кўрмоқда
Британияда чиқадиган Телеграф газетаси ҳукуматдаги манбаларга таянган ҳолда, қуйидагича хабар тарқатди: «Исломий Давлат ташкилоти жангарилари Европани нишонга олиш мақсадида бутун Ўрта Ер денгизи қирғоқларидан янги бир қалъа сифатида фойдаланишлари мумкин деган хавотирлар сабабли Британия Ливияда ҳарбий амалиётлар олиб боради». Британия ташқи ишлар вазирлигининг Ўрта Шарқ масалалари бўйича вазири Тобиас Элвуд бундай деди: «Биз – Исломий Давлат ташкилоти бутун Ўрта Ер денгизи қирғоқлари бўйлаб ўрнашиб олиш учун қадам қўйган минтақаларда халқаро ҳамкорларимиз билан яқиндан иш олиб бормоқдамиз. Мақсадимиз, айни ташкилот жойлашган ерларни аниқлаш ва унга қарши кураш йўлларини белгилашдан иборат». Ливия Британиянинг навбатдаги ҳарбий аралашувига нишон бўлиши мумкинми, деган саволга ҳукуматдаги бир манба «Бу ишлар айнан шу йўналиш бўйича кетмоқда», деб жавоб берди.
Франция эса, Ливиядаги Исломий Давлат ташкилоти туғдираётган таҳдид кўламини аниқлаш учун у ерга ўз разведка самолётларини юборди. Бу ҳақда франциялик масъуллар баёнот берди. Франция бош вазири Мануэль Вальс «Исломий Давлат ташкилоти жангариларини йўқ қилиш учун олиб борилаётган халқаро саъй-ҳаракатларни Шимолий Африкага қадар кенгайтириш»га чақирди.
Роя газетаси шарҳи:
Британия билан Франциянинг бундай баёнот ва ҳаракатлари Схират битими имзолангани тўғрисида хабарлар тарқаган бир вақтда бўлмоқда. Триполидаги Умумий миллий конгресс билан Тобрукдаги Вакиллар палатаси ўртасида кутилмаганда имзоланган бу битим БМТнинг Тунисдаги вакили Бернардино Леоннинг истеъфоси ортидан амалга ошган эди. Америка Европа нуфузига зарба бериш ва ўз малайи Ҳафтарни кучайтириш учун шу собиқ вакилдан фойдаланишга уринган эди. Бироқ у қисқа фурсат мобайнида муваффақият қозонолди, холос. У ўз малайини мустаҳкамлаш ва инглизлар малайлари сафига ёриб киришда узоқ вақт давомида ютуққа эришолмади. Шунинг учун мана, инглизларнинг Триполи ва Тобрукдаги малайлари Америка ва унинг малайларига қарши яна битта фронтда туриб қаршилик кўрсатишни бошлашди. Бу эса икки томонни бирлаштирувчи бирлик ҳукуматини тузиш қайд этилган битимга имзо чекилганидан сўнг содир бўлди. Бинобарин, Ливиядаги европапараст гуруҳлар ўртасини бузиш учун Американинг ҳеч вақоси қолмади. У европаликларнинг Ливияда ҳукмрон бўлишига йўл қўймаслик учун фақатгина Исломий Давлат ташкилотидан фойдаланиши мумкин, холос. Шунинг учун Ливия устида Европа ҳукмронлигини тўлиқ қайта жорий қилиш мақсадида Британия ва Франция учун Исломий Давлат ташкилотига ҳарбий ҳужум қилиш тўғрисида ўйлаши зарур бўлиб қолди.
Шундай қилиб бугунги кунда мусулмонларнинг юртлари буюк кучлар ўртасидаги халқаро кураш саҳнаси ва босқин майдонига айланиб қолди. Бу кураш ва босқиннинг қурбони Исломий Уммат фарзандлари бўлмоқда. Агар ўз халқига душманлик қилиб, Уммат душманларини дўст тутган ва Умматни босқинчи мустамлакачиларга топшириб қўйган хоин, малай ҳукмдорлар гуруҳи бўлмаганида эди бундай бўлмаган бўларди.
Роя газетасининг 2015 йил 16 декабр чоршанба кунги 56-сонидан
