Геосиёсий майдонда ёшлар учун кураш

بِسْمِ اللهِ الرَّحْمٰنِ الرَّحِيمِ

Жорий йилнинг 9 сентябр куни Олий Мажлис Сенатининг Ёшлар, хотин-қизлар, маданият ва спорт масалалари қўмитаси ҳамда Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раислари Орзигул Козихонова ва Алишер Агзамходжаев Туркиянинг Адолат ва тараққиёт партияси раиси ўринбосари, партиянинг туркий давлатлар билан ҳамкорлик бошқармаси раҳбари Куршад Зорлу бошчилигидаги делегация билан учрашув ўтказди.

Мулоқот чоғида ёшлар сиёсати: таълим, маданият, волонтёрлик ва ёшлар лойиҳалари доирасида қўшма ташаббуслар ҳамда парламентлараро алоқаларни мустаҳкамлаш масалалари муҳокама қилинди.

Бир неча кун олдин эса, Франциянинг янги элчиси Валид Фуке Ўзбекистон ёшларига ўзбек тилида мурожаат йўллади. У янги ўқув йили муносабати билан француз тилининг аҳамиятини алоҳида таъкидлаб, Европа таълим ва маданий меросини ёшлар учун катта имконият сифатида кўрсатди.

Бу икки ташаббус орқали уларни ўзаро боғлайдиган умумий нуқта – ёшлар қатлами учун кураш – минтақа геосиёсий майдонида кучайганлиги яққол кўринади.

Анқаранинг туркий дунё ғояси орқали ўзини етакчи қилиб кўрсатишга уриниши Американинг геосиёсий мақсадлари билан уйғундир. Чунки Туркия Американинг минтақавий сиёсатини юритишда асосий шерик ҳисобланади.

Франция эса, Евроиттифоқнинг драйвери, унинг ташқи сиёсий йўналишлари кўпинча ЕИнинг геосиёсий манфаатлари ва стратегик мақсадларини ифодалайди.

Шунга қарамай, Америка ҳам, Европа ҳам Марказий Осиёда сиёсий Исломнинг кучайишидан чуқур хавотирда. Улар жуда яхши билишадики, агар ёшлар Ислом ғоялари билан қувватланса, ҳақиқий уйғониш сари ҳаракат вужудга келиб, минтақада Ғарбнинг таъсири сўнади, манфаатлари йўққа чиқади. Шу боис, улар ёшлар сиёсатини “юмшоқ куч” орқали олиб боради, жумладан:

– таълим дастурлари;

– тил ва маданият марказлари;

– ёшлар грантлари ва стипендиялари;

– турли маданий ва маърифий лойиҳалар.

Бу орқали ёшлар онгига секуляризм, демократия, миллий давлатчилик, либерализм ва индивидуализм каби бузуқ тушунчалар сингдирилади.

Марказий Осиёдаги мавжуд режимлар ёшларга аниқ ғоявий йўналиш бера олмаяпти. Миллатчилик, секуляризм ва модернизм ёшлар қалбидаги иймон ўрнини тўлдиришга қодир эмас. Шунинг учун Ғарб давлатлари ўз ғояларини сингдиришда ҳавойи нафсни тузоқ қилиб ишлатишга ҳаракат қилмоқда.

Маълумки, дунёдаги ҳар бир куч ёки цивилизация ўз келажагини ёшлар билан боғлайди. Чунки ёшлар – эртанги куннинг эгалари, ҳар қандай умматнинг стратегик ворисларидир.

Ўзбекистон аҳолисининг қарийб 60 фоизи 30 ёшгача бўлган ёшлардан иборат. Демографик омил эса мамлакат келажагини белгилайдиган асосий кучдир. Шу сабабли АҚШ, Европа, Россия каби геосиёсий кучлар турли дастур ва ташаббуслар орқали ёшлар онгини эгаллашга ҳаракат қилмоқда. Чунки кимнинг ғояси ёшлар онгини эгалласа, келажакда минтақадаги сиёсий майдон ҳам шу ғоя асосида шаклланади.

Шу боисдан агар бугун ёшлар онги Ғарбнинг секуляр ғоялари билан тўлдирилса, эртанги элита ҳам Ғарб манфаатларига хизмат қиладиган бўлади. Агар улар Ислом ғоялари билан тарбияланса, эртанги элита Уммат манфаатларини ҳимоя қилади.

Эрдўғон ҳукумати ўзини қардош давлат сифатида кўрсатишга уриниб, “туркийлик” ғоясини ёшлар онгига сингдирмоқчи. Бироқ бу ғоя мустамлакачи Ғарб томонидан ишлаб чиқилган бўлиб, Умматни миллатчилик асосида парчалаш ва “парчалаб ташлаб, ҳукмронлик қил” қоидасининг амалий  йўлидир. Зеро, Ислом миллат ёки ирққа асосланмайди. Умматнинг ягона асоси – Ислом ақидасидир. Шу боис, “туркийлик” ғояси Умматнинг ҳақиқий бирлигини заифлаштиради ва Ғарб манфаатларига хизмат қилади.

Ягона тўғри ечим эса, ёшларни Ислом ақидаси асосида тарбиялаш ва уларни Аллоҳнинг қонунларига мувофиқ ҳаётга тайёрлашдир. Шундагина Уммат ўз тақдирини ўзи ҳал қилади ва геосиёсий рақобатда Ғарбнинг таъсиридан озод бўлади.

Пайғамбаримиз ﷺ ёшларга катта аҳамият берганлар, уларни буюк масъулиятларга яроқли қилиб тарбиялаганлар. Масалан, Усома ибн Зайд розияллоҳу анҳу 18 ёшида армия қўмондони бўлган, Муъоз ибн Жабал розияллоҳу анҳу эса, ёшлигидаёқ илм ва ҳукмда етакчи бўлган.

Аллоҳнинг Росули ﷺ мана шундай кучли шахсиялар билан Мадинада Ислом давлатини барпо қилдилар ва Исломни оламий Рисолат сифатида дунё аҳлига ёйдилар.

Иззатуллоҳ

15.09.2025й

0

0