Ҳукумат аҳолини энергия ресурсларини тежашга тарғиб қилиш билан бу соҳадаги муаммоларни халқ бўйнига қўйишга уринмоқда

بِسْمِ اللهِ الرَّحْمٰنِ الرَّحِيم

Хабар: Ўзбекистондаги ҳар бир хонадон бир йилда 400 кВт/соат, республика бўйича эса 2,8 млрд кВт/соат электр энергияни тежаш мумкин. Энергетика вазирлиги аҳолини тежамкорликка чақирувчи видеоролик эълон қилди.

Статистик маълумотларга кўра, дунёда энергия истеъмолининг 23 фоизи хусусий турар жой фондига тўғри келса, Ўзбекистонда бу рақам 40 фоизни ташкил этмоқда. Вазирлик Ахборот хизмати раҳбари Сабина Бекмуродованинг маълум қилишича, Европада 1 квадрат метр учун энергия истеъмоли йилига 120-150 кВт/соат бўлса, Ўзбекистонда шу майдон учун кўрсаткич 390 кВт/соатдан ошмоқда. Таъкидланишича, энергиядан самарали фойдаланиш йўлга қўйилмас экан, энергия манбаларини ишлаб чиқариш қанчалик кўпайтирилмасин, ортиб бораётган талабни таъминлаш мушкул вазифа бўлиб қолади. (kun.uz, 29.09.2021й)

Изоҳ: Энергия тежамкорлиги борасидаги тарғибот ишлари куз-қиш мавсумининг совуқ кунлари бошланиши арафасида янграётгани бу йил ҳам – ҳар йили бўлаётганидек – табиий газ, электр энергиясининг тақчил бўлишидан дарак беряпти. Ҳозирги ҳукумат Каримов даврида сунъий равишда пайдо қилинган энергетика кризисини ҳал қила олмаяпти. Ўзининг омадсиз бошқарувини оқлаш учун халқни энергияни тежашга тарғиб қиляпти. Худдики ҳукумат аҳолининг энергияга бўлган эҳтиёжини тўлиқ қондириб қўйгану, халқ ҳаддан ортиқ истеъмол қилаётганидек. Агар ҳукуматнинг озгина инсофи бўлганида, ҳеч бўлмаганда ўзининг ёмон бошқарувини тан олган ва шу пайтгача одамларга ўзининг айби билан етказилган ноқулайликлар, қишнинг совуқ кунларида музлаб ўлган гўдаклар, миллионлаган одамларнинг шам ёқиб ўтказган кечалари, совуқдан тишлари такиллаб ўтказган тунлари… учун кечирим сўраган бўларди. Ҳа, буларнинг барчаси учун жавобгарлик айнан сиз – Ўзбекистондаги ҳокимият эгалари бўйнига тушади.

Ҳукуматнинг бундай тарғиботлари ҳар бир ақли расо инсоннинг ғазабини келтириши табиий ҳолдир. Ахир, бу халқ устидан ҳеч тап тортмай ва уялмай кулишдан бошқа нарса эмас. Зеро, Ўзбекистонда энергия манбалари борасида ҳеч қандай муаммо йўқлигига қарамай, у ҳалигача энергетик кризисдан чиқа олмаяпти. Бу худди гулхан олдида ўтирган одамнинг совқотиб ўтиришига ўхшайди, олов бору, лекин ундан фойда йўқ. Агар ҳукумат ҳақиқатдан ҳам одамлар манфаатини кўзлаб иш юритганида тезлик билан бу муаммонинг тўғри ечимини топган бўларди. Чунки муаммонинг ечими бор ва у Ислом шариатида батафсил баён қилиб берилган. Фақат у ечимни қабул қилиб, татбиқ қилиш лозим. Бироқ динни ҳаётдан ажратиш асосига қурилган тузумда бу ечимга ўрин йўқ.

Мусулмонлар ўз бошларидаги азоб-уқубатларнинг бош сабабчиси мана шу чирик тузум татбиқи эканлигини тушуниб етишлари лозим. Айниқса, энергетика соҳасидаги муаммоларнинг охири кўринмай қолганидан умидсизликка тушиб қолишингизнинг, совуқ кунлар бошланиши билан юрагингиз безиллашининг, қорли-изғиринли кунлар қаршисида ҳеч қандай ёрдамсиз бир ўзингиз курашишингизнинг… бош сабабчиси ҳам мана шу тузумдир. Чунки мана шу тузум татбиқи натижасида етиб ортиб қоладиган электр, табиий газ каби бойликларимиз бир ҳовуч жиноятчи ҳокимият эгалари орасида тақсимланиб кетяпти. Агар иложи бўлганда бу жиноятчилар сизга 1 куб метр газ, 1 кВ электрни ҳам раво кўрмаган бўлардилар. Улар агар сизга бирор нарса беришаётган бўлса, уни ўлиб қолмаслигингиз учун беришмоқда, раҳмилари келаётганидан эмас.

Бу борада Исломдагина тўғри ечим бор. Унга кўра, электр, табиий газ, ичимлик суви каби бойликлар умумий мулк ҳисобланади. Ислом тузумида уларни хусусийлаштириш ва талон-тарож қилишга, шунингдек чет эл компанияларига арзонгаровга сотиб юборишга йўл қўйилмайди. Бу бойликлар умматга тақсимлаб берилади, ортиб қолса сотиб уммат манфаатлари йўлида сарфланади. Ҳатто Ислом давлатининг энг чеккасида яшайдиган одамларнинг ҳаққи ҳам етказиб берилади. Исломда аҳолини энергия билан таъминлашнинг қисқача тафсилоти мана шу. Шунга кўра, бу соҳадаги муаммоларга барҳам бериш учун Ислом қонунлари татбиқ бўлишига ўта муҳтожмиз.

Ҳизб ут-Таҳрирнинг Ўзбекистондаги матбуот бўлими аъзоси Фаррух      

06.10.2021й