ЛАЪНАТЛАШИШ
ЛАЪНАТЛАШИШ
(“Исломда ижтимоий алоқалар” туркумидан)
(1)
بِسْمِ اللهِ الرَّحْمٰنِ الرَّحِيم
Лаънатлашиш – лаънат сўзидан олинган. Зеро, эр-хотиннинг ҳар бири ўзининг бешинчи гувоҳлигида агар ёлғончи бўлса, ўзига лаънат бўлишини айтади. Аллоҳ Таолонинг қуйидаги ояти бунга асосдир. Аллоҳ Таоло дейди:
وَالَّذِينَ يَرْمُونَ أَزْوَاجَهُمْ وَلَمْ يَكُنْ لَهُمْ شُهَدَاءُ إِلاِّ أَنفُسُهُمْ فَشَهَادَةُ أَحَدِهِمْ أَرْبَعُ شَهَادَاتٍ بِاللَّهِ إِنَّهُ لَمِنَ الصَّادِقِينَ+ وَالْخَامِسَةُ أَنَّ لَعْنَةَ اللَّهِ عَلَيْهِ إِنْ كَانَ مِنَ الْكَاذِبِينَ+ وَيَدْرَأُ عَنْهَا الْعَذَابَ أَنْ تَشْهَدَ أَرْبَعَ شَهَادَاتٍ بِاللَّهِ إِنَّهُ لَمِنَ الْكَاذِبِينَ+ وَالْخَامِسَةَ أَنَّ غَضَبَ اللَّهِ عَلَيْهَا إِنْ كَانَ مِنَ الصَّادِقِينَ
– “Ўзларидан бошқа гувоҳлари бўлмаган ҳолида ўз хотинларини (бузуқ деб) бадном қиладиган кимсалар – уларнинг ҳар бири ўзини, шак-шубҳасиз, ростгўйлардан, деб Аллоҳ номига тўрт марта гувоҳлик бериши (вожибдир). (У эрнинг) бешинчи (гувоҳлиги эса) агар ёлғончилардан бўлса, устига Аллоҳнинг лаънати (тушишини сўрамоқлигидир). У (аёлдан) азоб-жазони: У (яъни эри), шак-шубҳасиз, ёлғончилардан, деб Аллоҳ номига тўрт марта гувоҳлик бериши даф қилур. У (аёлнинг) бешинчи (гувоҳлиги эса) агар эри ростгўйлардан бўлса, ўзининг устига Аллоҳнинг ғазаби (тушишини сўрамоқлигидир)”. (Нур:6-9)
Ибн Аббос р.а.дан Абу Довуд ривоят қилади: «Аллоҳ тавбаларини қабул қилган уч саҳобанинг бири бўлган Ҳилол ибн Умайя кечқурун экинзордан қайтганда хотини ҳузурида бир эркак борлигини сезди. Улар қилаётган ишни ўз кўзи билан кўриб, қулоғи билан эшитди. Тонг отгунга қадар уни (эркакни) қўзғатмади. Сўнг Расулуллоҳﷺ нинг ҳузурларига бориб деди:
«يا رسول الله, إني جئت أهلي فوجدت عندهم رجلاً فرأيت بعيني وسمعت بأذني فكره رسول الله ما جاء به, واشتدت عليه فنزلت }وَالَّذِينَ يَرْمُونَ أَزْوَاجَهُمْ وَلَمْ يَكُنْ لَهُمْ شُهَدَاءُ إِلاِّ أَنفُسُهُمْ فَشَهَادَةُ أَحَدِهِمْ{»
«Эй Расулуллоҳ, оиламга келиб, унинг ҳузурида бир эркакни топдим. Ўз кўзим билан кўриб, қулоғим билан эшитдим». Расулуллоҳﷺ у келтирган хабарни ёқтирмадилар. У (Ҳилол) қийин аҳволга тушиб қолди. Шунда оят нозил бўлди». Аллоҳ Таоло деди: “Ўзларидан бошқа гувоҳлари бўлмаган ҳолида ўз хотинларини (бузуқ деб) бадном қиладиган кимсалар – уларнинг ҳар бири ўзини, шак—шубҳасиз, ростгўйлардан, деб Аллоҳ номига тўрт марта гувоҳлик бериши (вожибдир)”. (Нур:6) Сўнг Расулуллоҳﷺ енгил тортиб дедилар:
«أبشر يا هلال قد جعل الله لك فرجاً ومخرجاً. قال هلال: قد كنت أرجو ذلك من ربي تبارك وتعالى. فقال رسول الله r أرسلوا إليها. فأرسلوا إليها. فتلاها عليها رسول الله r وذكّرهما وأخبرهما أن عذاب الآخرة أشد من عذاب الدنيا. فقال هلال والله لقد صدقت عليها. فقالت كذب. فقال رسول الله r: لاعنوا بينهما»
«Эй Ҳилол, хурсанд бўл! Аллоҳ сенга шодлик ва енгиллик берди». Ҳилол деди: «Раббим Таборака ва Таолодан ҳақиқатда шуни умид қилгандим». Расулуллоҳﷺ дедилар: «Уни (Ҳилолнинг хотинини) олдимга юборинглар». Уни олиб келдилар. Расулуллоҳﷺ унга оятларни тиловат қилдилар. Уларни огоҳлантирдилар ва охират азоби дунё азобидан қаттиқ, оғир эканлиги ҳақида уларни хабардор қилдилар. Ҳилол деди: «Худо ҳаққи, мен рост гапирдим». Хотини деди: «Ёлғон гапирди». Расулуллоҳﷺ дедилар: «Уларни бир-бирларига лаънат айттиринглар». Ҳилолга «Гувоҳлик бер», дейилди. У ўзининг ростгўйлардан эканлиги ҳақида Аллоҳ номига тўрт марта гувоҳлик берди. Бешинчисига келганда Ҳилолга айтилдики: «Эй Ҳилол, Аллоҳдан қўрқ. Дунё азоби охират азобидан енгилдир. Бу иш сенга азобни вожиб қилиб қўяди». У деди: «Аллоҳ бу иш туфайли дарралатмагани каби бу иш учун мени азобламайди ҳам». Сўнг бешинчи гувоҳлигида, агар ёлғончилардан бўлса, ўзига Аллоҳнинг лаънати бўлишини айтиб, гувоҳлик берди. Кейин унинг хотинига «Гувоҳлик бер», дейилди. У эрини ёлғончилардан, деб Аллоҳ номига тўрт марта гувоҳлик берди. Бешинчисида эса, унга айтилдики: «Аллоҳдан қўрқ. Дунё азоби охират азобидан енгилдир. Бу иш сенга азобни вожиб қилиб қўяди». У бирпас жим қолди. Сўнг: «Худо ҳаққи қавмимни шарманда қилмайман», деб бешинчи гувоҳлигида агар эри ростгўйлардан бўлса, ўзига Аллоҳнинг ғазаби бўлишини айтиб гувоҳлик берди. Шундан кейин Расулуллоҳﷺ уларни бир-биридан ажратдилар ва эр бу хотинга уй ва озиқ-овқат бермайди, деб ҳукм чиқардилар».
Ҳизб ут-Таҳрирнинг Ўзбекистондаги медиа офиси
17.11.2020й
