Мусулмон амали билан асл мусулмон бўлади
بسم الله الرحمن الرحيم
Мусулмон амали билан асл мусулмон бўлади
Моддий манфаат учун ота боласини, бола отасини ёки онасини ўлдирган, жинсий иштиёқини қондириш мақсадида ака синглисини зўрлаган ва бундан бошқа кўплаб жирканч ишлар кофир юртлар тугул мусулмонлар яшаётган юртларда ҳам содир бўлмоқда. Бу воқелик инкор қилиб бўлмайдиган ҳақиқат экани ҳаммага маълум.
Биз содир бўлаётган ушбу жирканч ишларни бирма-бир санаб ўтмоқчи эмасмиз. Бизни қайғуга солаётгани номи мусулмон бўлганлардан ҳатто ҳайвонлар ҳам қилмайдиган амаллар содир этилаётганидир.
Масалан, оташпарастлар деганда ўтга сиғинувчиларни, буддистлар деганда будда ҳайкалига сиғинувчиларни тушунганимиздек, мусулмонлар деганда ҳам ягона Аллоҳга иймон келтирган, Муҳаммад с.а.в. ни Аллоҳнинг Росули деб биладиган, маъруф амалларни қиладиган, мункар ишлардан тийиладиган, гуноҳ қилса дарҳол истиғфор айтиб, тавба қиладиган инсонлар деб тушунамиз. Бироқ бугунги воқеликдаги аксар мусулмонларда мусулмонликнинг воқеси топилмайди. Қуруқ ном ҳеч қачон амалларга таъсир қилмайди, мисол футбол билан профессионал даражада шуғулланмаганларни йиғиб бирор-бир машҳур футбол жамоасини номи билан номлаб қўйсангиз, у жамоа қуруқ номга эга бўлиши мумкин, бироқ номга яраша ўйин кўрсата олмайди. Худди шунингдек мусулмон деган номгагина эга бўлишни амалларга таъсири бўлмайди.
Сайтимизда чиқаётган кўплаб мақолаларимизда инсонларнинг амалларига уларнинг тушунчалари таъсир кўрсатишини, ҳаётлари тубдан ўзгариши учун уларнинг тушунчалари ўзгариши зарурлигини, тушунчаларни ўзгартиришнинг ягона йўли дунё ҳаёти ҳақида фикр бериш билан бўлиши тўғрисида айтиб ўтганмиз. Шунинг учун ҳақиқий мусулмон бўлиш учун қуруқ номга эга бўлиш эмас, балки тушунчаларнинг Ислом ақидаси асосида шаклланиши билан амалга ошади.
Ҳизб ут—Таҳрирнинг Ўзбекистондаги медиа офиси масъули Умар.
14.12.2018
