Матбуот баёноти

Нью-Йоркдаги партия ички сайловларида мусулмон номзоднинг ғалабаси ва унинг сиёсий оқибатлари таҳлили

“Яманиюн” сайти “Фаластинлик муслима (аёл) Нью-Йорк штати Сенатига Демократик партиядан номзодликни қўлга киритди” сарлавҳаси остида қуйидаги хабарни эълон қилди:

“Асли фаластинлик бўлган америкалик Абир Қаввас Нью-Йорк штати Сенатидаги Квинс округи 12-сайлов ҳавзаси учун Демократик партия ичида ўтказилган дастлабки сайловларда ғалаба қозонди. Бу кўрсаткич Қўшма Штатлардаги араб ва фаластинлик жамоалар вакиллари учун янги сиёсий ютуқ сифатида қайд этилди. Қаввас Нью-Йорк шаҳридаги фаол ижтимоий фаолияти билан танилган бўлиб, ушбу ғалаба унга шу йилнинг ноябрь ойида бўлиб ўтиши режалаштирилган умумий сайловлар эшигини очди”.

Ушбу хабар ва унда тилга олинган воқеа ўз ичига кўплаб зиддиятларни жамлаганки, уларни Пайғамбар ﷺнинг оқ билан қора аралашиб кетадиган ва мезонлар ағдар-тўнтар бўладиган даврда инсонлар бошига келувчи “алдамчи йиллар” ҳақида айтган ҳадисларидан бошқа нарса билан изоҳлаб бўлмайди. Ишларни ўз ўрнига қўйиш ва Америкадаги мусулмонлар учун бу борада чигал бўлиб қолган масалаларга ойдинлик киритиш мақсадида қуйидагиларни баён қиламиз:

Биринчидан: Модомики хабар “мусулмон аёл” деган сўз билан бошланган экан, демак, номзод Аллоҳга ва охират кунига иймон келтирган. Бу иймоннинг тақозоси эса етказишдир, яъни Ислом рисолатини бутун инсониятга етказишдир. Зеро, Аллоҳ субҳанаҳу ва таолонинг пайғамбари Муҳаммад ﷺ га қилган хитоби У зотнинг умматига ҳам тегишлидир. Аллоҳ таоло айтади:

﴿وَمَا أَرْسَلْنَاكَ إِلَّا كَافَّةً لِلنَّاسِ بَشِيراً وَنَذِيراً وَلَكِنَّ أَكْثَرَ النَّاسِ لَا يَعْلَمُونَ﴾

 «(Эй Муҳаммад), Биз сизни бутун инсониятга фақат хушхабар берувчи ва огоҳлантирувчи қилиб юбордик, лекин одамларнинг кўпи билмайдилар» (Саба: 28).

Мусулмоннинг вазифаси инсонлар томонидан жорий этилган тузумлар ва адолатсиз қонунлар соясида ҳаёт машаққатларини чекаётган кофирларнинг турмуш тарзига сингиб кетиш эмас! Балки мусулмонлар — инсониятни инсонлар томонидан тузилган тузум ва қонунлар зулматидан Исломнинг нури ва адолатига олиб чиқиш учун масъул бўлган олийжаноб рисолат соҳиблари ва улуғ Ислом даъватчиларидир. Улар мана шу орқали Аллоҳнинг жаннатдаги неъматларига лойиқ бўладилар ва дўзах азобидан қутуладилар. Бу дунёдаги мусулмоннинг, хусусан, ғайриисломий муҳитда — Ғарб ўлкаларида яшаётган мусулмонларнинг вазифаси айнан мана шундан иборатдир.

Ғайридинлар орасида яшаётган мусулмонлар шуни билишлари лозимки, бу ўлкаларда гўзал тарзда истиқомат қилиш, у ернинг аҳолисига ўзларидаги энг яхши нарсани — улуғ Ислом динини тақдим этишни тақозо қилади. Мана шундагина мусулмон киши, баъзилар ўйлаганидек, жамиятдан ажралган ёки пассив эмас, балки ушбу жамиятда фаол (ижобий) шахсга айланади. Шу билан бирга, уларнинг динини, турмуш тарзини, инсон қўли билан яратилган ҳамда оддий халқ ҳисобига капиталист элета манфаатларини кўзлайдиган қонун ва конституцияларини тан олмайди ва маъқулламайди.

Иккинчидан: Хабарда ғолибнинг фаластинлик муслима экани айтилган ва бу ғалати бир зиддиятдир. Зеро, Фаластин мусулмонларини ўз ватанларини ташлаб чиқишга ва Америкада истиқомат қилишга мажбур қилган омил — Ғарбнинг, хусусан, Америка ва Британиянинг уларга қарши тил бириктириши ҳамда ушбу Муборак Заминга ҳеч қандай ҳаққи ва алоқаси бўлмаган бир халқни жойлаштириши эканини ҳамма яхши билади.

Американинг Фаластин масаласидаги позицияси унинг ички ва халқаро миқёсда, жумладан, Исломий ўлкалар ва Муборак Фаластин заминида мустамлакачилик (колониализм) устига қурилган давлат эканини яққол тасдиқлайди. Бундан ташқари, Ғазодаги мусулмонларнинг қони ҳануз қуригани йўқ, Америка эса ўша пок заминдаги бегуноҳ биродарларимизни қирғин қилаётган яҳудий вужудини турли хилдаги ҳалокатли қурол-яроғлар билан таъминлашни бир лаҳза ҳам тўхтатгани йўқ. Шундай экан, бирор-бир мусулмон мустамлакачининг конституцияси, қонунлари ва мустамлакачилик сиёсатини қабул қилиш орқали ўз ватанини мустамлака қилишда ўша босқинчига шерик бўлишни раво кўрадими, асло…?!

Учинчидан: Бирор мусулмоннинг қандайдир ҳукумат лавозимига эришишини байрам қилиш ва хабарда айтилганидек, буни “Америкадаги араб ва фаластинлик жамоалар вакиллари учун янги сиёсий ютуқ” деб баҳолаш ботил (асоссиз) хурсандчиликдир. Чунки, мустамлакачи сиёсий тузумларда иштирок этиш сиёсий ютуқ эмас, балки биз дўстлашишга буюрилмаган кимсаларга қарамлик ва дўстлик (вало) изҳор қилишдир.

Ҳабашистонга ҳижрат қилган улуғ саҳобаларнинг хулқ-атворида биз учун гўзал намуна бор. Улар Қурайш кофирларининг зулмидан қочиб, ҳузурида ҳеч кимга зулм қилинмайдиган подшоҳ (Нажоший)дан паноҳ излаб Ҳабашистонга борганларида, у подшоҳга ҳам, унинг роҳибларига ҳам дўстлик ва содиқлик изҳор қилмадилар. Аксинча, Жаъфар ибн Абу Толиб розияллоҳу анҳунинг улар билан қилган мунозараси саҳобаларнинг ҳақиқий рисолат соҳиблари бўлганига ва Аллоҳ йўлида маломатчининг маломатидан қўрқмаганликларига энг катта далилдир. Улар ўзларини ҳимоя қилаётган подшоҳнинг ҳузурида турган бўлсалар-да, бу ҳолат уларни саййидимиз Исо алайҳиссалом ҳақида ҳақ сўзни айтишдан тўсиб қолмади, ваҳоланки, улар айтган ҳақиқат подшоҳнинг эътиқодига зид эди.

Тўртинчидан: Ушбу ўлкаларда яшаётган ҳар бир мусулмон, хусусан, фаоллар, уламолар ва зиёлилар улуғ Ислом рисолатини етказишда ўз бурчига амал қилган ҳолда, Исломни муқобил бир цивилизация сифатида тақдим этишлари лозим. Бу – Аллоҳ таолонинг қуйидаги сўзига мувофиқдир. Аллоҳ таоло айтади:

﴿ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ وَجَادِلْهُمْ بِالَّتِي هِيَ أَحْسَنُ إِنَّ رَبَّكَ هُوَ أَعْلَمُ بِمَنْ ضَلَّ عَنْ

سَبِيلِهِ وَهُوَ أَعْلَمُ بِالْمُهْتَدِينَ﴾

 «(Эй Муҳаммад), Парвардигорингизнинг йўлига (динига) ҳикмат ва чиройли панд-насиҳат билан даъват қилинг ҳамда улар билан энг гўзал услубда мунозара олиб боринг! Албатта, Парвардигорингиз Ўз йўлидан адашган кимсаларни жуда яхши билувчидир ва У ҳидоят топгувчиларни ҳам жуда яхши билувчидир» (Наҳл: 125-оят)

 Шунингдек, бу – Ҳабашистонда истиқомат қилган саҳобаларга эргашиш демакдир. Унинг ҳузурида зулум қилинмайдиган одил подшоҳ Ҳабашистон Нажошийси билан мустамлакачилиги ва ваҳшийлиги билан бирор-бир Исломий ўлка омон қолмаган Американинг капиталист мустамлакачи ҳукмдорлари ўртасидаги катта фарқни инобатга олиш лозим.

Мусулмон киши одамларни даъват қиладиган энг яхши нарса — бу улуғ Исломга иймон келтириш ва унинг аҳкомларини ҳаётнинг мукаммал низоми сифатида, Аллоҳ нозил қилган қонунлар билан ҳукм юритадиган сиёсий вужудда татбиқ этиш учун ҳаракат қилишдир. Зеро, Исломдаги бошқарув низомигина ирқчилик ва табақаланишга барҳам беради ҳамда барча инсонлар ўртасида ҳақиқий адолат ва тенгликни таъминлай олади.

Ҳизб ут-Таҳрирнинг Америкадаги матбуот бўлими