بِسْمِ اللهِ الرَّحْمنِ الرَّحِيمِ 

Роя газетаси:

Роҳинга мусулмонлари ноласига қулоқ тутиб, ёрдам берувчи Мўтасимлар борми?!

«Ал-Ваъй» журналининг 1438 йил зул-ҳижжа, милодий 2017 йил сентябрдаги 371-сонида қуйидаги хабар чоп этилди:

«Янги фалокатлар юз бергани сари мусулмонлар халифага қанчалик муҳтож эканликларини тушунмоқдалар. Чунки халифа уларнинг очларини тўйдиради, етимларини ўз кафолатига олади, қувғинга учраганларига бошпана бериб, уларни озордан ҳимоя қилади. Росулуллоҳ САВ бундай марҳамат қилганлар:

»الإِمَامُ جُنَّةٌ يُقَاتَلُ مِنْ وَرَائِهِ وَيُتَّقَي بِهِ«

«Халифа қалқондир, унинг ортида туриб жанг қилинади ва у билан ҳимояланилади» (Имом Муслим ривояти). Биз буни эслатганмиз ва бутун дунё Бирма ҳукумати жиноятлари билан тўлиб тошганидан кейин яна эслатмоқдамиз. БМТ манбаларига кўра, Бирма ҳукумати Роҳинга мусулмонларига нисбатан том маънода этник тозалашни амалга оширмоқда. Қолаверса, Бирлашган Миллатлар Ташкилоти «Роҳинга мусулмонлари дунёда энг кўп қувғинга учраган халқ» деб таъкидлади. Шунингдек, халқаро ҳисоботларга кўра, улар дунёда қирилиб кетиш хавфи кучли бўлган озчилик халқлардандир.

Шундай қилиб биз оғир, аянчли аҳволда қолдик. Бирма ҳукумати томонидан қони тўкилаётган, қувғинга учраган Аракандаги диндошларимиз кўз ёш тўкиб нола қилмоқда. Фаластинда мусулмонларнинг муқаддас жойлари босиб олинмоқда. Сурия, Ироқ, Афғонистон, Ливия ва Яман вайрон қилинмоқда. Ғарбдаги мусулмонларни кофирларга аралашиб сингиб кетишга, дини ва Умматидан воз кечишга мажбурлаш учун уларга босим қилинмоқда. Бу ҳолат, жиддий ва шу билан бирга тақдирий масалага боғлиқ қуйидагича саволларни пайдо қилади:

Бутун дунёдаги мусулмонларни ҳимоя қилишга ким жавобгар? Нима учун бутун дунё мусулмонларга ёрдам бериш у ёқда турсин уларнинг нолаларини ҳеч ким эшитмаяпти? Хавфсизлик кенгаши қадр-қимматга эга бўлган бирор давлат озгина озорга дуч келиб қолса ҳам фавқулодда йиғилиш ўтказиб шошилинч чоралар кўради-ю, нега энди мусулмонлар фожеалари қаршисида бу кенгаш сукут сақламоқда? Энди энг муҳим савол, Исломий ҳамкорлик ташкилотидаги 57та «исломий давлат» бутун дунёда мусулмонлар дучор бўлаётган зулмларга нега қарши чиқа олмайди?

Покистон, Индонезия, Туркия, Малайзия, Миср, Эрон, Бангладеш ва булардан бошқа давлатлардаги кучли армиялар мусулмонлар масаласи олдида нега ўз вазифасини бажармайди ва Умматни қуршаб турган душманларга нега қарши чиқмайди? Кўрфаз, Амирликлар подшоҳлари Америка ва Европани рози қилиш учун юз миллиардлаб долларларни сарфлашади-ю нега энди улар мусулмонлар масаласига бахиллик қилишади, қолаверса уларга қарши тил бириктиришади? Ҳатто улардан бирортаси Бирма билан дипломатик ва иқтисодий алоқаларни узишни эълон қилишга ҳам журъат қилиша олмади. Бироқ, динини сотган, динига даъват қилувчиларни қамоққа олган ва динини барпо қилишга ҳаракат қилувчиларга аёвсиз уруш очган ҳокимдан буни кутишимиз мантиқданми? Ҳа, улар буни қандай қила олсин. Уларнинг қалблари ҳар хил, мақсадлари турлича ва хоҳиш-истаклари Ғарбга қараб интилади. Чунки Ғарб уларнинг қалбини эгаллашдан олдин тахтларини эгаллаб олган.

Шунинг учун очиқ бир ҳақиқат олдида тўхтаб ўтиш лозим. Бу ҳақиқат шуки, биз шундай бир оламда яшаяпмизки бу олам кучсизни тан олмайди ва уни ҳурмат қилмайди. Сўнгги асрларда пайдо бўлган халқаро тизим ҳам заифларни йўқ қилиб кучлиларни ҳимоя қилиш учун дунёга келган. Усмоний Халифалик вайроналари устида бу халқаро тизим дунёга келтирган давлатлар сохта давлатлар бўлиб улар мусулмонларни эксплуатация қилиш ва бойликларини тортиб олиш учун дунёга келтирилган. Шунинг учун мусулмонлар буларнинг бирортасидан ёрдам кутмасликлари лозим. Чунки БМТ ҳам уларга қарши, хавфсизлик кенгаши мусулмонлар хавфсизлигини издан чиқариб уларнинг ҳукмронлигини тортиб олди. Анави рувайбиза ҳокимлар эса, ўз хожасига қуллик қилувчи малайлардир.

Умматнинг нажоти Халифалик қайта тикланиши билан бўлади. Чунки Халифалик мусулмонлар бирлигини қайта тиклаб уларнинг кучларини бирлаштиради ва бутун дунёдаги мусулмонларни ва заифҳолларни ҳимоя қилишни ўз зиммасига олади.

Роя газетасининг 2017 йил 18 октябр чоршанба кунги 152-сонидан