Россияда миграция ходими патент сўраб келган ўзбекистонлик йигитга куч ишлатди

بِسْمِ اللهِ الرَّحْمٰنِ الرَّحِيم

Хабар: Интернетда тарқалган видеода Россия миграция хизмати ходими ҳужжат расмийлаштириш жараёнида муҳожир йигитнинг кўкрагига тирсаги билан зарба бермоқчи бўлгандек қўрқитгани ва унга нисбатан бошқа қўпол ҳаракатлар қилганини кўриш мумкин.

Видеодан кўринишича, муҳожир йигит ноинсоний ҳаракат қилган ходимга жавоб қайтармаган, патент олиш учун зарур биометрик маълумотларни хотиржам тарзда тақдим этган.

Ўзбекистон Ташқи меҳнат миграцияси агентлигининг маълум қилишича, видеодаги ҳодиса 28 июнда Воронеж шаҳридаги миграция марказида рўй берган. Воқеани Ўзбекистон фуқароси М.И. тасвирга олган ва Ташқи меҳнат миграцияси агентлигининг Воронеждаги вакилига 1 июлда тақдим этган.

Шундан кейин Ўзбекистоннинг Москва шаҳридаги Бош консулхонаси билан ҳамкорликда видеодаги фуқаро шахси аниқлаштирилиб, 4 июлда учрашув ташкил этилган. Учрашувда фуқаро А.Ғ. 2022 йил 1 июнда ишлаш мақсадида Воронеж шаҳрига боргани, ҳужжатларини расмийлаштириш учун 28 июнда Миграция марказида бармоқ излари топшириш жараёнида масъул ходим томонидан куч ишлатилгани ва соғлиғидан шикояти йўқлигини маълум қилган. (Кун.уз)

Изоҳ: Бу тасвирларни кўрган ҳар қандай инсон миграция ходимининг зўравонлигидан дарғазаб бўлиши, мигрантга эса ачиниб қараши табиий. Бироқ аксар одамларимизнинг ўзлари ҳам шу ҳолатга тушишса, ўша йигит сингари сукут сақлашни ихтиёр қилишларининг сабабини ўйлаб кўришганмикин? Ҳозирда миграция идораларида муштумзўрликдан ташқари мулоқотларда пастга уриш ва беҳурмат қилиш ҳолатлари мавжуд бўлиб, бундай муносабатга бирор мигрантнинг норози бўлиб чиққанини учратмайсиз. Аксинча, бу ҳолатни русларнинг табиати ва тил билмайдиган одамга нисбатан қўллайдиган муомаласи, деб тушуниб қолинган. Бироқ русларнинг тилбилмас европаликларга ва ўзининг аҳолисига қилган муомаласига қаралса, уларнинг такаббурлиги ҳам, зўравонлиги ҳам кўзга ташланмайди. Демак, бизнинг қандайдир жиҳатларимиз бизни паст кўришларига асос беряпти. Биздаги бу камчиликларни ўргансак, уларнинг иккита ишга боғлиқ эканлиги кўринади. Биринчиси: чор Россияси даврида қисман, коммунизм даврида эса, батамом оилалардан Исломий тарбиянинг узоқлаштирилгани. Бунинг натижасида Исломий азм қарорга ва мустақил фикрга эга уйғоқ насллар етишиб чиқиши тўхтаган. У даврнинг одамлари коммунистик партия қолипида фикрлаб ўз дунёқараши ва шахсиятига эга бўлишмади. СССР парчаланиб мустақил давлатлар ташкил қилингандан кейин ҳам мусулмонлар устида манқуртлаштирувчи бу тизим сақланиб қолди. Айниқса, Ўзбекистондаги режим агар ноҳақлик, зулм ва зўравонлик қилса ҳам ҳукуматга сўзсиз итоат қилишга, адолатсизликка кўз юмишга ундовчи мафкура билан ёшларни тарбиялади. Оқибатда ноҳақликларга учраганда сукут қилишга ва ўзини беҳурмат қилинишига эътибор қилмайдиган авлод етишиб чиқди. Ҳукумат халқни Исломдан ва сиёсий фикрлашдан тўсиш билан одамларимизнинг ғурури ва шаънини энг паст даражага тушириб, моддий манфаатни ҳаётнинг асосига айлантирди. Шу сабаб энг шарафли мақомдаги кишилар ҳам мансаб ёки манфаат учун куракда турмайдиган сўзлар билан ҳақоратлар ёғдирилса ҳам бош эгиб туришига кўзлар кўникди.

Иккинчиси: давлат халқнинг эътиқодини ўзига асос қилиб олмаганлиги. Бу омил мусулмон халқнинг барча ишларида зиддият келтириб чиқариб, давлат ва халқнинг юксалишига тўсиқ бўлиб турибди. Мусулмонлар Аллоҳнинг Каломида мақталган даъват амалини бажарсалар Ўзбекистон конституциясида ашаддий жиноятчи ҳисобланмоқда. Мана шу конституциядан келиб чиққан тушунчалар халқимизни Россиядаги хорликка олиб борди. У ерда қулдан баттар аҳволга туширди. Негаки қулнинг ҳам қулдори, ҳимоячиси бўлади. Халқимизнинг эса ҳимоячиси йўқ!

Юқоридаги ҳодиса юзасидан Ўзбекистоннинг Москвадаги Бош консулхонаси ва Ташқи меҳнат миграцияси ҳамкорликда тегишли органларга нота киритди. Бунинг ортидан зўравон ходим ишдан олинди. Бундан маълум бўладики, жабрланган муҳожир атрофдагиларнинг яширинча олган видеолари ёрдамида ўзига нисбатан куч ишлатилишига қарши курашиши мумкин экан. Шундагина Ўзбекистон тарафи жабрланган фуқаро билан боғланиши мумкин экан. Ваҳоланки, бу ердаги муаммо тегишли жойларга нота киритиш эмас, балки ўзбекистонлик мусулмонларнинг қадр-қиммати, обрў-шаънини юксалтиришдир. Бунинг учун эса, ҳукуматдагиларнинг ўзлари зулмни ҳис қилишлари керак. Энг катта зулм Аллоҳга ширк келтириш ҳамда Унинг Шариатини ҳаётдан четлаштириш эканлигини қабул қилмай туриб зулмларга қарши исён руҳининг пайдо бўлиши мумкин эмас. Шубҳа йўқки, мусулмонларнинг қудрати уларнинг ақидасидадир. Бу ақида асосида мусулмонлар бошқарилмас экан уларга ажнабийлар қандай яшашни ўргатаверади ва бузуқ тузумлари ёрдамида Умматни заифлаштириб, энг арзон ишчи ҳолатида ушлаб тураверади.

Ҳизб ут-Таҳрирнинг Ўзбекистондаги матбуот бўлими аъзоси Абдураҳмон

24.07.2022й