“Зиндон хотиралари” туркумидан

Терговчи сал оширворганди…

بسم الله الرحمن الرحيم

Зонага киришда 56 та эдик, аммо карантинда 45 та биродар жамландик. Кейин билсак, учта биродаримиз қатл қилинган ва олтитаси тиббий бўлимга ётқизилибди. Иккита биродаримизни эса, яланг оёқ, кийимлари йиртиб ташланган ҳолда орамизга ташлашди.

Ўша зулм тегирмонининг даҳшатли чиғириғидан омон чиққан икки биродарнинг бири билан етти ой ўтгач бирга чой ичиб, узоқ суҳбатлашиш имкони бўлганди. Ўта камгап, устидан кечган оғир синовларни “айтсам, охиратга етиб бормайди” деган ўй билан айтавермайдиган феъли бор эди. Аммо у каби укажонларимнинг охиратга захиралаган ибратли собитлигини “исмингни сир тутаман” деб ишонтириб, бор гапни ичидан суғуриб олишга қодир безбетлигим туфайли, сиз азизларга айтарлик ҳикоя шаклландики, уни дарҳол зеҳнимга муҳрладим. Ва қуйида у билан бўлган суҳбат:

– Ука, шу кичик жуссанг билан ҳар кун штабга олиб кетишиб, чалажон қилиб олиб келишади. Улар нимани хоҳлайдилар сендан?

– Вилоятда мендан кейинги иш юритувчини билишмоқчи бўлиб келган МХХнинг терговчилари зонанинг гостиницасига ўрнашиб олган ва ҳар кун эрталабдан кечгача мени қистовга олиб тергайдилар.

– Тугадими?

– Кеча кетишганини манави зона оперлари айтди.

Ўта камтарлик билан тергов даҳшатларини бирма-бир сўзлаган укамга ич-ичимдан бир илиқ муҳаббатни ҳис қилдим. Аммо унинг ҳикоясини қоғозга туширмоққа ўзимда қувват топмадим, мен оғир суҳбатдан кейин беихтиёр укамнинг ўнг қўлидаги кўрсатгич бармоғини боғлаб ташланганига назар ташларканман тергов қай даражада оғир ўтганини ҳис этдим. Қалин дока устидан қон ҳануз тепчиб турибди. Мен қўлини аста ҳовучимга олиб “бу нима?” дегандим, укам қўлини авайлабгина тортиб: “терговчи сал оширворди” – деди.

Укамнинг қўлини янги бинт билан қайта боғлашга кўндирдим. Ечганимда тирноғи йўқ эди…

وَمَا نَقَمُوا مِنْهُمْ إِلَّا أَن يُؤْمِنُوا بِاللَّهِ الْعَزِيزِ الْحَمِيد الَّذِي لَهُ مُلْكُ السَّمَاوَاتِ وَالْأَرْضِ ۚ وَاللَّهُ عَلَىٰ كُلِّ شَيْءٍ شَهِيدٌ

– “Улар (мўминлардан) фақат у (мўмин)лар қудрат ва мақтов эгаси бўлган Аллоҳга – осмонлар ва ернинг подшоҳлиги Ўзиники бўлган Зотга иймон келтирганлари учунгина ўч олдилар! Аллоҳ барча нарсага гувоҳдир!” (Буруж:8-9)

(Ҳозиргача золим зиндонида сақланиб келаётган тирноқсиз укамни эслаганим – ўша хотиралардан)

Ҳизб ут-Таҳрирнинг Ўзбекистондаги матбуот бўлими аъзоси Зайниддин

28.05.2022й