بسم الله الرحمن الرحيم

Роя газетаси:

Қуддус босқинчилар билан муносабатларни нормаллаштирувчи қуёнюракларга эмас, халоскор шерюракларга муҳтож

Ҳижрий 1439 йил 9 ражаб, милодий 2018 йил 27 март сешанба куни «Маан» ахборот агентлиги веб-сайти чоп этган хабарда бундай сўзлар келади (хабардаги баъзи сўзларга қисман ўзгартиш киритилган):

«Марокаш Ташқи ишлар ва ҳамкорлик вазири Носир Боурита дипломатик делегация ҳамкорлигида муборак Ақсо масжидини зиёрат қилиб, яҳуд вужудининг Қуддус ва Ақсодаги қонунбузарликлари ҳақида маълумот олди.

Вазирни Исломий Вақфлар ва Ақсо масжиди ишлари бўйича бош мудир, хатиб шайх Азам ҳамда Қуддус ва унинг районлари ишлари бўйича вазир муҳандис Аднон Ҳусайний, шунингдек Ақсо масжиди мудири шайх Умар Кисвоний кабилар қарши олишди.

Вазир Боурита Фаластин заминига зиёратини Қуддус ва муборак Ақсо масжидидан бошлади. У матбуот анжуманида бундай деди: «Қиролимиз Муҳаммад олтинчи бутун фаластинликларни, хусусан, қуддусликларни қўллаб­қувватлаш ва шаҳардаги сўнгги янгиликлардан воқиф бўлиш мақсадида зиёратимизни Қуддусдан бошлашга кўрсатма бердилар. Қуддус – араб ва мусулмонлар сифатида барчамизнинг бир бўлагимиздир. Қуддус шаҳридаги вазиятнинг оғирлиги, таслим бўлишни англатмайди».

Ўз навбатида, хатиб шайх Азам ҳам вазир Боурита ва унга ҳамроҳлик қилган делегацияни юксак олқишлаб – Қуддус ва муборак Ақсо масжидига Марокаш ташқи ишлар вазири сифатида унинг биринчи ташрифи бўлгани боис – бундай тарихий зиёратнинг не чоғли аҳамиятли эканини таъкидлади. Шайх Азам барча араб давлатлари вазирларини Ақсога Олий ҳазрат Абдуллоҳ ибн Ҳусайн иккинчининг ташаббус ва раҳнамолиги остида ташриф буюришга чақирди. У шунингдек, бундай зиёратларда Ақсонинг ҳам исломий ва ҳам арабийлигини таъкидловчи ҳамда Ақсо билан бутун Қуддус шаҳрини қўллаб­қувватловчи бир мужда борлигини урғулади. Шайх хатиб вазир Боуритага Ақсодаги қонунбузарликлар ҳақида ҳам маълумот берди ва уни Масжиддаги ҳошимий ободонлаштириш лойиҳалари билан таништирди.

Қуддус мэри муҳандис Аднон Ҳусайний ҳам бугун Қуддус шаҳри бошдан кечираётган оғир бир вазиятда қилинган айни зиёратнинг ғоят муҳимлигини, Қуддуснинг араб ва мусулмонлар томонидан зиёрат қилиниши жуда аҳамиятли эканини билдирди.

Вазир Боурита ушбу кўҳна шаҳардаги Марокаш Уйи (Марокаш маданият маркази)ни зиёрат қилди. У ерда вазирнинг истиқболига Байтулмол агентлиги бош секретари мудир Ризо Аббос ҳамда Қуддус шаҳридаги Қуддуси Шариф Байтулмоли агентлиги вакили Абдурроҳим Барбарлар чиқдилар».

Роя газетаси шарҳи:

Марокаш Ташқи ишлар ва ҳамкорлик вазири Носир Боурита таслим бўлмасликка даъват қилиб, Қуддус – араб ва мусулмонларнинг бир бўлаги эканини таъкидлаётган экан, ҳамда унинг зиёрати бу муқаддас даргоҳ яҳудийлар томонидан босиб олинган бир шароитда амалга ошган экан, ўзига савол берса бўларди: Шу босқинчи вужуд рухсат бермаса ҳамда у билан ўз мамлакати ва қироли ўртасида нормал, кучли муносабат бўлмаса бу зиёрат амалга ошармиди?! Демак, Қуддус ва Фаластинни аллақачон босқинчиларга топшириб қўйган ҳамда узоқ вақтдан буён бу нажас вужудни ошкора-ю яширин тарзда тан олиб келаётган исломий юртлар ҳукмдорларидан Марокаш ҳукмдорларининг ҳам ҳеч қандай фарқи йўқ… Агар улар, Қуддус – араб ва мусулмонларнинг бир бўлаги, деган гапларида ростгўй бўлганларида эди, бу муқаддас даргоҳни босқинчилар қуроллари остида, ўшаларнинг рухсати билан зиёрат қилиш ўрнига, уни озод қилиш сари сон­саноқсиз аскарларини ҳаракатга келтирган бўлар эди! Ҳа, булар хорлик ва хўрликдан ор қилмайдиган қўрқоқ кимсалардир. Қуддус ва бутун Фаластиндан воз кечган хоинлар ҳам, мустамлакачи кофир давлатлардаги хўжайинлари сиёсатини ижро этувчи малайлар ҳам мана шулардир. Қуддус эса, улардан ва уларнинг қилмишларидан покдир. Бу муқаддас даргоҳ ва унинг фарзандлари бундай кимсалардан аллақачон қўлни ювиб, қўлтиққа урган бўлиб, ўрталарида ўчмас адоват ва тугамас нафрат бор. Бугун Қуддус – яҳудийлар билан алоқаларни нормаллаштираётган хоинларни ёки золимларга орқа қилаётган номард малайларни эмас, балки мужоҳид қўшинларни интиқлик билан кутиб турибди.

Роя газетасининг 2018 йил 4 апрел чоршанба кунги 176-сонидан

0

0