Уммат ёшлари келажак пойдеворидир
Уммат ёшлари келажак пойдеворидир
بِسْمِ اللهِ الرَّحْمٰنِ الرَّحِيم
Бугунги кундаги уммат бир ҳақиқатни англаб етдики, Халифалик давлати узоқ асрлар давомида дунёдаги энг қудратли, Ислом Уммати энг азиз уммат бўлиб келди. Мусулмонлар башариятга турли соҳалардаги илм эшикларини очиб бердилар. Шуни таъкидлаш жоизки, умматнинг ушбу етакчилигини рўёбга чиқаришда мусулмон ёшларининг ғайрат-шижоати ва журъатининг ҳал қилувчи рол ўйнагани ҳеч кимга сир эмас. Ёшларнинг буюк ишлари бу уммат тарихида тўлиб ётибди. Бундай ёшлардан бири Муҳаммад Фотиҳдир.
У йигирма бир ёшида византияликларни мағлуб қилиб, Росулуллоҳ ﷺнинг башоратларини рўёбга чиқарди ҳамда Росули Акрам нақадар яхши қўшин, нақадар яхши амир, дея сифатлаган яхши қўшиннинг яхши амирига айланди. Тасаввур қилинг, йигирма бир ёшлик йигит аввал қанчадан-қанча моҳир қўмондонлар қила олмаган ишни уддалади. Албатта, бу ундаги дин ғамининг қанчалик кучли бўлганига далолат қилади ва Константинополнинг фатҳ қилиши унга Аллоҳнинг мукофоти бўлган бўлса ажаб эмас. Бундай уммат ўғлонлари ададининг сон-саноғи йўқ. Шундай бўлса-да, улардан баъзиларини сиз азиз ёшларга намуна тариқасида келтириб ўтмоқчиман:
Ториқ ибн Зиёд, у ўн етти ёшида Испанияга ғазот қилди;
Муҳаммад ибн Қосим, у ҳам ўн етти ёшида Ҳинд рожаси Дахирни мағлуб қилиб, Ҳинд Ярим Оролида Ислом вужудини пайдо қилди.
Бахтиёр Холажий, у ўн саккиз ёшида Лакшман Сенни жангсиз қочиб кетишга мажбур қилди ва Бенгал вилоятида Ислом бошқарувига асос солди.
Азиз мусулмон ёшлари, шу сизнинг тарихингиздан бир парча. Мана шу сизнинг буюк ўтмишингиздир. Мана шулар сизнинг фахрланишга арзирли аждодларингиздир. Улар Халифаликнинг башарият тарихидаги энг буюк давлат бўлишида шарафли рол ўйнадилар. Ушбу Халифалик давлати бутун ер юзидаги тоғутларнинг тожу тахтларини ларзага солди, уларнинг низомларини юз тубан қулатди, ер юзидаги таъқибга учраган халқларни бирин-кетин озод қилиб, куфр, фасод ва зулмни йўқ қилди, ҳақ ва адолат ўрнатди. Ушбу буюк давлат Ислом адолатини бутун дунёга намоён қилди ҳамда башариятни тўғри асосда уйғотиш шарафига муяссар бўлди.
Бугунги кундаги уммат тушиб қолган ҳолатга холис назар солинг. Иқтисодий, сиёсий, ижтимо, таълим, ҳарбий соҳаларда қўлга илинарли бирон нарса қолмади. Куни кеча суюкли Пайғамбаримиз Муҳаммад ﷺнинг ҳажв қилингани эса, дард устига чипқон бўлди, мусулмонлар қалбига санчилган найза бўлди. Ушбу воқеа бу уммат ёшларида ҳам яна бир силкинишни пайдо қилиб, Росулининг ҳимояси учун ҳаракатга келтирди. Динимиз душманлари бу уммат ҳамон тирик эканлигини ўз кўзлари билан кўрди. Ушбу тадбирларда асосан уммат ёшлари ўз Росули Акрамга бўлган эҳтиромини амалда кўрсатдилар. Ушбу ҳолат бизга сийратни эсга солиб юборди. Сабаби Пайғамбаримизﷺ га эргашган саҳобийларнинг аксарини ёшлар ташкил этар эди. Жумладан:
1. Алий ибн Абу Толиб, имон келтирганда ёши саккизда эди.
2. Зубайр ибн Аввом, ёши саккизда.
3. Талҳа ибн Убайдуллоҳ, ёши ўн бирда.
4. Арқам ибн Абу Арқам, ёши ўн иккида.
5. Абдуллоҳ ибн Масъуд, ёши ўн тўртда.
6. Саид ибн Зайд, ёши йигирмага етмаган.
7. Саъд ибн Абу Ваққос, ёши ўн еттида.
8. Масъуд ибн Рабиъа, ёши ўн еттида.
9. Жаъфар ибн Абу Толиб, ёши ўн саккизда.
10. Мусъаб ибн Умайр, ёши йигирма тўртда.
Азиз ёшлар! Сизлар ҳам ушбу саҳобалар каби Аллоҳнинг розилиги учун бел боғланг. Аллоҳ яхши кўрадиган олийжаноб амалларингиз билан икки дунё саодатига етишингизни Яратган буюк Парвардигоримиздан сўраб қоламиз. Сизларнинг ёш даврингиздан бошлаб қилаётган фаолиятингиз сабабли Аллоҳ Субҳанаҳу ҳеч қандай соя бўлмайдиган, фақат Ўзининг соясигина бўладиган кунда энг яхши мукофот билан мукофотлайди, ин ша Аллоҳ!
Абу Ҳурайра Пайғамбар ﷺ дан ривоят қилади:
«سَبْعَةٌ يُظِلُّهُمْ اللَّهُ فِي ظِلِّهِ, يَوْمَ لاَ ظِلَّ إِلاَّ ظِلُّهُ: إِمَامٌ عَادِلٌ, وَشَابٌّ نَشَأَ فِي عِبَادَةِ اللَّهِ عَزَّ وَجَلَّ, وَرَجُلٌ قَلْبُهُ مُعَلَّقٌ بِالْمَسَاجِدِ, وَرَجُلانِ تَحَابَّا فِي اللَّهِ, اجْتَمَعَا عَلَيْهِ, وَتَفَرَّقَا عَلَيْهِ, وَرَجُلٌ دَعَتْهُ امْرَأَةٌ ذَاتُ مَنْصِبٍ وَجَمَالٍ, فَقَالَ إِنِّي أَخَافُ اللَّهَ, وَرَجُلٌ تَصَدَّقَ بِصَدَقَةٍ فَأَخْفَاهَا, حَتَّى لاَ تَعْلَمَ شِمَالُهُ مَا تُنْفِقُ يَمِينُهُ, وَرَجُلٌ ذَكَرَ اللَّهَ خَالِيًا, فَفَاضَتْ عَيْنَاهُ»
“Етти хил тоифа кишилар борки, соя йўқ кунда уларни Аллоҳ Ўзининг соясига олади: 1) Одил раҳбар. 2) Аллоҳ Азза ва Жаллага ибодат қилиш билан вояга етган ўсмир. 3) Қалби масжидларга боғланган киши. 4) Худо учун бир-бирини яхши кўрганларки, Худо учун бирлашиб (йиғилиб), Худо учун ажрашадилар (тарқаладилар). 5) Мансабли ва чиройли аёл чақирганида: “Мен Аллоҳдан қўрқаман”, деган киши. 6) Ўнг қўли қилган садақани чап қўли билмайдиган даражада махфий киши. 7) Ёлғиз ҳолида Аллоҳни эслаб, кўзи ёшга тўлган киши”. (муттафақун алайҳ).
Ҳизб ут-Таҳрирнинг Ўзбекистондаги медиа офиси. Зайниддин
14.11.2020й
