بِسْمِ اللهِ الرَّحْمٰنِ الرَّحِيمِ

Матбуот баёноти

Умматнинг инқироздан халос бўлиши ва шаънини сақлаб қолиши фақатгина Ислом йўлига эргашиш билан амалга ошади

Ироқда халқ ҳаракати бошланганига уч ой бўлди. Борган сари ҳам интенсивлик, ҳам кўлам жиҳатидан ортиб, халқнинг ҳамма секторларини қамраб олмоқда, масалан, шифокорлар, муҳандислар, университет талабалари, юридик мутахассислар, бизнесменлар, ҳарбий гувоҳномаси бор, аммо ишсиз бўлган ҳарбийлар, шунингдек, марказий ва жанубий муҳофазадаги баъзи қабилалар ва бошқалар каби. Ҳатто қўзғолончиларни қўллаб-қувватлаб, бутун халқнинг кўтарилиши ҳам эҳтимолдан ҳоли бўлмай қолди. Чунки кофир 2003 йилда юртни босиб олиб, унинг тепасига ўтқазиб қўйган ва ўшандан бери кети узилмай келаётган ҳукуматларнинг золим сиёсатлари оқибатида даҳшатли вазият юзага келган.

Юртнинг бир қатор муассасаларида ҳаёт деярли тўлиқ издан чиққан. Аммо шунга қарамай, ҳукмрон тўда ҳанузгача ўрнида турибди. У ҳокимиятда қолиш ва тизгинни қўлдан бермаслик учун айёрлик қилиб, чап бериб келяпти, айрим башараларни ўзгартириш орқали бузуқ воқеликда ислоҳот ўтказиш билан халқни алдамоқчи бўляпти! Бир тарафдан эса, эронлик қуролли гуруҳларга фаолларни ўғирлаб кетиш ва жисмонан йўқ қилишларига қўйиб беряпти. Бундай жиноятлари намойишчиларга ўтмай, аксинча, уларнинг бутун ҳукмрон элитани тубдан йўқ қилиш позицияларини янада кучайтирмоқда. Бутун юрт ишларни бошқарадиган раҳбарсиз қолди. Чунки ҳукумат истеъфо берган, президент Барҳам Солиҳ «жаноблари» эса, икки ўт орасида қолди: бир томонда қўзғолончи ёшлар босими, иккинчи томонда конституцияни дастаклаётган партиялар босими… Истеъфога чиққан Абдулмаҳдий ўрнига ворис тайинлашда ҳалигача омади чопмаяпти. Конституциявий муддатни ўтказиб юборилганига қарамай, бу кимсаларнинг ҳаммаси ҳар бир кузатувчи учун кулгига айланди!

Мана шундай мушкул вазиятда балонинг балоси Америка бўлиб қолмоқда. У Ироқдаги малайларининг қўзғолончиларни бостира олмаганликларидан дарғазаб бўлиб, улардан ўч олишга ўтди. Эрон ва унинг юртдаги қуроллари шунча вақтдан бери Ироқда бебошлик қилиб келганидан сўнг, Америка бугун ўзининг қутурган кўппакларидан бирини, яъни, Ироқ, Сурия, Ливан, Яман каби юртлардаги бегуноҳ мусулмонларни қонини ичган Қосим Сулаймонийни қурбон қилиш йўлига ўтди. Қосим Сулаймонийни қурбон қилишнинг сабаблари қуйидагича: Биринчидан, Америка Ироқдаги элчихонасига қуролли гуруҳлар томонидан ҳужум қилинганидан кейин, буюк давлат сифатида буни ўзи учун ҳақорат деб билиб, таҳқирлангани учун қасос олди. Иккинчидан, бу иш билан ўзига ва майларига қарши бош кўтарган халқнинг кўнглини овлашга уринди. Учинчидан, Ироқнинг вазиятини олдиндан тартибга солиш учун замин тайёрлаш, яъни, ҳали бери башараси қораймаган янги малайни олиб келиб, юртни ҳозирги кризисдан олиб чиқиши мумкин, деган илинжда уни қўллаб-қувватлаш.

Эй қўзғолончи ёшлар!

Биз сизлар чекаётган машаққатларнинг асл сабабини ёритиб, ҳақиқатларни очиб бераётган эканмиз, сизларга холисона насиҳат қилмоқчимиз. Биз сизларни сиёсатда кофирлар йўлига эргашиш ҳамда одамлар ишларини демократик куфр ва бузуқ илмонийлик билан идора қилишнинг оқибатидан огоҳлантирамиз. Чунки илмонийлик сизни ёлғон орзуларга етаклаб, Аллоҳ Субҳанаҳу истаган нажот йўлидан узоқлаштирмоқда. Зеро, ушбу нажот йўли мусаффо Ислом шариатини манфур мазҳабпарастлик ва бадбўй миллатчилик лойқалари устидан ҳоким қилиш йўлидир. Бас, адолат, хавфсизлик ва гўзал ҳаёт берувчи ушбу шариатга қайтинг.

﴿وَأَنِ احْكُم بَيْنَهُم بِمَا أَنزَلَ اللَّـهُ وَلا تَتَّبِعْ أَهْوَاءَهُمْ وَاحْذَرْ‌هُمْ أَن يَفْتِنُوكَ عَن بَعْضِ مَا أَنزَلَ اللَّـهُ إِلَيْكَ﴾

﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾

«Улар ўртасида Аллоҳ нозил қилган нарса билан ҳукм қилинг, уларнинг ҳавойи нафсларига эргашманг ва Аллоҳ сизга нозил қилган ҳукмларнинг айримларидан сизни буриб фитнага солиб қўйишларидан эҳтиёт бўлинг! Агар юз ўгирсалар, билингки, Аллоҳ уларга айрим гуноҳлари сабабли мусибат етказишни истамоқда. Шубҳасиз, одамлардан кўплари фосиқдирлар. Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!»                                       [Моида 49-50]