Қурбат ва нусрат ойи – Рамазон муборак

بِسْمِ اللهِ الرَّحْمٰنِ الرَّحِيم

Инсонлар учун чиқарилган энг яхши уммат бўлмиш, қалблари Роббисига мустаҳкам боғланган, Унга ибодат, итоат қилишларидан дунё неъматларию лаззатлари тўсолмайдиган, Ўзининг марҳамати билан азиз ва мукаррам қилган Ислом Умматининг азиз фарзандларига.

Ассаламу алайкум ва роҳматуллоҳи ва барокатуҳ!

Буюк Роббимизга янада яқин бўлиш имконини берувчи муқаддас ой Рамазон кириб келди. Барча мўминлар қалбига сурур ва хотиржамлик ато этган нусратлар ойи кириб келди.

شَهْرُ رَمَضَانَ الَّذِي أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَىٰ وَالْفُرْقَانِ

– “Одамлар учун ҳидоят бўлиб ҳамда ҳидоят ва фурқон (ҳақ билан ботилни ажратгувчи)нинг очиқ оятлари бўлиб Қуръон нозил қилинган рамазон ойи”.                                                                                                                             (Бақара:185)

Бу муқаддас Рамазон ойини кириб келишини кутиб олиш бахтига мушарраф бўлган барча мусулмонларни қутлаймиз. Аллоҳ Субҳанаҳу ушбу ойда барча мусулмонларнинг қилган ибодатларини баракотли қилсин. Бу йилги Рамазон Умматнинг рошид Халифаликни тиклашида нусрат ойи бўлсин. Бутун дунёдаги мусулмонлар устидаги ботил тузумлардан Аллоҳнинг изни ила қутуладиган ой бўлсин.

Бугунги кунда бутун дунёда коронавирус балоси тарқалди. Оқибатда инсонларнинг ҳаёти оғирлашди. Чунки дунёга ҳукмронлик қилишни, ўзининг мустаҳкам иқтисод ва қудратли ҳарбий кучга эга эканлигини даъво қилганлар бу кўринмас бало олдида ожиз ва нотавон бўлиб қолдилар. Бу балони даф қилиш учун ўзларининг ноқис ақлларига таяниб ижроси кулфат келтирувчи шундай қарорларни қабул қилдиларки, натижада инсонларнинг аҳволи янада танг ва абгор ҳолга келди. Уларнинг буйруқларига тобелик ва садоқат билан эргашаётган ҳукмдорлар ҳам ўз халқини худди шундай ҳолга солди. Шунинг учун юртимиздаги мусулмонлар Рамазон ойини оғир танглик ҳолатида қарши олмоқдалар. Аммо мусулмонлар ҳеч ҳам маҳзун бўлмасликлари керак, чунки барча ишлари ҳикматли бўлган Зот мусулмонларга Ўзининг кўринмас лашкари орқали динига хусумат қилувчиларнинг аҳволи қандай бўлишини кўрсатиб қўйди. Ўзини ҳукм ва қудрат эгаси ҳисоблаб, кибрланганларни ҳақиқий башарасини, уларнинг ожиз ва нотавонлигини, ҳақиқий куч ва қудрат Эгаси ким эканлигини яққол намоён қилди:

وَإِيَّايَ فَارْهَبُونِي

– “Ва Мендангина қўрқинглар!” (Бақара:40)

Яна айтади:

إِنَّمَا ذَلِكُمْ الشَّيْطَانُ يُخَوِّفُ أَوْلِيَاءَهُ فَلاَ تَخَافُوهُمْ وَخَافُونِي إِنْ كُنْتُمْ مُؤْمِنِينَ 

– “Албатта ўша (сизларни васвасага солмоқчи бўлган) шайтоннинг ўзидир. У сизларни ўзининг дўстларидан (кофирлардан)) қўрқитмоқчи бўлади. Бас, агар мўмин бўлсангизлар, улардан қўрқмангиз, Мендан қўрқингиз!” (Оли Имрон:175)

Шундай экан, ушбу шукуҳли ойда барчамиз бор имкониятимиз билан Аллоҳнинг шариатини ҳаётимизга қайтаришга ҳаракат қилиб, яна аввалги азизлигимизга эриштиришида Ўзидан мадад сўрайлик. Токи, бу улуғ ой нусрат ойи бўлиб қалбларимизни шодлантирсин. Аллоҳ айтади:

وَيَوْمَئِذٍ يَفْرَحُ الْمُؤْمِنُونَ* بِنَصْرِ اللَّـهِ ۚ يَنصُرُ مَن يَشَاءُ ۖوَهُوَ الْعَزِيزُ الرَّحِيمُ

– “Ўша кунда мўминлар Аллоҳ ғолиб қилгани сабабли шодланурлар. (Аллоҳ) Ўзи хоҳлаган кишини ғолиб қилур. У қудрат ва раҳм-шафқат эгасидир”.   (Рум:4-5)

Сўзимиз ниҳоясида Аллоҳ Субҳанаҳудан барчаларимизнинг ибодатларимизни қабул қилиб, қалбларимиздаги эзгу ниятларимизга эриштиришини сўраб қоламиз. Рамазонни улуғ ажрларга эга бўладиган амаллар ила ўтказишимизни ҳамда тез кунларда бугунги мусибатлардан қутқариб Ислом татбиқ қилинадиган ҳаёт тикланишига нусрат беришини сўраб қоламиз.

Ҳизб ут-Таҳрирнинг Ўзбекистондаги медиа офиси

24.04.2020й