Ўзбекистонлик биродарларимизга мурожаат: Шом сабоқлари ва фикрий уйғониш масъулияти

بِسْمِ ٱللَّهِ ٱلرَّحْمَٰنِ ٱلرَّحِيمِ

إِنَّمَا ٱلْمُؤْمِنُونَ إِخْوَةٌ فَأَصْلِحُوا۟ بَيْنَ أَخَوَيْكُمْ ۚ وَٱتَّقُوا۟ ٱللَّهَ لَعَلَّكُمْ تُرْحَمُونَ

«Албатта, мўминлар ўзаро биродардирлар. Бас, икки биродарингизнинг орасини ислоҳ қилинг ва Аллоҳдан қўрқинг, шоядки, раҳм қилинсангиз».  (Ҳужурот:10)

Азиз ва муҳтарам, Аллоҳнинг розилиги умидида Шом (Сурия) заминидаги жиҳод майдонларида машаққат чеккан ўзбекистонлик биродарлар, Ислом умматининг ажралмас ва тарихда улкан из қолдирган Бухорийлар, Термизийлар юртининг фарзандлари!
Бугун Шом заминида содир бўлаётган геосиёсий ўйинлар, қонли фожиалар ва халқаро майдон эгаларининг кетма-кет уюштираётган фитналари фақат у ердаги мусулмонларнинг эмас, балки бутун Ислом умматининг, хусусан, сиз ва бизнинг ҳам бош фикрий масаламиздир. Шомдаги воқеалар ривожи бизга шунчаки ҳиссий ачиниш эмас, балки улуғ бир тарихий масъулиятни ва чуқур ҳушёрликни юклайди. Расулуллоҳ ﷺ айтганлар:

أَلَا إِنَّ الزَّمَانَ يُوشِكُ أَنْ يَنْقَضِيَ بَيْنَ السُّلْطَانِ وَالْقُرْآنِ، فَالْزَمُوا الْقُرْآنَ وَلَا تُفَارِقُوهُ

«Огоҳ бўлинглар, огоҳ бўлинглар! Салтанат (давлат ва бошқарув) билан Қуръон ажраладиган вақт яқиндир. Бас, сизлар Қуръондан ажралманглар!» (Табароний ривояти).

Биз – Мовароуннаҳр мусулмонлари – Шом майдонидаги воқеаларга оддий бир кузатувчи бўлиб қарай олмаймиз. У ерда йиллар давомида тўкилган муқаддас қонлар ва бугунги сиёсий бўҳронлар бизга дунёвий тизимларнинг асл башарасини очиб берувчи энг улкан дарсдир. Ғарб дунёси, хусусан, Америка ва унинг Европадаги шериклари асрлар давомида дунёга ваъз қилиб, оғиз йиртиб келаётган «демократия», «инсон ҳуқуқлари» ва «эркинлик» каби шиорларнинг нақадар сохта ва ичи пучлиги Шом ва Фаластин заминида буткул фош бўлди. Бу жозибадор иборалар ортида фақатгина мустамлакачилик юришлари ва Ислом юртларининг бойликларини талон-тарож қилиш мақсади яширингани ҳеч кимга сир эмас. Халқаро сиёсий вазиятни кузатсак, БМТ Хавфсизлик Кенгаши ва унга аъзо йирик капиталистик давлатлар Асад даврида Шом халқи устига тонналаб кимёвий ва оддий бомбалар ёғилаётганда шунчаки сукут сақладилар ёки жараённи ўз манфаатларига мослаб бошқардилар. Стокгольм Халқаро Тинчлик Тадқиқот Институти (SIPRI) ва Human Rights Watch каби ташкилотларнинг ҳисоботларида Суриядаги уруш туфайли 500 мингдан ортиқ инсон ҳалок бўлгани, 12 миллиондан зиёд одам уй-жойини тарк этгани қайд этилган. Шом қўзғолони илк кунлардан бошлаб ўзининг соф исломий мабдасини ва пайғамбарлик минҳожи асосидаги тузумни талаб қилиб чиққанидан мустамлакачи кучлар даҳшатга тушган эди. Улар Ислом умматининг қайта уйғонишини тўхтатиш учун минтақадаги ўзларига тобе бўлган «малай режимлар» ҳалқасини ишга солишди. Кўринишда Шом халқига «ёрдам ва хайрихоҳлик» ниқобини кийган, аслида эса Ғарбнинг чизиб берган режаси асосида ҳаракат қилувчи бу маҳаллий ҳокимлар қўзғолонни сиёсий жиҳатдан жиловлаш, уни муайян чегараларда ушлаб туриш ва Остона, Женева сингари мағлубият шартномаларига кўндириш учун воситачилик қилишди. Улар афкори оммани сохта инсонпарварлик ёрдамлари ва ваъдалар билан чалғитиб, Умматнинг холис фарзандларини ташқи молиявий манбаларга қарам қилиб қўйишди. Бу эса ички тарқоқликка ва соф мақсадлардан оғишга олиб келди.

Азиз ўзбекистонлик биродарлар! Шом сабоқлари бизга шуни англатадики, мусулмонлар дуч келаётган бугунги улкан зулм ва инқирозларнинг ечими сохта демократик сайловлар, ҳукуматдаги шахсларнинг шунчаки алмашиши ёки халқаро ташкилотларнинг ҳеч қандай кучга эга бўлмаган резолюцияларида эмас. Асл нажот – Умматнинг фикрий-сақофий инқилобни амалга оширишидадир. Расулуллоҳ ﷺ айтганлар:

الْمُسْلِمُ أَخُو الْمُسْلِمِ، لَا يَخُونُهُ وَلَا يَكْذِبُهُ وَلَا يَخْذُلُهُ

«Мусулмон мусулмоннинг биродаридир. Унга хиёнат қилмайди, уни ёлғончи қилмайди ва уни ёрдамсиз қолдирмайди…» (Термизий ривояти).

Бугунги кундаги бизнинг энг долзарб вазифамиз – юртимизда ва дунёда содир бўлаётган сиёсий жараёнларни Ғарб мафкураси кўзойнаги билан эмас, балки соф Ислом ақидаси ва шариатимиз мезонлари асосида чуқур таҳлил қилишни ўрганишдир. Ислом шунчаки шахсий ибодатлар мажмуаси эмас, у ҳаёт, сиёсат, иқтисод ва жамиятни бошқарувчи мукаммал мабдадир. Мусулмонларнинг тарқоқлигига ва мазлумлигига барҳам берадиган ягона сиёсий қалқон – Ислом аҳкомларини изчил ва тўлиқ татбиқ этувчи, Умматни сунъий чегаралардан халос қилиб, ягона байроқ остида бирлаштирувчи пайғамбарлик минҳожи асосидаги Халифалик давлатидир. Фақат мана шундай онгли ва жипслашган кучгина халқаро мустамлакачиларнинг тузоқларини парчалаб ташлай олади.

Қадрли юртдошлар, диндошлар! Дунёдаги сиёсий савдолар бизни асло умидсизликка солмаслиги керак. Аксинча, бу вазият бизни сохта сиёсий доиралардан, капиталистик тузум алдовларидан буткул воз кечишга ундаши лозим. Ҳақиқий ўзгариш ташқи кучларнинг марҳамати билан эмас, Умматнинг ўз қадриятларига қайта ва содиқлик билан ёпишиши орқали содир бўлади. Аллоҳ таоло марҳамат қилади:

وَلَا تَهِنُوا وَلَا تَحْزَنُوا وَأَنتُمُ الْأَعْلَوْنَ إِن كُنتُم مُّؤْمِنِينَ

«(Эй мўминлар), сустлашманглар ва маҳзун бўлманглар! Агар (ҳақиқий) имон эгалари бўлсангизлар, сизлар устун бўлгувчидирсизлар». (Оли Имрон:139)

Келажак ва ҳақиқий нусрат фақат Аллоҳнинг арқонини маҳкам тутиб, Ислом мабдаси атрофида онгли равишда бирлашган холис мўминларникидир. Аллоҳ таоло юртимизни ва бутун Ислом умматини ҳақиқий фикрий ва сиёсий уйғониш соҳибларидан қилсин! Амин.

Ҳаётуллоҳ     

18.07.2026й