“Ёш лидерлар форуми” қандай лидерларни етиштирмоқчи?

بسم الله الرحمن الرحيم

Хабар: Жорий йил туркий давлатларда “Ёшлар ташаббусларини қўллаб-қувватлаш йили” деб эълон қилинган эди. Шу муносабат билан жорий йилнинг 3-4 июнь кунлари Бухоро шаҳрида Туркий давлатлар ташкилотининг IV Ёш лидерлар форуми ўтказилди.

Форумнинг биринчи иш кунида Туркий давлатлар ташкилоти бош котиби Бағдод Амреев, Baykar Technology технологик директори Сельжук Байрактар, Туркия ёшлар ва спорт вазири Халис Юнус Эрсёз, Ўзбекистон Ёшлар ишлари агентлиги директори Алишер Саъдуллаев, Бухоро вилояти ҳокими Ботир Зарипов иштирок этган.

Маросим сўнггида 2022 йил давомида Бухоро шаҳрида амалга ошириш режалаштирилган ҳаракатлар режаси ҳам имзоланди.

Маълумот ўрнида айтиш мумкинки, мазкур “Ёш лидерлар форуми” 2018-йилдан буён туризмни ривожлантириш, давлатлар ўртасида ўзаро ҳамкорликни мустаҳкамлаш ва тажриба алмашиш мақсадида анъанавий тарзда ўтказилиб келинади. Шу кунга қадар ушбу форум Озарбайжон, Қозоғистон ва Қирғизистон Республикасида ўтказилган. (Газета.уз)

Изоҳ: Юқорида қайд қилинганидек, “Ёш лидерлар форуми” Туркий давлатлар ташкилоти тарафидан уюштириб келинади. Шунга кўра, бу анжуманнинг ғоясини ва уни амалга ошириш йўналишларини ҳам Туркий давлатлар ташкилоти ишлаб чиқади. Бу ташкилот ҳақида тиниқ маълумотга эга бўлмасдан, “Ёш лидерлар форуми”да зимдан илгари сурилаётган “уйғониш, бирлашиш ва тараққий этиш” тушунчаларининг моҳиятини англаб етиш бир мунча қийин кечади. Шу мақсадда бу ташкилотнинг ғоя ва мақсадларига қисқача тўхталамиз.

Туркий давлатлар ташкилотининг режа ва мақсадлари 2009 йил 3 октябрда имзоланган Нахичеван битимида кўрсатилган. Мазкур шартномада аъзо давлатлар ўртасида сиёсий, тижорий-иқтисодий, маданий ва ҳуқуқий ҳамкорлик имкониятларини орттириш мақсад қилинган. Бу режалар диққат билан ўрганилса, ташкилотга аъзо давлатлар ўртасидаги ўзаро ишончнинг заиф бўлгани, бу шартномада алоқаларни мустаҳкамлашга алоҳида эътибор қаратилгани маълум бўлади. Шунингдек, Туркиядан ташқари барча аъзолари собиқ шўро давлатлари бўлган бу ташкилот ўз олдига устивор вазифа сифатида терроризм ва экстремизм, трансчегаравий жиноятларга қарши курашда ҳамкорлик қилишни белгилагани билан Россия қаршисидаги сиёсий иттифоқ бўлишни мақсад қилган Америка лойиҳаси эканини кўрсатади. Чунки 1992 йилда Билл Клинтоннинг президентлик даврида АҚШда туркий тилли давлатларни бирлаштириш лойиҳаси мавжудлиги маълум қилинган. Ўша йилнинг ўзида Туркия етакчилигида туркий тилли давлат раҳбарларининг саммитлари ўтказила бошланди. 1993 йилда ТуркСой ва ТуркПа тузилмалари таъсис этилди. Айниқса, Америка дастаги билан иқтидорга келган Турғут Ўзол ва Ражаб Тоййип Эрдоған даврида бу лойиҳани амалга оширишда жадаллик ва олдинга силжиш кузатилди. Бундан ташқари, мунозара ва баҳсларга қарамай, инглиз тили ташкилотнинг расмий тили деб эълон қилинди. Эрдоған ҳукумати АҚШга қўл келувчи бу миллатчилик дастуридан иккинчи даражали мақсад сифатида ўз ҳокимиятини мустаҳкамлашда фойдаланмоқда. Аъзо давлатлар билан савдо алоқаларини кучайтириш ва молиявий ресурсларни топишга алоҳида эътибор қаратилаётгани мана шу мақсадни ифодалайди. Биринчи даражали мақсад сифатида эса, Россияни ғазаблантирмайдиган шаклда аъзо давлатларни ташқи сиёсатда Америка нуқтаи назарини қўллаб-қувватловчи давлатлар сафига тортишга уринмоқда.

Хулоса қилиб айтадиган бўлсак, Туркий давлатлар ташкилотининг “Ёш лидерлар форуми” ёшларимизни демократик дунёқараш ва капиталистик қоидалар асосида юксалишга ҳамда миллийлик асосида уйғониш ва бирлашишга, Ислом умматидан ажралишга чақираётган бузғунчи анжумандир. Миллийлик ғоясини бирлашиш ва тараққий этишнинг бирдан-бир йўли деб айтаётганлар Исломнинг миллатчилик ҳақидаги очиқ ҳукмларини кўрмаганга олишади. Исломий чиқишлари билан машҳур бўлган Эрдўғон ҳам миллатчиликнинг тубанлигини эътироф этмайди. Ҳақиқат шуки, туркий бирлик ғояси мусулмонларни Исломга тўлиқ амал қилишдан тўсади ва демократия куфр низомига бўйин эгиб яшашга маҳкум қилади. Бу ташкилотнинг тамал тоши қўйилганига 30 йил бўлибдики, бирор марта Афғонистон ва Ироқ туркларини босқинчи империалистлардан, уйғур биродарларимизни коммунист Хитойдан қутқариш ҳақида гапирилганига гувоҳ бўлмадик. Аксинча, Туркияга ҳижрат қилган Ҳизб ут-Таҳрир аъзолари ва бошқа холис мусулмонларни яширинча экстрадиция қилинаётгани фош бўлмоқда.

Ҳозирда Америка Эрдўғон ҳукумати қўли билан туркий тилли давлатларни уюштириш учун турли воситаларни қўллаяпти. Булардан бири мусулмон ёшларни миллатчиларга айлантириш режасидир. Сиёсат ўлчовида 20-30 йил жуда оз вақт ҳисоблангани учун бу вақт оралиғида янги авлодни шакллантиришга енг шимарган. Бўлиб ҳам Исломидан маҳрум қилинган ва моддий қийинчиликлардан инграётган халқимизда бузғунчи миллатчилик ғоясини пайдо қилишда Америка ҳеч қандай тўсиқни кўрмаяпти. Биз мусулмонлар бундай хатардан ўз вақтида огоҳ бўлишимиз лозим. Тил ва миллат ҳақидаги фалсафий фикрларнинг жамиятимизда ёйилишига қаттиқ қарши туришимиз зарур. Чунки бу фикрлар қалбларга ўрнашса, Ислом олиб келган тўғри йўлдан бориш имконсиз ишга айланади. Ўз миллатидан фахрланиш, бошқаларни паст санаш ҳисси Ислом Умматини бир вужуд бўлиб бирлашишига тўсиқ бўлади. Ислом билан азиз бўлган Умматни демократия ва миллатчилик зулматларида тентираб юришини узайтиради. Аллоҳ Таоло айтади:

(وَاعْتَصِمُوا بِحَبْلِ اللهِ جَمِيعًا وَلَا تَفَرَّقُوا…)

– “Барчангиз Аллоҳнинг арқонига боғланингиз ва бўлинмангиз!”                                                                   (Оли Имрон:103)

Ҳизб ут-Таҳрирнинг Ўзбекистондаги матбуот бўлими аъзоси Абдураҳмон

15.06.2022й