Ҳафталик муҳим воқеалар таҳлили

بسم الله الرحمن الرحيم

﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾

“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”

Хабар (iiv.uz 20.06.2023й): 2023 йилнинг биринчи чорагида қайд этилган маъмурий ҳуқуқбузарликларга доир статистика очиқланди. Маълум бўлишича, бор-йўғи 3 ой ичида 1 миллион 422 мингдан ортиқ ўзбекистонлик маъмурий жавобгарликка тортилган. Бу – Ўзбекистон аҳолисининг қарийб 4 фоизига тенг.

Изоҳ: Бу қоидабузарлик оқибатида жабрланувчи қатлам халқнинг ўзидир. Аммо қоида бузганлардан ундириладиган улкан маблағ ҳисобидан жабрдийда фуқаролар зарари қопланмайди. Масалан, Андижон вилояти Хўжаобод туман ҳокимиятида Диний қўмита вакили умрага йиғилган пулларни ўзлаштиргани учун жавобгарликка тортилди ва ибодатларидан маҳрум қолган халқ эса, бир умр емай-ичмай йиққанидан маҳрум бўлганича қолаверди. Аслида биз мусулмон халқ устига ўз эътиқодимиздан келиб чиққан қонун ва қоидалар татбиқ қилиниши керак. Ана шунда ўша қонунларга нисбатан, энг аввало, тақво ва ҳурмат бўлади, сўнгра унга давомли ва самарали риоя қилиш юзага келади. Аксинча, инсон тарафидан ижод қилинган қонун ва қоидалар тураркан, одатда улар фақат ночор халқ учунгина ишлайди, қонунни ишлаб чиққанлар ва уларнинг ижрочиларига нисбатан умуман ишламайди. Натижада бундай қонунларга риоя қилувчилар ҳам ушбу қонунларнинг ҳурмати учун эмас, зўрба зўр топилган пулларидан маҳрум бўлмаслик пайида амал қиладилар холос. Қолаверса, нега бугун ҳар қадамда кузатув камералари ва арзимаган нарсага ҳам отнинг калласидек жарималар жорий қилинган?! Бунинг жавоби жуда ҳам оддий, яъни давлат бюджетни тўлдириш учун шундай жарималарни ўйлаб топган. Бундан ташқари, АҚШга тобе бўлган халқаро молиявий ташкилотлар, Россия, Хитой сингари мустамлакачи давлатлардан катта миқдорда фоизли кредитлар олинган ва уларни имкон қадар қайтариш керак бўляпти. Халқ фаровонлиги учун хизмат қилиши керак бўлган газ, олтин, уран каби қимматбаҳо бойликлар ҳалиги “катта оға”ларга сув текинга топширилгани сабабли давлат ғазнасини энди шу қашшоқ халқ ҳисобидан қоплашдан бошқа илож қолмаяпти.

Хабар (kun.uz 20.06.2023й): Бекобод шаҳар ИИБдаги тергов ҳибсхонасида маҳкум ўз жонига суиқасд қилди. Манбанинг хабар беришича, камерадошлари унинг ҳаётини сақлаб қолишган.

Изоҳ: Бу каби ўз жонига қасд қилишлар ёки тергов қийноқлари оқибатида вафот этаётганлар ҳақидаги хабарларга омма халқ  деярли кўникиб ҳам бўлди. Эл тилида айтганда, “буларнинг қўлига тушгулик қилмасин” деган сўз аллақачон тилга яқин, қулоққа таниш дуога айланиб ҳам улгурди. Аслида “осди”, “кесди”ларнинг келиб чиқиш илдизи – қўлга кишан солинган маҳкумнинг бирор ҳуқуққа эга эмаслигидир. Маҳбус нимада айбланса, ўшани ва керак бўлса, бошқа айрим ёпилмай қолган ишларни ҳам бўйнига олиш билангина калтакдан ёки ўлиги чиқишидан омон қолиши мумкин холос. Бугун раҳбар алмашди, лекин бу аслида косметик характердаги ўзгариш бўлди холос. Чунки асосий дастур ва қонунлар ҳамда ижро органлари, айниқса ички хавфсизлик тизими ўша-ўшалигича қолмоқда. Уларда ҳануз ҳеч қандай жиддий ва аҳамиятга молик ислоҳотлар рўй бергани йўқ. Бундан ташқари, Ўзбекистон режими тимсолидаги бугунги демократик қонунлар бу мусулмон халқ, жумладан ички хавфсизлик тизими ходимларининг ҳам эътиқодидан келиб чиққан қонунлар эмас. Шунинг учун булардан адолат ва қонун устуворлигини кутиш саҳродан сув қидириш билан баробар. Яқинда ўтказилган референдумда қабул қилинган янги конституциядаги терговга доир “миранда қоидаси”, “хабеас корпус” тамойиллари ҳам саробни сув, дея чалғитишдан ўзга нарса эмас. Бир сўз билан айтганда, инсонлар дилидан жой ололмаган бундай тузум остида бирор кимса жони, моли, ўз шаъни ва қадр-қимматининг кафолатли ҳимоясини тополмаслиги муқаррардир. Инсон шаъни ва ҳаёти – хоҳ у мусулмон бўлсин, хоҳ ғайридин бўлсин – Аллоҳ тарафидан юборилган низом остида яшалсагина тўлиқ ҳимоя билан таъминланади. Чунки шариатда “Асл – зимманинг поклиги” қоидаси асосида иш кўрилади ва ҳеч кимга айби исботланмагунга қадар жиноятчи сифатида қаралмайди ва гумонга эргашиб ҳукм чиқаришдан қатъий қайтарилади. Мана сизга гўзал Ислом қонунлари!

Хабар (daryo.uz 22.06.2023й): 16 июнь куни Самарқанд тумани “Янгиариқ” маҳалласида жойлашган “Вавилон” чўмилиш ҳавзасининг очилиш маросими ташкилотчилари… 2000 дан зиёд фуқаролар учун оммавий кўнгилочар маросимни ташкил этган. Ушбу келишилмаган жамоат тадбири турли тартиб бузилишларга олиб келиши мумкинлигини инобатга олган ҳолда, мазкур ҳолат Самарқанд вилояти ИИБ томонидан ўрганилиб, тадбир ташкилотчилари билан профилактик суҳбат ўтказилиб, келгусида хавфсизлик чоралари кўрилиши зарурияти ҳақида қатъий огоҳлантирилган.

Изоҳ: Бу мусулмон юртда ана шундай фаҳшга ботган, спиртли ичимликлар ичиладиган ва ҳатто наркотик моддалар пинҳона айланадиган тадбирларга нисбатан ҳукумат деярли чора кўрмай келяпти. Унинг ташкилотчилари огоҳлантириш, нари борса енгил жарима билан қутулиб қоляпти. Юқоридаги хабарда айтилишича, ташкилотчиларнинг айби – бундай тадбир ўтказиш ҳақида ҳокимиятни аввалдан огоҳлантирмаганликлари эмиш. Демак, қонун бўйича агар аввалдан огоҳлантириб қўйилса, бу каби бузуқликларга тўлиб тошган тадбирларни ўтказиш мумкин бўлар экан. Ваҳоланки, ушбу тадбирдан олинган видеолавҳаларни кўрган ҳар қандай иймон эгаси ҳайратдан ёқа ушлайди. Афсуски, ёшларимиз бугунги кунда бундай тадбирлар, шунингдек спиртли ичимликлар, фаҳш, жиноятчилик, наркотик моддалар… уяси бўлган кафе ва барлар, тунги клубларда вақтини ўтказяпти, турли жиноятларга қўл уряпти. Ҳукумат эса, буларга қарши курашиб чек қўйиш ўрнига, кенг йўл очиб беряпти. Чунки улар нашид эшитаётганлари, ўз динини ўрганиш учун илм олаётганлари ёки ижтимоий тармоқлардаги диний маърузага “класс” босаётганлари йўқ… Ҳукумат ўзи учун энг катта хавф сифатида Исломни кўради. Чунки улар динни ҳаётдан ажратувчи демократик қонунлар орқали олиб борилаётган бошқарув халқни қаёққа етаклаётганини ёш авлодга тушунтириб, уларни уйғотадиган куч – фақат Ислом экани ҳамда бу нарса ҳукуматнинг ўзи ва мустамлакачи раҳнамолари тақдирига нақадар даҳл қилишини жуда яхши англашади. Ўзбек ҳукуматининг ўз мусулмон аҳолиси эътиқоди ва қарашлари билан ҳисоблашмасдан бундай сиёсат юритаётганидан хулоса қилиш мумкинки, ҳозирги сиёсат фаҳш ва жиноятчиликка кенг йўл очиб бериб, жамиятни тубанликка ва айниқса, ёшларимизни диний тарбиядан маҳрум қилиб, енгил-елпи ҳаёт сари етаклашдан бошқасига ярамайди. Шунинг учун мусулмон халқимиз барча муаммоларнинг илдизи, ушбу биз учун мутлақо ёт ғайриисломий тузум – демократия эканини англаб, уни ҳаётимиздан супуриб ташлаш ва ўрнига Исломни олиб келиш учун ҳаракат қилишлари вожиб бўлади.

Хабар (senat.uz 23.06.2023й): Сенат Ўзбекистон-Қозоғистон Давлат чегарасини демаркация қилиш тўғрисидаги Шартномани ратификация қилиш ҳақидаги Қонунни маъқуллади. Ҳужжат Ўзбекистон президенти Шавкат Мирзиёев ва Қозоғистон президенти Қосим-Жўмарт Тўқаев томонидан унинг 2022 йил 21 декабрь куни мамлакатга давлат ташрифи чоғида имзоланган эди.

Изоҳ: Ўзбекистон ҳукумати Қирғизистон билан ҳам шунга ўхшаш шартнома имзолаб, чегарадаги ноаниқ ва низоли участкалар бўйича келишиб олганди. Бундай қилишдан мақсад тушунарли, яъни Россиянинг минтақа давлатларига, айниқса қирғиз тарафига чегарада низо чиқариб, босим ўтказиш қуролидан маҳрум қилишдир. АҚШ давлат котиби Блинкен бу келишувни олқишлаган эди. Чунки Америка бундан манфаатдор бўлиб, ушбу келишув борасидаги маслаҳат ҳам катта эҳтимол билан ундан чиққан. Яқинда тожик-қирғиз чегарасида чиққан низо ва унинг оқибатида бегуноҳ одамлар ҳалок бўлгани ҳали ёдимиздан чиққани йўқ. Бу фитна ортида Россия турганлиги ҳам аниқ. Мана шундай ишларга йўл қўймаслик учун ҳам ўзбек-қирғиз ва ўзбек-қозоқ чегаралари борасида келишувлар имзоланди. Бироқ ушбу ҳолат, юзаки қараганда яхши ишдек кўринади. Ислом нуқтаи назаридан қаралганда эса, мусулмон халқлар орасига тортиб қўйилган бу чегараларнинг ҳеч қандай қиймати ҳам, қонунийлиги ҳам йўқ. Чунки мусулмонлар ирқи, тили ва миллатидан қатъий назар бир бутун Уммат бўлиб, битта давлат ва битта имом-халифа ҳукми остида яшашлари вожиб. Ва чегара фақат Дорул Ислом ҳамда Дорул куфр ўртасидагина бўлади холос. Бугунгидек ўзбек, қирғиз, қозоқ, тожик, туркманга бўлиниб, ҳар бири алоҳида миллий давлатлар тузиб, ўртага чегаралар тортиб тарқоқ ҳолда яшашлари очиқ ҳаром қилинган иш. Қолаверса, бу сохта чегаралар мустамлакачиларнинг “парчалаб ташла ва ҳукмронлик қил” қоидасининг амалий ифодасидир. Марказий Осиёдаги бугунги давлат чегаралари ҳам Совет Иттифоқи номенклатураси томонидан тортилган бўлиб, шу кунгача минтақа аҳолисига қанчалар машаққат туғдириб келаётгани исбот талаб қилмайдиган ҳақиқатдир. Шунинг учун ҳам бу чегаралар бўйича қандайдир келишув ё шартномалар тузиш ҳақида эмас, аксинча уларни батамом йўқ қилиб, ўрнига Аллоҳнинг раҳмати бўлган Ислом асосида яшашга эришиш устида бош қотириш керак бўлади.

Ҳизб ут-Таҳрир Ўзбекистон матбуот бўлими аъзоси Форуқ

26.06.2023й