Ҳафталик муҳим воқеалар таҳлили
Ҳафталик муҳим воқеалар таҳлили
بِسْمِ اللهِ الرَّحْمٰنِ الرَّحِيمِ
﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾
“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”
Хабар (upl.uz 21.03.2026й): Ўзбекистонда 2026 йил 1 апрелдан бошлаб кўчмас мулк ва автомобиллар олди-сотдиси бўйича шартномаларни расмийлаштиришнинг янги тартиби кучга киради.
Изоҳ: Шавкат Мирзиёевнинг “соядаги иқтисодиётни қисқартириш” ҳақидаги фармонига асосан эндиликда 25 миллион сўмдан қиммат бўлган ҳар қандай харид, шунингдек, уй-жой ва машина савдоси фақат банк орқали нақд пулсиз шаклда амалга оширилиши шарт. Бунда “эскроу” (ҳисобда пул музлатиш) тизимидан фойдаланиш мажбурий этиб белгиланди. Нотариусларга банк тўлови ҳақидаги маълумотсиз шартномаларни тасдиқлаш тақиқланади. Ушбу янги тизим “истеъмолчиларни фирибгарликдан ҳимоя қилиш” деган ниқоб остида тақдим этилаётган бўлса-да, аслида ўзбек ҳукуматининг халқ устидан ўрнатаётган навбатдаги молиявий назорати ва солиқ базасини кенгайтиришдаги қадамидир. Мазкур фармон оқибатида одамлар ўртасидаги эркин пул муомаласини қаттиқ чеклаш орқали уларга навбатдаги қийинчиликлар ва ноқулайликлар туғдирилади, нархлар ошади, давлат ноҳақ солиқ солади. Чунки аҳоли қўлидаги нақд пул айланмаси мажбуран банк тизимига қамаб қўйилади. Албатта, бу ўринда йўқ жойдан солиқ ундириш асосий мақсадлардан биридир. Илгари уй-жой ва машина савдосида нархни паст кўрсатиш имкони бўлган бўлса, энди банк орқали ўтадиган реал сумма яшириб бўлмайдиган ҳолга келади. Бу эса халқнинг ҳар бир йирик савдосидан давлат ўз “улуши”ни тўлиқ ундириб олишини таъминлайди. Шунингдек, банклар ҳам бу олди-сотдилардан ўз улушига эга бўлиб, комиссия тўловлари ундиришларига йўл очилмоқда. Бу эса халқ ҳисобидан молиявий элита ва чўнтак банкларни бойитишнинг янги йўлидир. Халқимиз ҳаводан солиқ ўйлаб топувчи, одамларни молини ноҳақ ейишга кенг шарт-шароит яратиб берувчи мана бу чирик капиталистик тузум ва унинг иқтисодий низоми ҳали тўлиқ татбиқ қилинмаган ҳолати ҳам қанчалик ёмон эканлигини англаши зарур. У тўлиқ жорий қилинганда эса, дод-вой солишга кеч бўлади. Шунинг учун юртимиз мусулмонлари бундай зўравон тузум ва бошқарувдан қутулиш йўлини Исломдан изламоқлари лозим. Зеро, Ислом низомигина адолатсиз солиқлар ҳамда бир сиқим сиёсий элита ва бойлар манфаатига хизмат қилишдан холи бўлган ягона тузумдир.
Хабар (daryo.uz 23.03.2026й): Ўзбекистон Марказий банки ва Осиё тараққиёт банки ҳамкорлигида ўтказилган янги тадқиқот натижалари эълон қилинди.
Изоҳ: Унга кўра, сўровда қатнашган респондентларнинг 44 фоизи сўнгги 12 ой давомида даромадлари яшаш харажатларини қопламаганини билдирган. Таҳлиллар аҳоли орасида “бугун билан яшаш” кайфияти ҳукмрон эканини кўрсатди: респондентларнинг 73 фоизи “Мен бугун билан яшайман, эртага нима бўлса бўлар” фикрига тўлиқ қўшилган. Шунингдек, аҳолининг 35 фоизи кейинги 30 кун ичида 1,5 миллион сўм топиш “жуда қийин” бўлишини таъкидлаган. Ҳар ўн кишидан бири (11%) эса молиявий чорасизлик сабаб ҳисоб-китобларни кечиктиришга ёки қарзини тўламасликка мажбур бўлмоқда. Ушбу рақамлар шунчаки иқтисодий муваффақиятсизлик эмас, балки Мирзиёев ҳукумати йиллар давомида халққа тақдим этаётган “фаровон ҳаёт” ва “инсон қадри” ҳақидаги ваъдаларининг таг-туги билан чирик эканлигини исботловчи ҳужжатдир. Расмий статистикадаги “қашшоқлик камайяпти” деган кўзбўямачилик аҳолининг қарийб ярми очлик ва муҳтожликда яшаётгани ҳақидаги аччиқ ҳақиқат қаршисида чил-парчин бўлади. Халқнинг 73 фоизи “эртага нима бўлса бўлар” деган кайфиятда кун кечираётгани – бу халқнинг давлатга ва эртанги кунга бўлган ишончи буткул сўнаётганидан далолатдир. Бир тарафдан ялтироқ бинолар қад ростлаётган, халқаро имижни яхшилаш учун миллиардлаб маблағлар сарфланаётган бир пайтда, бошқа ёқда одамлар учун атиги 120 доллар топиш катта муаммо эканлиги бугунги “ислоҳотлар”нинг ҳақиқий юзини очиб беради. Шунинг учун ҳам Мирзиёев ва бошқа расмийларнинг баландпарвоз нутқлари аслида халқни оммавий муҳтожликда сақлаш ва унинг устидан мустабид бошқарувни давом эттириш учун ишлатилаётган сиёсий риторикадан бошқа нарса эмас. Таъкидлаш лозимки, капиталистик демократия тузуми бойларни янада бойитиш ва халқни оммавий қашшоқликда сақлаш устига қурилган. Бундай моддий чорасизликдан чиқишнинг ягона йўли – ушбу капиталистик зулмга чек қўювчи Ислом низомидир. Зеро, Исломда бойлик фақат маълум бир гуруҳ ёки олигархлар қўлида айланиб юрадиган мато эмас, балки одамлар ўртасида адолат билан тақсимланиши фарз қилинган омонатдир.
Хабар (kun.uz 24.03.2026й): 2026 йил 24 март куни Жиззах вилояти Фориш туманидаги бўлажак атом электр станцияси (АЭС) қурилиш майдончасида дастлабки бетон ишларига расман старт берилди.
Изоҳ: Россиянинг империалистик “иштаҳаси”ни қондириш учун қурбонлик ўлароқ берилган бу йирик лойиҳага қисқача қуйидагича баҳо бериш мумкин. Биринчидан, хавфсизлик масаласида ҳозиргача фақат ўрис ва ўзбек расмийларининг қуруқ гапларидан бошқа нарса маълум эмас. Ҳали бирор жойда синовдан ўтмаган реакторларнинг Ўзбекистонга олиб келиниб АЭС қурилиши юртимизда гўё ядро қуроли синовларини ўтказишга ҳозирлик кўришдек гап. Иккинчидан, молиявий-иқтисодий жиҳатдан ҳам ўта шубҳали ишлар кўп. Масалан, иқтисодчи Отабек Бакиров “лойиҳа-сметаси йўқ АЭСга бетон қуйса бўлаверадими?” деган ҳақли саволни ўртага ташламоқда. Яна АЭС майдонида ўз ишчи-ходимлари ва бюджет олдида триллионлаб қарздорлиги бор, репутацияси ғаройиб “Enter Engineering” техникалари ишламоқда. Унинг айтишича, агар Шимол компаниялари оладиган 24,4 млрд долларлик буюртма ва маҳаллийлаштиришнинг 30 фоизлик кўрсаткичи инобатга олинса, кичик АЭСнинг ўзи 35 млрд долларга етиб қолиши мумкин. Ваҳоланки, атиги бир йил аввал “Ўзатом” раҳбари Ахмедходжаев АЭС нархи 2 млрд доллардан ошмаслигини ваъда қилган эди. Нархларнинг бундай фантастик даражада шиширилишидан ўзбек ва ўрис режимларининг ўзаро тил бириктириб, улкан талон-торожларни амалга оширишни кўзлаганини тахмин қилиш қийин эмас. Учинчидан, Россия АЭС қурилишини мўлжалланган 2030 йилгача якунлашни пайсалга солиши деярли аниқ. Агар дунё давлатларида Россиянинг шунга ўхшаш лойиҳалардаги иштирокига қаралса, у ҳеч қачон ишни муддатида топширмаганлиги кўринади. Буни техник ва молиявий муаммолар билан изоҳлаш мумкин бўлса, Ўзбекистонга нисбатан эса, буларга сиёсий манфаат ҳам қўшилади. Яъни Россия Ўзбекистон давлат ресурсларини бекорга совуриб, уни охири кўринмайдиган АЭС билан банд қилиб, ўз таъсир доирасида ушлашни мақсад қилганлиги эҳтимоли кучлироқ кўринмоқда. Бу ерда зарар асосан Ўзбекистон томонига тушади, чунки АЭС қурилиши чўзилаверади, катта эҳтимолга кўра, бу лойиҳа охирига етказилмайди. Ўзбек тарафи охир-оқибат сарфланган сарф-харажатларга чув тушиб қолаверади. Энг ёмони, бунинг товонини яна шу жабрдийда халқимиз тўлашига тўғри келади. Хуллас, ўзбек режимининг ўрисни рози қилиш учун қўл қўйган АЭС шартномаси, ҳар қандай ҳолатда ҳам, халқимиз манфаатига хизмат қилмаслиги турган гап.
Хабар (daryo.uz 25.03.2026й): Иқтисодиёт ва молия вазирлигининг 2025 йилги давлат бюджети ижроси бўйича эълон қилган ҳисоботига кўра, йиғма бюджет даромадлари 502,6 трлн сўмни, харажатлари эса 541,7 трлн сўмни ташкил этган.
Изоҳ: Бюджет тақчиллиги 39,1 трлн сўм бўлиб, ЯИМга нисбатан 2,1 фоиз даражада шаклланган. Ҳисоботда эътиборни тортадиган харажатлардан бири давлат қарзини қайтариш бўйича фоиз тўловлари учун 18,1 трлн сўм ажратилганидир. Эътибор беринг, бу фақат фоиз тўловлари холос, қарзнинг тани эмас. Умуман олганда, давлат қарзини қайтариш харажатлари 25 фоизга ўсиб кетган ва бир йилнинг ўзида 6,6 млрд доллар янги қарз олинган. Бюджет ижросидаги ҳар доим шубҳали кўринадиган ва энг катта харажат – “бошқа харажатлар” тоифаси бўлиб, 2025 йилда бунга бюджетнинг нақд учдан бири – қарийб 190 трлн сўм сарфланган. Бу қарийб 15 миллиард доллар маблағ қаерга, қайси олигархнинг лойиҳасига ёки қайси ёпиқ қарорларга сарфлангани номаълумлигича қолмоқда, деганидир. Илгари аҳолига ажратиладиган нафақалар алоҳида кўрсатилган бўлса, эндиликда бу рақамлар ҳам сирли равишда ғойиб бўлган. Бу шуни англатадики, ўзбек режими бюджетни ўзининг шахсий ҳамёни сифатида кўрмоқда ва энг катта харажатларни сир тутиш орқали тизимли коррупцияни яширмоқда. Энергетика соҳасига ажратилган 11,4 трлн сўмлик субсидиялар, айниқса газни арзон сотишдан кўрилган зарарни қоплаш учун сарфланган 7 трлн сўм катта саволларни туғдиради. Бир тарафдан тарифлар ошяпти, бошқа томондан субсидия талон-торож қилиняпти, бу одамларни икки карра талашдир. Бир сўз билан айтганда, мамлакат янги қарзлар ва халқ бўйнига тушаётган оғир солиқ юки ҳисобига кун кўрмоқда. Одамлар ҳамон оёқлари остидаги табиий бойликлардан мосуво аҳволда яшашмоқда… Давлат бюджетидаги бу каби фирибгарликлар капиталистик демократия тузуми татбиқининг аччиқ оқибатларидан бошқа нарса эмас. Капитализм шароитида давлат бюджети халқ манфаати учун эмас, балки ҳокимият ва бизнес элитаси манфаатлари учун хизмат қиладиган воситадир. Ушбу ҳолат Ислом тузуми татбиқига нақадар муҳтож эканимизнинг яққол далилларидандир.
Хабар (uzdiplomat 26.03.2026й): Ўзбекистон қазилма бойликларга бой давлат — аммо нега аҳоли ҳали ҳам қийинчиликда яшаяпти?
Изоҳ: Шундай савол билан Uzdiplomat нашри журналисти Тоғ-кон саноати ва геология вазири ўринбосари Урал Юсуповга мурожаат қилди. Ҳатто журналист савол бераётганда “айб тақсимотдами ёки бошқа нарсадами” деб саволга янада аниқлик киритди. Шунга қарамай, мулозим одатдагидек умумий ва стандарт жавоб билан қутулди. Ҳа, бу ҳайратланарли ҳолат эмас. Бундай саволларга анави мулозимдан каттароқлари ҳам жавоб бера олмайди. Чунки юрт бойликлари масаласи жуда ёпиқ ва шубҳа-гумонларга тўлиб-тошган мавзулардан бири бўлиб келяпти. Шунингдек, у аллақачон халқимизнинг энг оғриқли ва аламли муаммоларидан бирига айланиб улгурган. Ҳар сафар фалон тонна олтин қазиб олинди, фалонча тонна захирамиз бор қабилидаги баёнотлар янграганда одамлар истеҳзо билан “бизга нима” дегандек муносабатда бўлишади. Чунки ҳолва деган билан оғиз чучимаганидек, халқимиз ўз юртининг улкан бойликлари борлигини билади холос, улардан баҳраманд бўлолмайди. Бироқ бундай ҳолатга сабр қилиш, рози бўлиш, кўникиш асло ярамайди. Чунки шариатга кўра бу зулмга тоқат қилиш, сукут сақлаш ҳисобланади. Табиий бойликлар шаръан умматнинг ҳаққи бўлиб, улар борасида ҳукуматдан ҳисоб сўрашга мусулмонлар нафақат ҳақлидирлар, балки бу уларнинг вожибидир! Аллоҳ таоло мусулмонларга ҳаққини поймол қилишларига йўл қўймасликни, уни раҳбариятдан талаб қилишни буюрган. Росулуллоҳ ﷺ шундай дедилар: “Золимга ҳам, мазлумга ҳам ёрдам беринглар”. Саҳобалар сўрадилар: “Мазлумга тушундик, золимга қандай ёрдам берамиз?” Пайғамбар ﷺ: “Уни зулмдан тўхтатиш билан”, дея жавоб бердилар. Росул алайҳиссалом яна шундай марҳамат қилдилар: “Ким ўз молини ҳимоя қилиб ўлдирилса, у шаҳиддир”. Шунинг учун мусулмонлар бу масалага ниҳоятда жиддий қарашлари, ўз бойликларига эга чиқиш учун курашишлари, раҳбариятни қаттиқ ҳисобга тортишлари зарурдир. Шу билан бирга, уларга ана шу бойликларини қайтарадиган ва мазлумнинг ҳаққини золимдан олиб берадиган Халифалик низомини олиб келиш учун ҳаракат қилишлари ҳам вожибдир!
Хабар (r_kusherbayev 26.03.2026й): Тошкент вилояти Зангиота туманлараро суди қарорига кўра, икки нафар вояга етмаган фарзанди бор ёлғиз она Тастанова Гулмира Абдужалаловнанинг уйи “ноқонуний қурилма” сифатида бузилиши белгилаб қўйилди.
Изоҳ: Таъкидланишича, уй 2008-2016 йилларда Наргиза исмли туғишган опаси томонидан ўзбошимчалик билан эгалланган 5 сотих ернинг бир қисмида ҳомийлар томонидан қуриб берилган. Опаси ҳозирда 937-сон қонун асосида ерга эгалик ҳуқуқини расмийлаштириш жараёнида. Бироқ суд буларни эътиборга олмай, барибир уйни бузиш тўғрисида қарор чиқарган. Бундан аввалроқ Тошкент шаҳри Яккасарой тумани ҳокимлиги бир оиланинг уйини бузиб ташлагани натижасида оила кўчада қолгани ҳақида Daryo.uz нашри видеолавҳа эълон қилганди. Унда оиланинг каттаси – тўшакка михланган, бемор аҳволдаги эркак киши журналистга қарата: “Агар уйимизни ташқаридан бостириб келган душман бузиб юборганида тушунса бўларди, аммо булар (яъни ҳокимиятдагилар – таҳр.) ўзимизники-ку, нега бизни бундай хорлашади?” – дея арз қиларкан, кўзларидан дув-дув ёш тўкилади. Бу оила уйидан айрилгач, қаҳратон қишни сув, газ ва электрдан узилган аҳволда, атрофи целлофан билан ўралган бир чодирда ўтказишга мажбур бўлган… Ҳа, бу кишининг сўзларида аламли ҳақиқат бор. Ҳокимиятдагилар ва уларнинг буйруқларини бажараётган хавфсизлик тизими ходимлари, юқоридаги ҳолатда эса, судларнинг нега бунчалик қаҳри қаттиқ бўлиб кетган, деган савол ўйлантиради одамни. Бу ҳолат муборак Фаластин заминида уйлари бомбардимон қилиниб, вайрон қилинганидан сўнг юз минглаб мусулмонларнинг чодирларда, таърифлашга тил ожизлик қиладиган ёмон шароитларда кун кўраётганларини эсга солиб юборади. У ерда душман – босқинчи яҳудий вужуди мусулмонларни шу аҳволга солаётган бўлса, Ўзбекистонда эса “ўзимизники”лар мусулмон юртдошларимизни шу даражада хорламоқда. Бўлиб ҳам юрт раҳбари ҳар чиқишида инсон қадри ҳақида баландпарвоз гапларни гапиришдан ҳеч чарчамайди. Хуллас, юқоридаги ҳолатлар юртимизда золимни ҳимоя қилиб, мазлумни эзаётган чирик капиталистик тузумнинг ҳақиқий башарасини кўрсатувчи айрим ишлар холос. Мусулмон халқимизга айтамизки, бошингиздан мана шу ғайриисломий тузум ва қаҳри қаттиқ бошқарувни улоқтириб ташлаб, ўрнига ҳақ ва адолатга асосланган Ислом низомини олиб келмас экансиз, “ўзимизники”ларнинг ҳатто душманларникидан қолишмайдиган бу каби зулму зўравонлигидан азият чекаверасиз!
Форуқ
28.03.2026й
