Ҳафталик муҳим воқеалар таҳлили

بسم الله الرحمن الرحيم

﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾

“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”

Ҳафталик учун махсус: Ғазо ноласи ва шаҳидлари

7 октябрда Фаластиннинг мард ўғлонлари томонидан яҳудларнинг сионист режимига қарши эълон қилинган “Ақсо Тўфони” номли ҳарбий амалиётига жавобан, анави – жаҳаннамга ўтин бўлгур –  лаънати яҳуд босқинчи кучлари Ғазодаги тинч аҳолини бутун дунё кўз ўнгида қирғин қилишдан тўхтагани йўқ. Бу қуёнюрак яҳудлар Ғазодаги бир гуруҳ мужоҳидларга қарши юзма-юз чиқишдан ўтакаси ёрилгудек қўрқаётгани аламини гўдаклар ва аёллар дохил бегуноҳ аҳолидан оляпти. Уларнинг шафқатсиз бомбардимонларидан ҳатто Ғазодаги ҳайвонлар ҳам омон қолмаяпти. Ғазо ҳукумати матбуот бюроси томонидан эълон қилинган баёнотда, қўрқоқ яҳуд армиясининг Ғазога 75 кунлик ҳужумлари ҳақида маълумот берилган. Унга кўра, 7 октябрдан бери яҳудий кучларининг Ғазо секторига уюштирган ҳужумлари оқибатида ҳалок бўлган фаластинликлар сони 20 мингдан ошган, улардан камида 8 минг нафари болалар, 6 минг 200 нафари аёллардир. Яраланганлар сони эса, 52 минг 600 дан ошган. Ҳужумлар оқибатида юзага келган вайроналар остида қолиб кетганлар сони 6 минг 700 нафарни ташкил этиб, уларнинг 70 фоизи аёллар ва болалар эканлиги таъкидланган. 7 октябрдан бери яҳудлар армияси томонидан 310 тиббиёт ходими, 35 фуқаро мудофааси ходими ва 97 журналист ўлдирилган, 99 тиббиёт ходими ва 8 журналист ҳибсга олинган. Шунингдек, яҳудий босқинчи кучларининг Ғазо секторидаги 140 та тиббиёт муассасасига зарба бергани, 23 шифохона ва 53 тиббиёт марказини ишдан чиқаргани, 102 та тез ёрдам машинасини яроқсиз ҳолга келтиргани ҳам билдирилган. Ғазодаги 53 минг уй бутунлай, 255 минг уй қисман вайрон бўлган, жами 308 минг уй зарар кўрган. Яҳудлар Ғазодаги 126 та давлат объекти ва 90 та мактаб ва университетга зарба бериб, буткул вайрон қилган, жами 283 та мактаб ва университетга зарар етган. Баёнотда яҳудларнинг ибодат жойларини ҳам нишонга олгани таъкидланади. Билдирилишича, Ғазода 114 та масжид бутунлай вайрон бўлган, 200 таси зарар кўрган ва 3 та черков ҳам нишонга олинган.

Лаънати қўрқоқ яҳудий вужудининг Муборак Фаластин заминидаги хунрезликлари, жиноятлари, шафқатсизларча қирғини – хуллас, мусулмонларга бўлган ўта қаттиқ адоватига бутун дунё гувоҳ бўлиб турибди. Бундай манзарани кўрган мусулмонлар тугул, ғайридин халқларнинг ҳам юраги лахта қонга айланиб бўлди. Бироқ худди бойвачча ота наркоман ва бетайин ўғлини эркалаб ҳимоя қилганидек, сионист режимини ўз қаноти остига олаётган Америка, Ғазо қирғинида шаҳид бўлаётган қурбонларни Украинадагилар билан солиштириб бўлмаслигини айтмоқда. Бу ҳақда 18 декабр куни кечқурун бўлиб ўтган брифингда, Оқ уйнинг стратегик алоқалар бўйича координатори Жон Кирби маълум қилди. У жумладан шундай деган: “Исроилликлар Ғазода тинч аҳолини ўлдириш, қийноққа солиш ва зўрлашни уруш мақсадига айлантирмаяпти. Бу уларнинг режаларига кирмайди. Улар тинч аҳолини қасддан ўлдиришга уринмаяпти”. Лаънати, номинг ўчгур Американинг иккиюзламачилиги ҳар қандай чегарадан ҳам ўтиб тушди. Унинг мусулмонларга нисбатан нафрати қанчалик эканлиги – Аллоҳ таоло огоҳлантирганидек – сўзларидан ошкор бўляпти, қалбидагиси эса, ундан-да кучлироқдир! Шунга кўра айтамизки, Америкадан ёки умуман Ғарбдан ёки шуларга хизмат қиладиган БМТдан ёхуд Россия ва Хитой каби мусулмонларнинг азалий душманлари бўлмиш мустамлакачилардан Фаластин масаласи бўйича бирор жўяли ечимни кутиш худди қўйни бўрига топшириш билан баробардир! Улар илгари сураётган “икки халқ учун икки давлат” ечимига рози бўлиш – Муборак Фаластин заминидан анави маймун ва тўнғизлар авлоди бўлмиш яҳудлар фойдасига воз кечиш демакдир. Ягона ва энг тўғри ечим – яҳудий вужудини Ислом ерларидан ҳарбий куч билан бутунлай супуриб ташлашдир! Бундан бошқаси эса, Ислом ва мусулмонларга хиёнатдир! Масжид ул-Ақсони ва Фаластинни мусулмонлар армияси зудлик билан озод қилишлари лозим! Бу улар учун вожиб ва ҳеч ҳам ортга суриб бўлмайдиган вазифадир! Зеро, Аллоҳ таоло шундай дейди:

وَإِنِ ‌اسْتَنْصَرُوكُمْ فِي الدِّينِ فَعَلَيْكُمُ النَّصْرُ

– “Агар улар дин йўлида сизлардан нусрат-ёрдам сўрасалар, ёрдам қилиш зиммангиздадир”.                                                              (Анфол:72)

Хабар (sputniknews.uz 19.12.2023й): 19 декабр куни Tashkent city халқаро ишбилармонлик маркази ҳудудида халқаро ҳамжамиятнинг коррупцияга қарши курашиш борасидаги саъй-ҳаракатларини ифодаловчи монументнинг очилиш маросими бўлиб ўтди. Тантанали маросимда Ўзбекистон президенти Шавкат Мирзиёев ва Қатар амири шайх Тамим бин Ҳамад Ол Соний иштирок этди.

Изоҳ: Мирзиёев Коррупцияга қарши курашиш бўйича мукофотнинг тақдирлаш маросимида “ҳалоллик вакцинаси” билан эмланган янги авлодни тарбиялаш устувор вазифа эканини таъкидлади. Мирзиёев бу гапи билан коррупция кўчасига кирмайдиган ҳалол авлодни тарбиялашни назарда тутди, албатта. “Мустақиллик”ка эришилганига 30 йилдан ошган бир пайтда, яна бу вазифанинг устувор бўлаётганлиги, бундай авлоднинг ҳануз етишиб чиқмаганлигини кўрсатади ва аслида бундан бошқача бўлиши ҳам мумкин эмас. Чунки ҳалоллик Ислом тузумининг амаллар ўлчовидир ва унинг амалда устуворлигини таъминлаш манҳажи ҳам фақат унда бордир, бошқа ҳеч бир тузумда эмас. Шунинг учун ўзга тузум билан тарбияланган авлоднинг амалларида ҳалол-ҳаром ўлчовлари бўлмаслиги табиийдир. Бироқ Мирзиёев “ҳалол авлод”ни тарбиялаш даъвосини қила туриб, ечимни яна Ғарбдан изламоқда. 20 декабр куни ўтказилган видеоселекторда Мирзиёевнинг “рақамлаштиришдан бош тортаётган раҳбар – коррупцияни йўқ қилишга интилмаган раҳбар” деган сўзлари бунга далилдир. Бундан ташқари, президентнинг маросимдаги сўзларига кўра, Transparency International халқаро нодавлат ташкилотининг тегишли индексидаги 2030 йилга қадар рейтингдаги давлатнинг ўрнини яна 50 поғонага яхшилаш мақсад қилинган. Маълумот учун, Ўзбекистон ушбу рейтингда 2022 йил натижаларига кўра, 180 давлат орасида 31 балл билан 126-ўринни эгаллаган. Бу эса, коррупцияга қарши кураш бўйича рейтингни яхшилаш орқали хорижий инвестиция кириб келишини осонлаштириш мақсад қилинганини англатади. Бошқа томондан, ушбу маросим Ўзбекистонда амалдорларни қамоқка олиш амалиёти бошланган бир пайтга тўғри келяпти. Гўёки ўзбек ҳукумати маросим олди ўзини коррупцияга қарши муросасиз курашаётган қилиб кўрсатаётгандек, чунки ахборот воситаларида қўлга олинганларнинг ўзлаштириш ёки растрата йўли билан талон-тарож қилиш ва коррупция билан қўлга олинаётгани айтилмоқда. Озодлик радиосида эълон қилинган суриштирувларга кўра, Ўзбекистондаги юқори лавозимлар асосан президентнинг яқин қариндошлари ўртасида тақсимланган. Мана шунинг ўзи коррупциянинг ҳақиқий кўриниши эмасми? Албатта шундай. Демак, ҳукумат бошидан коррупцияга ботган бўлса, қандай қилиб уни йўқ қила олиши мумкин? Аслини олганда, коррупциядек оғир иллатнинг келиб чиқиш “ўчоғи” бу – шак-шубҳасиз манфаатдорликка асосланган капиталистик демократия тузумининг ўзидир. Ана шу “ўчоқ” йўқ қилинсагина коррупцияга ҳам ўз-ўзидан барҳам берилади. Шундай экан, коррупцияни йўқ қилиш учун, аввало уни келтириб чиқараётган мавжуд демократик тузумни таг-томири билан йўқ қилиш керак бўлади. Агар тарихга назар соладиган бўлсак, Ислом тузум сифатида татбиқ этилган даврларда жамият коррупциядан бутунлай холи бўлганлигига гувоҳ бўламиз. Демакки, инсонлар ҳаётига Аллоҳ томонидан нозил қилинган бу мукаммал тузум татбиқ қилинсагина коррупция балосидан қутулишимиз мумкин.

Хабар (qalampir.uz 19.12.2023): Ўзбекистон Республикаси Президенти Шавкат Мирзиёев Хитой Халқ Республикаси Раиси Си Цзиньпинга мамлакатда юз берган зилзила юзасидан ҳамдардлик йўллади. Бу ҳақда давлат раҳбарининг матбуот котиби Шерзод Асадов маълум қилди.

Изоҳ: Мана, қанча йилдирки Шарқий Туркистонда истиқомат қилувчи уйғур ва бошқа мусулмонлар Си Цзиньпин режимининг зулми остида оғир аҳволда яшамоқдалар. Islamonline.uz нинг 2021 йил 9 октябр кунги хабарида Хитой собиқ полициячисининг берган маълумотларига кўра, аксар мусулмонлар устидан суд ҳукмисиз кўп йиллар ҳибсда сақлаш, терроризмда айбдорликни бўйнига олиш учун калтаклаш, жинсий аъзоларини электр симига боғлаб қўйиб ток билан қийноққа солиш, уйқудан маҳрум қилиш, сув билан қийнаш, кўрсатма олиш мақсадида камера шифтига осиб қўйиш, бўғиш услубларини қўллаш, юзларини тепкилаш ва гуруҳ бўлиб зўрлаш каби инсон этини сескантириб юборадиган қийноқлар қўлланмоқда. Бу зулму зўравонликлар Хитой режими Шарқий Туркистон мусулмонларини геноцид қилиб қириб ташлашни мақсад қилаётганига далолат қилади. Сentral.asia-news.com нинг 2021 йил 24 декабр кунги хабарида, 9 нафар юрист ва инсон ҳуқуқлари мутахассисларидан иборат комиссия Хитой раҳбари Си Цзиньпин Шинжондаги мусулмон уйғур озчилигининг “катта қисмини йўқ қилишга қаратилган” сиёсатга раҳбарлик қилмоқда, дея хулоса қилган эди. Мусулмонларнинг азобланаётганига неча йиллардан бери гувоҳ бўлиб келаётган Мирзиёев бошлиқ ўзбек ҳукумати эса, Хитой режимига норозилик раддиясини йўллаш тугул, геноцид қурбонларига ҳамдардлик билдиришга ҳам ярамаяпти. Ўзбек ҳукумати раҳбарияти каби ҳукмдорлар учун мусулмонларнинг қони, шаъни, ор-номусининг аҳамияти йўқлиги, Фаластинда лаънати яҳудлар мусулмонларни оммавий қирғин қилаётган бир вақтда, у ердаги мазлум мусулмонлар ҳимояси учун яҳуд вужуди билан дипломатик, иқтисодий алоқаларни узмасдан ҳамон давом эттираётганидан ҳам маълум бўлиб турибди. Росулуллоҳ ﷺ “Кимки Аллоҳдан ўзгани ғамида тонг орттирса, у Аллоҳдан йироқда. Кимки мусулмонлар ҳақида қайғурмасдан тонг орттирса, мусулмонлардан эмас” дея марҳамат қилганлар. Мирзиёев ва унинг атрофидаги сиёсий элита учун эса, мусулмонларнинг қони, моли, шаънининг ҳимояси эмас, балки Хитойнинг ифлос пуллари муҳим. Яқинда, Рошид Халифалик давлати қайта тикланади ва унда мусулмонлар қони, моли, обрўлари халифа томонидан, албатта кафолатли ҳимоя қилинади инша Аллоҳ! Чунки Росулуллоҳ ﷺ: “Имом (халифа) қалқондир, унинг ортида туриб жанг қилинади ва у билан ҳимояланилади”, – дедилар.

Хабар (gazeta.uz 20.12.2023й): Ҳукумат топшириғи билан Ўзбекистонда давлат ташкилотларига Янги йил муносабати билан корпоратив байрамлар ўтказиш тақиқланди. Билдирилишича, барча вазирлик, идора ва бошқа давлат ташкилотлари, маҳаллий ижро этувчи ҳокимият органлари ҳамда давлат улуши мавжуд хўжалик жамиятлари ва тижорат банкларига бюджет ва ундан ташқари маблағлар ҳисобидан Янги йил муносабати билан корпоратив тадбирлар ташкил қилиш ва байрам дастурхонини ёзиш ман қилинади.

Изоҳ: Ўтган йилда бўлганидек, бу йил ҳам ҳукумат бюджет ва ундан ташқари маблағлар ҳисобидан янги йилни байрам қилишни тақиқлади. Хусусан, Бош вазир Абдулла Арипов шундай деди: “Бюджет пули – халқнинг пули. Унинг ҳар бир тийини ҳисобли. Халқимиз бу пулларни бизнинг ўйин-кулги қилишимиз учун бермаган”. Албатта, ҳукуматнинг бундай қарорини яхши ишлар сирасига киритиш мумкин. Чунки Аллоҳнинг ғазабини келтирадиган амалларни тақиқлаш ва бу тақиқни бузганларни жазолаш айни муддаодир. Энди ҳукумат бу билан чекланиб қолмай, янги йилни байрам сифатида нишонлашни бутунлай тақиқласа, янада яхшироқ йўл тутган бўларди. Чунки бу “байрам” мусулмонларга етти ёт бегона бўлиб, Ислом ақидасига зид ва инсонни – Аллоҳ сақласин – ширкка олиб бориб қўйиши билан жуда хавфлидир. Шунингдек, Бош вазирнинг давлат ташкилотлари халқ пулини ўйин-кулги ва бошқа бемаъни ишларга сарфлашга ҳаққи йўқлиги ҳақидаги гапига келсак, бу ҳам маъқул ва жуда ўринли гап. Фақат ҳукумат халқ мулки ҳақидаги бундай гапига бошқа ҳар қандай ишларда ҳам амал қилганида нақадар яхши ишни амалга оширган бўларди. Халқ пулининг тўғри сарфланишини тўлиқ таъминлаш эса, Аллоҳнинг буйруқ ва тақиқларига кўра сарфлаш билангина бўлади. Шундагина ҳукумат бу молга хиёнат қилмай, ўз ўрнига сарфланишини таъминлаган бўларди. Зора, шундай йўл тутиши билан халқимиз устидаги раҳбарларни ҳам Аллоҳ ҳидоятга бошласа ва уларнинг аввалги-ю кейинги гуноҳларини кечириб юборса! 

Хабар (daryo.uz 21.12.2023й): Россиялик ёзувчи, “Путин жамоаси” ижтимоий ҳаракати аъзоси, Россия гвардияси полк командирининг ҳарбий-сиёсий масалалар бўйича ўринбосари Захар Прилепин собиқ СССР ҳудудларини Россия Федерацияси таркибига қўшиб олиш ва унинг аҳолисига рус тилини ўргатиш таклифи билан чиқди. Шунингдек, у “мигрантларни Россияда эмас, балки улар келган давлатларда, масалан, Ўзбекистонда ўқитишни” таклиф қилди.

Изоҳ: Ушбу хабар тарқалганидан сўнг, Ўзбекистондаги қатор депутатлар ва жамоат фаоллари норозилик билдириб чиқишди. Маҳаллий матбуот ҳам бу мавзу атрофидаги гап-сўзларга доир хабарларга тўлиб кетди. Бу хабарлар фонида Россиянинг Ўзбекистондаги элчиси Олег Малгинов Ташқи ишлар вазирлигига чақиртирилди. Айтилишича, ТИВда “…Захар Прилепиннинг Ўзбекистон ҳудудини Россияга қўшиб олиш зарурлиги ҳақидаги таклифи Тошкентда чуқур ташвиш ҳисси билан қабул қилингани” қатъий тарзда етказилган. Ўз навбатида, Россия ТИВ расмий вакили Мария Захарова Прилепиннинг таклифи унинг шахсий фикри эканлиги ва бу Россиянинг расмий позициясидан узоқлигини айтган. Шу ва шунга ўхшаш бошқа баёнот, фикр ва муносабатлар ҳақида чуқур мулоҳаза юритган ҳолда айтиш мумкинки, аввало, рус ҳукумати ва давлати биз учун азалий душманлиги, ўтакетган иккиюзламачи ва ҳамон ўзидан бошқа миллатларга паст назар билан қаровчи миллатчи-шовинист эканлиги янада очиқроқ кўринди. ТИВ вакили Захарованинг айтишича, Прилепиннинг таклифи унинг шахсий фикри эмиш. У гўё ўрис юртида шахсий фикрини билдиришга ҳаммада ҳуқуқ бордек гапирди. Ҳолбуки, Россиянинг Украинага бостириб кириши ҳақида кимдир ножўя гап гапирса, овози ўчирилди ёки ўзини темир панжара ортида кўрди. Ҳукуматнинг, безбетларча билдирилган бундай таҳдидли, ҳатто айтиш мумкинки, ўзбек давлатчилиги учун ўта шармандали ва таҳқирли тарсакига нисбатан кўрсатган реакцияси эса, жуда ожизона бўлди. Қаёқдаги бир нажас кофир кимса мусулмонлар юртини босиб олишни телевидение орқали дунё кўз ўнгида очиқдан-очиқ айтиб турган бўлса-ю, бунга нисбатан фақат “бизда чуқур ташвиш уйғотди” дейишдан нарига ўтилмаса… Биз мусулмонлар қўрқоқликни “нозик дипломатия” дея ниқоблашга уринаётган анави ҳамиятсиз бошлиқлардан безор бўлдик. Биз мусулмонлар душманларимиз қалбига қўрқув солиб, худди мўминлар амири Ҳорун ар-Рашид айтганидек: “Эй румликлар кўппаги Никифор! Сен кофирни боласини хатини ўқидим, жавобини эса, эшитмайсан, балки ўз кўзларинг билан кўрасан!”, – дейдиган мардлар даврини соғиндик! Кофирларга кеккайиб, уйқусини қочирадиган, юракларига шайтон васвасасини соладиган, қўрқоқликдан ҳазар қиладиган жасур, мард, шерюрак рижоллар даврини соғиндик! Албатта, бундай даврларни фақат Халифалик давлатигина қайтара олади холос!

Ҳизб ут-Таҳрир Ўзбекистон матбуот бўлими аъзоси Форуқ

25.12.2023й