Адолат аянинг вафоти муносабати билан таъзия

بسم الله الرحمن الرحيم

2025 йил 1 май куни Андижон вилояти Асака туманида яшовчи ибратли онахонларимиздан бири – Адолат ая ўз омонатини Роббисига топширди. Онахоннинг икки ўғли – Жабборов Пўлатжон ва Муроджонлар, набиралари Ёдгорбек, Улуғбек ва Эркинбеклар  Аллоҳнинг динини олий қилиш, шариатини ер юзида ҳукмрон қилиш, инсонларга ҳақни етказиш мақсадида Ҳизб ут-Таҳрир Исломий сиёсий ҳизби сафида ҳаракат қилганлар. Улар 1999-2003 йиллар оралиғида Ислом ва мусулмонларга адовати қаттиқ бўлган золим Каримов режими томонидан узоқ йилларга ноҳақ қамоққа ташланди. Ўшанда телевидениедаги чиқишларидан бирида бу лаънати Каримов шундай деган эди: “Эй, ота-оналар! Болаларингни маҳкам ушланглар, бўлмаса узоқ жойларга, борса келмасларга кетиб қолади. Керак бўлса 200 тасини калласини оламан”.

Адолат онанинг ўғиллари ва набиралари узоқ йиллар Ўзбекистоннинг зулмкорлиги билан дунёга танилган қамоқхоналарида қаттиқ жисмоний ва руҳий босимлар остида қолиб кетишди. Битта набираси Болтабоев Ёдгорбек 2001 йил “Жаслиқ” зонасида қаттиқ калтакланиб шаҳид қилинган.

Бироқ Адолат ая золим режим олдида бош эгмади. Аллоҳнинг қазосига рози бўлиб, гўзал сабру тоқат ва юксак намуна кўрсатди. Ўзи каби жигарбандлари ва эрларидан айрилган барча оналарга далда берди, шижоат улашиб яшади. Ҳатто 93 ёшларида ҳам онахонни зиёратига кирганларга иймоний қувват бериб, охирги дамларгача намуна бўлиб ўтдилар. Биз онахонимизни Сумаййа оналаримиздек келгуси авлод учун намуна, жаннатул-фирдавсда Росулуллоҳ ﷺ билан қўшни бўлишларини Роббимиздан сўраб дуо қиламиз.  Онахоннинг яқинларига чуқур таъзиямизни изҳор қилган ҳолда уларга Аллоҳдан сабру жамил ва офият сўраб қоламиз. Бундай ҳолларда айтишимиз вожиб бўлган сўз будир:

إِنَّا لِلَّهِ وَإِنَّا إِلَيْهِ رَاجِعُونَ

Албатта, биз Аллоҳникимиз ва, албатта, биз Унга қайтгувчимиз.‎

Ҳизб ут-Таҳрир Ўзбекистон матбуот бўлими

05.05.2025й