بسم الله الرحمن الرحيم

Роя газетаси:

AfD партияси Исломга очиқчасига душманлик қилмоқда

Ўтган якшанба куни матбуотда нашр қилинган бир ҳисоботда AfD (Германия учун Алтернатив) партияси Ислом динига нисбатан ошкора душманликни ўзининг сиёсий программаси асосига айлантирмоқчилигини фош этган. Европа ва евро валютаси бирлигига ҳамда қочқинларга қаршилиги билан танилган ўнг қанот популист партияси ҳисобланган AfD ўзининг бу сиёсий программасини икки ҳафтадан сўнг Германия жанубидаги Штутгарт шаҳрида ўтказадиган конференциясида тасдиқлаши кутилмоқда.

Якшанба кунлик Frankfurter Allgemeine газетасида «Германия учун Альтернатив партияси энди Ислом учун душман партияга айланмоқда» номли мақола чоп этилди. Мақолада AfD партиясининг бирламчи сиёсий программасида Исломни Германия учун ёт жисм, дея чақиришга қарор қилиш билан янада экстремистлашаётгани айтилади. Бу программасида у ҳижоб кийиш, меъзаналар қуриш, азонларни баланд айтишни тақиқлашга чақиради, масжидлар ва Қуръондан таълим берувчи мадрасалар устидан назоратни кучайтириш, керак бўлса уларни ёпиш, Германиядаги ҳаёт ва жамиятда исломий рамзларни тақиқлаш… зарурлигини айтади.

Газетада AfD партияси раиси ўринбосари Европарламент аъзоси Беатрис фон Шторхнинг «Ислом сиёсий идеология сифатида Германия конституциясига зиддир», деган сўзлари келтирилган.

Газетада яна келтирилишича, айни партия раиси ўринбосари Александр Гауланд ҳам худди шунга ўхшаш баёнот берди: «Ислом протестент ё католик насронийлиги каби дин эмас, балки у давлатга ҳукмрон бўлиш билан боғлиқ фикрлардир, шу боис исломлашиш Германия учун таҳдид саналади».

AfD партиясининг юксак эътиборли кишиси сифатида қаралувчи Гауланд «масжидлар устидан ҳамда палапартиш равишда ўсиб бораётган Қуръон таълими мадрасалари устидан назоратни кучайтириб, у ерларни кимлар молиялаштираётганини ва кимлар у ерларда маъруза қилаётганини, хусусан, саудиялик имомларни аниқлаш зарур», дея ҳисоблайди.

Газетада таъкидланишича, AfD партиясининг ўз сиёсий программасига меъзаналарни тақиқлашни киритаётганига сабаб, бу меъзаналар «исломий ҳукмронлик кўринишларидан бири» ҳисобланади, азонни баланд айтишни тақиқлашига сабаб эса унда ла илаҳа иллаллоҳ ибораси мавжуд. Газета Александ Гауланд билан Беатрис фон Шторхнинг – партиямизнинг сиёсий программасида Германияда масжид қуришни тақиқлашга ҳам, хатна қилишни оммавий тақиқлашга ҳам чақириқ йўқ, деган сўзларини келтиради.

Александ Гауланд газетага берган интервьюсида Исломнинг эркинликлар, демократия ва умумий тузум принципларига мос келувчи европача мўътадил намунаси бор, деган мафкурага қаршилигини билдирди. «Германия масиҳий илмоний давлат, Ислом эса унга ёт жисмдир, европача мўътадил Ислом, деган нарса асли йўқ нарса, Исломнинг тақдим этиладиган аниқ сурати ҳам йўқ», дея таъкидлади.

Ўз навбатида, аёллар ва болалар дохил қочқинларни Германия ҳудудига ўтказишга қаршилик қилиш билан қочқинларга қарата «жанговар ўқ отиш» билан танилган Беатрис фон Шторх хоним ҳам бундай деди: «Ислом Германияни ўзига ватан қилмаслиги керак, кўплаб мусулмонлар бу юртга мансуб бўлишган бўлса-да, бироқ Ислом Германияга мансуб бўлолмайди».

Ушбу Frankfurter Allgemeine газетаси шунга диққатни жалб қиладики, AfD партияси ўз сиёсий программасида Исломнинг немис жамиятидаги кунлик ҳаёт кўринишларига қадар кенгайган – мактаб ошхоналарида ўқувчиларга овқат бериш каби – кўринишларини ҳам рад этади. Гауландга кўра, мактаб ўқувчиларига чўчқа гўшти аралашмаган таомларнинг берилиши «тасаввур қилиб бўлмас ҳолдир, бу бир бегона дин қоидаларига бўйсунишдир». (Ал-Жазира нет).

Роя газетасининг 2016 йил 20 апрел чоршанба кунги 74-сонидан