Ҳафталик муҳим воқеалар таҳлили
Ҳафталик муҳим воқеалар таҳлили
بسم الله الرحمن الرحيم
﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾
“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”
Хабар (president.uz 21.03.2023й): Президент Шавкат Мирзиёев “Муборак Рамазон ойини муносиб тарзда ўтказиш тўғрисида”ги қарорни имзолади. Қарорда жумладан шундай дейилади: Ҳудудларда Рамазон ойининг мазмун-моҳиятида мужассам бўлган одамийлик, инсон шаънини улуғлаш, яхшилик ва меҳру саховат каби фазилатларни намоён этадиган, тинч ва осойишта ҳаётни қадрлашга… қаратилган тадбирларни ташкил этишга алоҳида эътибор қаратиш кўзда тутилган.
Изоҳ: Аллоҳ Таоло бандаларига Рамазон ойини гуноҳлардан покланиш, яхши амаллар қилиб жаннатга кириш учун бир имконият сифатида ҳамда Ислом даъватини бутун дунёга олиб чиқиш йўлида жиҳод қилган армияларга нусрат-ғалаба бериш ойи қилиб белгилаган. Халифалик давлатимиз бор бўлган даврларда давлат ва уммат ушбу муборак ойни фатҳлар ойига айлантиришга жидди жаҳд қиларди. Яъни Ислом рисолатини дунё халқларига етказиш борасидаги ҳаракатларини муборак Рамазон ойида янада кучайтирарди. Бугунга келиб эса, фарзларнинг тожи бўлган Халифалик давлатини тиклашдан чалғитиш мақсадида мусулмонларга ушбу ойнинг мазмун-моҳияти, қилиниши керак бўлган амаллар фақат шахсий ишларга ва таровиҳ намозлари, ифторликлар каби баъзи жамоавий тадбирларга чекланиши, худдики Ислом ҳам бошқа динлар сингари фақат шахс ва яратувчи ўртасидаги алоқадан иборат эканлиги уқтирилмоқда. Мирзиёев имзо чеккан ушбу қарордан эса, асосан “дин уламолари” тарафидан “тинчлигимизга шукр, сабр қилсак ҳаммаси яхши бўлади” қабилидаги ташвиқотлар янада кучайтирилиши кутилади.
Хабар (қалампир.уз 23.03.2023й): Россияда меҳнат муҳожирлари учун тил рейтингини жорий этиш таклиф қилинмоқда. Шунингдек, рус тилини билмаган меҳнат мигрантлари жаримага тортилиши мумкин. Бу ҳақда Россия Федерацияси Ички ишлар вазирлиги Миграция бош бошқармаси бошлиғи Валентина Казакова маълум қилди… Вазирлик балл тизимини жорий этишни таклиф қилмоқда… Бу баллар чет элда киришдан олдинги тайёргарликдан ўтиш ёки рус тили, Россия тарихи ва қонунчилик асослари бўйича имтиҳон топшириш учун берилиши мумкин.
Изоҳ: Рус ҳукумати Ўрта Осиё, айниқса Ўзбекистондан бориб ишлаётган муҳожирларга кун бермай келади. Зеро, Россияда мигрантлар сони бўйича Ўзбекистон биринчи ўринда туради. Рус ҳукуматининг руслаштириш сиёсатидаги навбатдаги қадами ишчи мигрантларни рус тили, тарихи ва қонунчилигини ўрганишини шарт қилиб қўйиш ва агар бундай шарт бажарилмаса жарима жазоси қўллаш бўляпти. Руслаштириш сиёсати деяётганимизнинг сабаби шуки, тил, тарих ва қонунчилик сақофат (ҳаёт ҳақидаги фикрлар мажмуи) манбаларидан ҳисобланади. Рус сақофати билан суғорилган мусулмон эса, ўз дини ва унинг аҳкомларидан узоқлашади ҳамда рус жамияти билан қоришиб кетади. Рус ҳукумати шу мақсадга эришиш йўлида Ўрта Осиёдан иш излаб келаётган – асосий қисми мусулмонлардан иборат – муҳожирларни турли шартларни бажаришга мажбурлаб келяпти. Бундан кўзланган яна бир мақсад шуки, рус сақофатини Ўрта Осиё аҳолиси орасида кенг ёйиш орқали бу минтақадаги ўз таъсирини мустаҳкамлашдир.
Хабар (кун.уз 24.03.2023й): Ўзгараётган конституцияда ҳеч ким қийноққа солиниши, зўравонликка, бошқа шафқатсиз, ғайриинсоний ёки инсон қадр-қимматини камситувчи муомалага ёхуд жазога дучор этилиши мумкин эмаслиги белгиланмоқда. Бу орқали шахсий дахлсизлик, инсон ҳуқуқ ва манфаатлари сўзсиз таъминланиши белгилаб қўйилиши орқали мазкур муаммога барҳам бериш кўзда тутилган. Яъни шахс дахлсизлиги асосий ҳуқуқ ва қадрият сифатида конституция даражасида мустаҳкамланмоқда.
Изоҳ: Аввало шуни таъкидлаш керакки, ушбу мақолада келтирилган қийноққа солиш, зўравонлик, шафқатсиз, ғайриинсоний муомала кабилар муаммо эмас, балки зулмдир. Юқоридаги мақолада эса, ҳукуматнинг шафқатсизлиги, золимлиги ўта юмшоқ иборалар билан айтилган ва бунга баъзи ҳаётий мисоллар келтирилган бўлса-да, аслида зулм кўлами ўта улкан даражада. Бундай золим ҳукуматни ўзи хоҳлаган пайтда ўзгартириб олаверадиган қандайдир қонунлар билан тийиб қўйиш асло имконсиздир. Зеро, инсон ҳуқуқлари деб дунёни бузадиган Ғарб давлатлари, хоссатан Американинг дунёга донғи кетган Абу Ғурайб, Гуантанамо қамоқларида инсонларга, айниқса мусулмонларга нисбатан ўта шафқатсиз ва ғайриинсоний муомаласи, қийноққа солишлар… фош бўлган. Шунинг учун ҳам Ғарб айтаётган инсон ҳуқуқлари деган нарса қуруқ сафсата бўлиб, у юртларни мустамлака қилишдаги воситалардан бири холос. Шундай экан, демократик ислоҳотлардан инсонга инсондек муомала қиладиган тузум барпо бўлишини умид қилиш гўлликдан бошқа нарса эмас. Инсонга инсондек муомала қиладиган тузум фақат Исломдагина мавжуд. Исломда ҳатто асирга тушган душман аскарларига ҳам яхши муомалада бўлиш буюрилган. Қолганларга қандай муомалада бўлинишини эса, ўзингиз тасаввур қилиб олаверинг!
Хабар (кун.уз 25.03.2023й): Президент администрацияси Ижро этувчи аппаратининг Коммуникациялар ва ахборот сиёсати бўйича шуъба мудири Саида Мирзиёева Оқ уйда Жо Байденнинг ёрдамчиси ва АҚШ президенти администрациясининг гендер сиёсати бўйича Кенгаши директори Женнифер Кляйн билан учрашди. Суҳбатнинг асосий мавзуларидан бири – хотин-қизларни гендер зўравонликдан ҳимоя қилиш ва Ўзбекистонда унга йўл қўймаслик учун амалга оширилаётган ишлар бўлди… Қайд этилишича, Женнифер Кляйн бу борада амалий ёрдам беришни таклиф қилган.
Изоҳ: Гендер тенглик Ғарб, хусусан Американинг мусулмонлар қўлига ялтироқ идишда тутқазмоқчи бўлаётган заҳри қотил нарсадир. Бу борада конституцияга ҳам ўзгартириш киритилгани ўзбек ҳукуматининг бу заҳарни қабул қилаётганини кўрсатади. Юртимизда гендер тенглик сиёсатининг рамзига ва ҳомийсига айланиб бораётган Саида Мирзиёеванинг Америкага ташриф буюриб, ушбу сиёсат бўйича юқори мартабали расмийси билан учрашуви Американинг юртимиздаги таъсир доирасини кенгайтиришда президентнинг қизидан фойдаланишга ҳаракат қилаётганини кўрсатмоқда. Афтидан, гендер сиёсатини юртимизда кенг ёйилишига хизмат қиладиган ва унинг асосий ташаббускори сифатида гавдаланиши мумкин бўлган энг яхши номзодга айнан президентнинг қизи муносиб кўрилган. Бу бир томондан, иккинчи томондан катта эҳтимол билан айтиш мумкинки, Мирзиёев қизини катта сиёсий доираларга танитиш орқали унга сиёсий вазн бериш ва келажакда уни бир юқори лавозимга тайинлаш режаси ҳам бор. Масалан, Нью-Йоркда ўтган сув масалалари бўйича БМТ анжуманида Саида Мирзиёева Ўзбекистон номидан чиқиш қилиб, Орол денгизи минтақаси бўйича қатор масалаларни кўтарган.
