Ғайрат Дўстов ишидан сабоқлар

بسم الله الرحمن الرحيم

Ғайрат Дўстов билан боғлиқ шов-шувли воқеа бутун Ўзбекистон халқини “оёққа тургизди”. Оддийгина дамас шофёри бир кунда бутун мамлакатга машҳур бўлиб кетди. У артист ҳам, блогер ҳам, қўшиқчи ҳам эмас, у бошқа бирор машҳурлик келтирадиган касбда ҳам ишламайди. Хўш, нимага оддий бир шофёр йигит бунчалик шуҳратга эришди? Бунинг сабаби ҳаммага аён бўлса керак. Бу йигит бутун халқимиз азият чекаётган энергетик инқироздан фарёд чекиб, ҳақиқатларни баралла айтгани учун одамлар ўзидан келиб чиқиб унинг видео ва суратларини тарқатишди. Халқимизнинг дилидаги норозиликни ва ичига ютиб келган “портлаш”ни Ғайрат Дўстов амалга оширгани учун ҳам унинг қамалганидан халқимиз дарғазаб бўлди. Ҳатто ҳукумат сиёсатининг тарғиботчилари бўлган адиблар, жамоат фаоллари, журналист ва блогерлар давлат қароридан норози бўлиб, жафокаш халқимиз изтиробларини эътироф этиш маъносида Ғайрат Дўстовни ҳимоя қилишди. Халқнинг бундай битта фикр, битта “фронт”да бирлашаётганига зарба бериш учун давлат ҳар доимги жирканч воситаларини ишга солди. Режим зулмини оқлаш мақсадида сарой муллавачча ва блогерлари ёрдамида Ғайрат Дўстов шахсига лой чаплаш  уринишлари йўлга қўйилди, бироқ ҳаммаси чиппакка чиқди. Ўзини халқ манфаатларини ҳимоя қилувчи ва ҳақларини ундириб берувчи, деб даъво қиладиган қонунчилик депутати ҳам иши судда кўрилаётган Дўстовни танқид қилди. Миллий тикланиш демократик партияси раҳбари ва Олий Мажлис Қонунчилик палатаси спикерининг ўринбосари Алишер Қодиров “метан болага тушунмадим, барака топкур, ғайратингни байрамдан кейин қил эди, байрамни болаларинг олдида эмас, суриштирув изоляторида ўтказишинг аниқ эди-ку?” деб ёзди. Бу ўринда ҳам масалага демократик нуқтаи назардан қарашнинг қанчалар хатолигини кўришимиз мумкин. Чунки бир шофёр киракашлик қилиб оила боқиши учун сотиб олиши зарур бўлган ёқилғидан маҳрум қилинган бўлса, бундай ота қанақадир байрамни ўтказиш ҳақида ўйлаши мумкинми?! Эҳтиёжи таъминланмай қолган оиланинг кўнглига хурсандчилик сиғармиди?!

Шу ўринда Дўстов ўзига қилинган ноҳақликка нисбатан мусулмон халқимизнинг билдирган муносабати ҳақида айтган гапини алоҳида таъкидлаш лозим. У озодликка чиққанидан сўнг, жумладан, шундай деди: “Мен бир нарсадан хурсандман. Мен ўйловдимки, ҳақиқатдан биз тарқоқ бўлиб кетдик, Қиёмат аломатлари кўриниб қолдими, одамлар бир меҳрсиз бўлиб кетди, ҳамма бир-бирини алдайдиган бўлиб кетдими, ҳеч кимни ҳеч ким билан иши йўқ, деб ўйлардим. Йўқ, нотўғри ўйларканман. Ҳали бизни ватанимизда яхши инсонлар, адолатли инсонлар кўпакан… Барибир озгина адашиб бўлсаям яхши иш қилган одамни миллионлаган одамлар қўллаб-қувватларкан”. Ҳа, Ўзбекистоннинг мусулмон халқи ҳақида мана шундай яхши гумонда бўлиш лозим. Юртимиз аҳлида яхшилик бор, чунки улар мусулмонлардир. Бироқ халқимизнинг ҳозирги ҳолати – тарқоқлиги, қўрқоқлиги… унинг устидан юритилган ва ҳануз юритилаётган турли фитна, таҳдид, алдов, таъқиб ва тазйиқлар орқали ўз динидан узоқлаштириш сиёсатининг аччиқ самарасидир. Аввалига худосиз коммунистик режим, ундан сўнг кетма-кет келган тоғут ҳукуматлар томонидан ўнлаб йиллар давомида ўз динидан йироқлаштириб келинмоқда. Халқимиз Исломни ўрганиш ва у билан яшашдан маҳрум қилиб келинмоқда. Албатта, бунинг ҳалокатли таъсиридан халқимиз, айниқса ёшларимиз омон қолмаяпти…

Дўстов ишига қайтсак, ҳукумат энергетик инқироз муаммосини кўтарган шофёрни жазолаб, тавбасига таянтиришни ва унинг қисматини бошқаларга ибрат қилишни хоҳлагани суд жараёнида ҳам яққол сезилиб турди. Айбсизлик презумпцияси асосида бетараф ва холис ҳукм чиқариши керак бўлган судья Фаррух Эргашев “панелнийнинг совуғини кўрдиз, арзирмикан жанжал қилишга” деб Дўстовни дағдағали оҳангда сўроққа тутди. Шу зайлда, Мирзиёев ҳукумати халқ ва халқаро ҳамжамият олдида шарманда бўлмаслик учун ҳам Ғайрат Дўстовга тайинланган 15 сутка қамоқ жазосини 8 суткага қисқартирди ва уни суд залидан озод қилди. Бироқ уни оқламади, пушаймонман деган иқрорини олганига қарамай, заправка масъулига ҳам 6 ой ичида судга тафтиш тартибида шикоят (протест) бериш имкони борлигини тушунтирди. Дўстовнинг озод этилиши халқимизнинг уюшган ҳолдаги саъй-ҳаракатининг меваси дейиш мумкин. Халқимиз оз бўлса-да қўрқувни енггани ва уйғонаётгани сабаб давлатнинг адолатсиз қарорига қаршилик кўрсата олди. Биз халқимизнинг бир вакили халқ дардини қисқагина мурожаати билан қанчалар ҳаққоний ифодалаб берганига назар ташлар эканмиз, ҳали бу Умматнинг ичида унинг дардини бутун инсониятга етказа оладиган мард ўғлонлари талайгина борлигидан қувончга тўламиз. Дўстовнинг бир ҳафта ичида чолга айлантириб қўйилганига эътибор берарканмиз, бу Умматнинг нафақат газ, электр каби маиший муаммосини, балки ҳам бу дунёдаги, ҳам Охиратдаги бахт-саодатини ўйлаб ғам чеккан ва биргина фикри, даъвати ортидан 25 йилдан бери қамоқда ўтирганлар ва қанча-қанчаси у ердан ўлик ҳолда қайтарилаётганлар наҳотки унутилсалар?!

Ғайрат Дўстов иккинчи видеочиқишида “ҳақиқатни айтганим учун мени бугун ички ишлар чақира бошлаяпти”, деди ва ўзини ҳимоя қилиш мақсадида “мен ҳеч қандай бир оқимга аъзо эмасман”, деди. Бунинг боиси шуки, энергетик инқирознинг туб илдизлари қаерда эканлигини кўрсатиб, унинг муваффақиятли ечимини шаръий асосда баён қилиб келаётган Ҳизб ут-Таҳрир исломий партияси Ўзбекистонда фаолият юритади. Ҳизб Ўзбекистоннинг ерости ва ерусти бойликлари Уммат мулки ҳисобланиши ва у халқимизнинг эҳтиёжидан ортиб қоладиган даражада кўплигини доим эслатиб, ҳукуматнинг хиёнатлари ва кирдикорларини фош қилиб, халқимизни ўз ҳақларини талаб қилишга чақириб келади. Бундай даъватлар ва аниқ фактлар асосидаги танқидлар қаршисида ҳукуматнинг ёпишиб олган баҳонаси аҳоли кўпайиши, энергияга бўлган талабнинг ортиши ва шулар туфайли узилишлар ҳалигача кузатиляпти, дейиш бўляпти. Ваҳоланки, Ислом Каримов ресурсларимиз 50 миллион аҳолига етади, деган бўлса, Шавкат Мирзиёев бу бойликларга қўшимча янги конлар очилаётгани ҳақида халқимизни хабардор қилган эди. Уларнинг бу гаплари асосли далиллардан келиб чиқиб айтилган, деб ҳисобланади. Аммо халқимиз то ўзлари талаб қилмагунча ҳукуматдаги бир ҳовуч кимсалар бу бойликларни ўзларига инсоф бериб қайтариб беришмайди. Албатта, халқимиз Ғайрат Дўстовни ҳимоя қилганидек, Ҳизб ут-Таҳрир даъватини қабул қилиб, шу даъвати учун чорак асрдан буён Ўзбекистон қамоқхоналарида ётган фидоий йигитларни озод этилишини ҳукуматдан ўз вақтида талаб қилганларида, бугунги аянчли аҳволга тушиб қолмасди. Чунки халқ ўз қаҳрамонлари ва ҳақ-ҳуқуқлари ҳимояси йўлида бирлашар экан, уларга Аллоҳ мададкор бўлиб, сўзи баланд бўлишида ҳеч шубҳа йўқдир. Аллоҳ таоло дейди:

وَلَيَنصُرَنَّ اللَّهُ مَن يَنصُرُهُ ۗ إِنَّ اللَّهَ لَقَوِيٌّ عَزِيزٌ‎

– “Ва Аллоҳ Ўзига (яъни динига, ҳаққа) ёрдам берадиган зотларни, албатта, ғолиб қилур. Албатта, Аллоҳ кучли, қудратлидир”.  (Ҳаж:40)

Халқимиз совуқда музлаб ўлган чақалоқлар, шароит ёмонлигидан аҳволи оғирлашиб, азоб чекиб вафот этган қариялар ва беморларни бир умр ёдидан чиқармаса керак. Ис газидан заҳарланиб, ҳатто янги келин-куёвларнинг ўлим топиш ҳодисалари ва заправкалардаги турнақатор навбатлар эса афсуски, давом этяпти. Электр тармоқларидаги узилишлар ва газнинг йўқлигидан аксар оилалар ҳозирда ҳам азоб-уқубат чекяпти…

Ўзбек режими ўзининг абсурд сиёсатини хаспўшлаш мақсадида Ҳизб ут-Таҳрир йигитларини халққа қора қилиб кўрсатиб, уларнинг шаънини булғаш учун ҳеч кимга қилмаган туҳмат ва бўҳтонларини уюштириб келмоқда. Ҳизб эса Аллоҳ фарз қилган вазифалардан ҳисобланган Умматнинг туб манфаатларини рўёбга чиқариш учун чинакам курашиб, ўз даъватларида энергетик инқирознинг ҳақиқий ечими Россия, Хитой каби мустамлакачи давлатлар билан тузилган шартномаларни бекор қиладиган, табиий бойликларни ўз эгаси бўлган халққа қайтарадиган Рошид Халифаликнинг тикланишида эканлигини етказишдан чарчамайди. Мусулмон халқимизнинг бугунги вазифаси ўша ёруғ кунларга Аллоҳ етказиши учун Исломни ўрганиш, унга қатъий амал қилиш баробарида, Ҳизб билан ҳақни кўтариб чиқишда ёнма-ён туриш ва ҳукумат олдига дадил талабларни қўйишдир. Бу иш халқимизнинг озгина бирлашиши ва даъватчиларни худди Ғайрат Дўстовни қўллагани каби дастаклаб юбориши билан амалга ошади. Унутмаслик керак, ҳар қандай режим бир мақсад атрофида бирлашган халқ талабларини бажаришга мажбурдир. Шунингдек, Исломий жамоавий фаолият билангина эришилган ютуқлар халқимиз ҳаётини яхшилайди ва давомий бўлади. Аллоҳ таоло айтади:

يَا أَيُّهَا الَّذِينَ آمَنُوا إِن تَنصُرُوا اللَّهَ يَنصُرْكُمْ وَيُثَبِّتْ أَقْدَامَكُمْ

– “Эй мўминлар, агар сизлар Аллоҳга ёрдам берсангизлар, У зот ҳам сизларга ёрдам берур ва жанг майдонида қадамларингизни собит-барқарор қилур”. (Муҳаммад:7)

Ҳизб ут-Таҳрир Ўзбекистон матбуот бўлими аъзоси Абдураҳмон

12.01.2025й