Қалб касаллиги бўлган ҳасаддан эҳтиёт бўлинг!

بِسْمِ اللهِ الرَّحْمٰنِ الرَّحِيم

Дунёдаги жамики нарсалар инсониятни яхши яшаши учун Аллоҳ томонидан берилган буюк неъматлардир. У нарсалар шахсга алоқадор мол-дунё бўладими ёки уммат бойлиги бўлган ер ости, ер усти бойликлари бўладими фарқи йўқ. 

Инсонлар орасида ҳасадгўйлик касали бор бўлиб, бунинг оқибатида инсоннинг обрўси, жони, моли арзимас мато каби бўлиб қолди. Дин олимлари ҳасад нима эканлиги хусусида ўз фикрларини билдириб, ҳасад – бировда бор неъматга очкўзлик билан қараш ва ўша неъматни тортиб олишни қаттиқ хоҳлашдир, дейдилар.

Бутун инсоният бахтли яшаши учун Аллоҳ Субҳанаҳу ҳасаддан қайтариб, уни катта гуноҳлар қаторида зикр қилади.
Аллоҳ Таоло бир қанча оятларда ҳасадни қоралаган ва ҳасадчининг ҳасадидан паноҳ сўрашга чақирган.

Аллоҳ Таоло “Нисо” сурасида:

 أَمْ يَحْسُدُونَ النَّاسَ عَلَى مَا آتَاهُمُ اللّهُ مِن فَضْلِه

– “Ёки Аллоҳ одамларга Ўз фазлидан берган нарсаларга ҳасад қилмоқдаларми?”. (Нисо:54)

Аллоҳ Таоло яна айтади:

قُلْ أَعُوذُ بِرَبِّ الْفَلَقِ  مِن شَرِّ مَا خَلَق  وَمِن شَرِّ غَاسِقٍ إِذَا وَقَبَ  وَمِن شَرِّ النَّفَّاثَاتِ فِي الْعُقَدِ   وَمِن شَرِّ حَاسِدٍ إِذَا حَسَد

– “Тонг Роббисидан паноҳ сўрайман. У яратган нарсалар ёмонлигидан. Ва кириб келган қоронғу кечанинг ёмонлигидан. Ва тугунларга дам солувчилар ёмонлигидан. Ва ҳасад қилган ҳасадчининг ёмонлигидан”, деб айт!”  (Фалақ:1–5)

Пайғамбар с.а.в. дан ривоят қилинган кўп ҳадисларда ҳам, ҳасад қаттиқ қораланиб, катта гуноҳлар қаторида зикр қилинади.

Абу Ҳурайра розияллоҳу анҳудан ривоят қилинади: “Пайғамбар соллаллоҳу алайҳи васаллам: “Мўмин банданинг ичида Аллоҳнинг йўлидаги ютилган чанг ва жаҳаннамнинг олови жам бўлмагани каби банданинг ичида иймон билан ҳасад ҳам жам бўлмайди”, – дедилар”.

Демак, иймон билан ҳасад худди олов билан сувдек бир-бирига тамоман зид нарсалар экан. Бири бор жойда иккинчиси бўлмас экан. Абу Ҳурайра розияллоҳу анҳудан ривоят қилинади:
“Расулуллоҳ соллаллоҳу алайҳи васаллам: “Ҳасаддан сақланинг! Чунки ҳасад яхшиликларни худди олов ўтинни егандек еб юборади”, – дедилар”.

Ҳасадчи инсоннинг қилаётган савоб ишлари бўлса, ушбу ҳасади туфайли бекорга чиқиши, бир сўз билан айтсак, ҳасад бор жойда бирор яхшилик қолмаслигини ушбу ҳадисдан тушуниб оламиз. Яъни занг темирни кемиргани каби ҳасад иймонни кемиради. Аслида бундай ёмон иллатлар мусулмонларда тақвонинг заифлиги ортидан келиб чиқади. Бу эса, Умматни Исломдан узоқлашишининг натижасидир.

Зомра ибн Саълаба розияллоҳу анҳудан ривоят қилинади:
“Пайғамбар соллаллоҳу алайҳи васаллам: “Модомики, ҳасад қилишмаса, одамлар яхшиликда бардавом бўладилар”, – дедилар”.

Хулоса ўрнида айтамизки, ҳасад бор экан, инсонлар ўртасидаги яхшилик ўрнини худбинлик, ёвузлик эгаллайди. Қолаверса, одамлар орасидаги яхшилик ўрнини ҳасад эгалласа, бундай ёвузликка бурканган жамиятнинг ҳалокатга дучор бўлиши шубҳасиздир.

Ҳизб ут-Таҳрирнинг Ўзбекистондаги медиа офиси. Зайниддин

20.02.2020й