بسم الله الرحمن الرحيم

Роя газетаси:

Америка бош штаб бошлиғи Ўрта Шарқ масаласида Мисрнинг асосий рол ўйнашини таъкидлади

23 апрел куни Миср президенти Абдулфаттоҳ Сисий АҚШ армияси бош штаб бошлиғи Жозеф Данфорд билан учрашди. Бу унинг бир ҳафта мобайнида америкалик масъуллар билан учинчи марта учрашиши.

Миср президенти матбуот воизи Ало Абу Зайднинг айтишича, «президент Сисийнинг Данфорд билан учрашувида Миср мудофаа вазири генерал Сидқий Субҳий ва АҚШнинг Қоҳирадаги элчиси қатнашдилар».

Матбуот воизига кўра, Сисий учрашувда «Мисрнинг АҚШ билан ҳамкорликда стратегик алоқаларни ўрнатаётганидан ҳамда барча соҳаларда, шу жумладан, ғоят муҳим ҳисобланган хавфсизлик ва ҳарбий соҳада икки томонлама муштарак алоқаларни ривожлантиришга қаттиқ ҳаракат қилаётганидан фахрланишини» таъкидлади.

Шунингдек, Мисрнинг терроризм ва экстремизм мавзусидаги саъй-ҳаракатларини алоҳида урғулар экан, «бу соҳадаги регионал ва халқаро саъй-ҳаракатларнинг муҳимлигини ҳамда хавфсизлик ва ҳарбий тадбирларга қўшимча, мафкуравий, ижтимоий ва маърифий мавзуларни ўз ичига олувчи стратегия қабул қилинганини» ҳам очиқлади.

Миср президенти матбуот воизига кўра, «Америка армияси бош штаб бошлиғи учрашув чоғида ўнлаб йиллардан бери Миср билан боғлаб келаётган муштарак алоқаларни, жумладан, ҳарбий ва хавфсизлик соҳалардаги муносабатларни мустаҳкамлаш ва ривожлантиришга АҚШнинг қаттиқ аҳамият қаратаётганини билдирди».

Жозеф Данфорд «Миср тинчлик ва барқарорликнинг мустаҳкам пойдевори деган эътиборда, Ўрта Шарқда асосий муҳим ролга эга», деди ҳамда «Вашингтоннинг Қўшма Штатлар учун муҳим ҳамкор сифатида Қоҳира билан мувофиқлашув ва маслаҳатлашувни янада кучайтиришга қаттиқ ҳаракат қилаётган»ини алоҳида урғулади.

Бундан олдин 16 апрел шанба куни Сисий АҚШнинг махсус операциялар бўйича бош қўмондон Жозеф Вотел билан ҳам учрашганди. Жозеф Фотел 2016 йил 30 март куни айни лавозимга тайинланганидан бери Қоҳирага биринчи марта сафар қилиши.

Шунингдек, Миср президенти ўтган чоршанба Қоҳирада АҚШ ташқи ишлар вазири билан ҳам учрашди. Учрашув чоғида «АҚШнинг Мисрда барқарорликни қўллаб-қувватлаш ва муносабатларни янада мустаҳкамлашдаги вазифасига риоя қилажагига умид қилишини» билдирди. (Россия сегодня).

Роя газетаси шарҳи:

Мисрга бир ҳафта мобайнида америкалик ҳарбий ва сиёсий масъуллар уч маротаба келди. АҚШ ташқи ишлар вазири Жон Керри сафари охирида яқин орада Мисрга яна қайта ташриф буюриб, мисрлик масъуллар билан сўзлашувларни такомиллаштиражагини таъкидлади. Буларнинг барчаси Американинг бундай зиёратлар уюштиришига ундаётган ғоят муҳим масала мавжудлигига далолат қилади.

Миср Америка учун минтақада асосий таянчлардан бири саналади. Буни АҚШ армияси бош штаби бошлиғининг «Миср тинчлик ва барқарорликнинг мустаҳкам пойдевори деган эътиборда, Ўрта Шарқда асосий муҳим ролга эга», деган сўзлари ҳам тасдиқлаб турибди.

Ҳозир Миср режими сиёсий ва иқтисодий кризисга дуч келган. Унга қарши халқ норозилиги кўлами жуда юқори. Шунинг учун кўпинча шундай ҳолат Американинг қатор зиёратларига туртки бўлади. Буни Керрининг Мисрга кейинги сафари чоғида айтган сўзларидан ҳам тушуниб олиш мумкин. Ўшанда у «Америка учун Мисрнинг айни дамда – хусусан, экстремистлар хавфи билан иқтисодиётининг танглиги пайтида – дуч келаётган муаммоларни енгиб ўтишдаги муваффақияти жуда муҳимдир», деди. Кейин «Мен унинг иқтисодиётини кучайтириш, инвестициялар жалб қилиб, иш ўринларини кўпайтиришда биргаликда ҳаракат қилишимиз мумкин бўлган йўллар ҳақида қўшимча фикрларни тақдим этаман», дея қўшимча қилди. Саудия қироли Салмоннинг яқиндаги Миср ташрифи ва икки давлат ўртасида имзоланган иқтисодий битимлар ҳам Сисий режимини жонлантириш мақсадида амалга оширилди. Буларга Мисрнинг «терроризм»га қарши курашдаги ролини ҳам қўшимча қилиш мумкин.

Роя газетасининг 2016 йил 27 апрел чоршанба кунги 75-сонидан