بسم الله الرحمن الرحيم

Роя газетаси:

Америка Фаластин масаласига якун ясаш учун уни инсонпарварлик масаласига айлантирмоқчи бўляпти

Ал-Жазира нет веб-сайти ҳижрий 1439 йил 12 зул-қаъда, милодий 2018 йил 25 июл чоршанба куни нашр қилган хабарда бундай дейилади:

«АҚШнинг БМТдаги доимий вакиласи Никки Хейли араб ва мусулмон давлатларини «фаластинликларга молиявий ёрдам беришни ошириш ўрнига, уларни қўллаб-қувватлаш ҳақида кўпроқ гап сотаётганлик»лари билан танқид қилди. Танқидни, асосан, Миср, Кувайт ва Бирлашган Араб Амирлигига қаратди.

У айни давлатлар билан бирга Жазоир, Тунис, Покистон, Уммон Султонлиги ва Туркия давлатларидан қай бири UNRWAга инсонпарварлик учун маблағ бергану қай бири бермаганлигини бирма-бир келтириб ўтди.

«Фаластинликларга қўшни бўлган бу давлатлар гуруҳи ҳам, Исломий Ҳамкорлик ташкилотига аъзо бошқа давлатлар ҳам, барчаси фақат оғзида сахий давлатлар, бундай «сахий»ларни ҳеч қаердан тополмайсиз», деди Хейли Хавфсизлик Кенгашининг Яқин Шарқ масаласи бўйича йиғинида.

Кейин «Аммо бу ерда Нью-Йоркда гапирилаётган гапларнинг ҳаммаси битта фаластинликни на тўйдиради, на кийдиради ва на унга таълим беради. Билъакс, халқаро ҳамжамият ғазабини келтиради, холос», дея қўшимча қилди.

Хейли Хитой билан Россияни ҳам «фаластинликлар масаласидаги жимжимадор» гаплари учун танқид остига олиб, уларнинг 2017 йилда UNRWAга атиги бир миллион 350 минг доллар беришганини таъкидлади.

«Хусусан, минтақа давлатлари узоқ-узоқлардан туриб олиб, баландпарвоз гаплар йўллаш ўрнига, ҳаракатга келишлари ва фаластинлик халққа чинакамига ёрдам кўрсатишлари пайти келди», деди у».

Роя газетаси шарҳи:

АҚШнинг БМТдаги вакили Никки Хейлининг мусулмон юртларидаги арабу ажам ҳукмдорлар воқеи ҳақидаги бу гапларини, остида ботил яширинган ҳақиқат, дейиш мумкин. Чунки у мусулмон юртлари ҳукмдорларининг Фаластин аҳлига қилаётган хиёнатлари, уларни ёрдамсиз ташлаб қўйишгани, муборак Фаластин заминини яҳудийлардан озод этишдан воз кечишгани учун танқид қилмаяпти. Балки, уларни ўзининг овсар раҳбари Трамп лойиҳасини ижро этиш мақсадида ифлос сиёсий пулларни тўлашлари учун танқид қиляпти. Трамп лойиҳаси эса, Фаластин қочқинлари масаласини сиёсий масаладан оддий инсонпарварлик масаласига айлантиришдан иборат. Токи, Фаластин масаласига ейиш, ичиш ва кийишни истаётган бир оч халқ масаласи сифатида қаралсин… Бу масала юртлари босиб олинган ва шу боис уни қайтариб олишни истаётган халқ масаласи бўлмасин… Уларнинг ёвуз ниятлари мана шу!

Роя газетасининг 2018 йил 1 август чоршанба кунги 193-сонидан