Америка ўз зўравонлигини очиқ намоён қилмоқда, ҳукмдорлар эса унинг мустамлакачилик лойиҳаларига бўйсунмоқда
Матбуот баёноти
Америка ўз зўравонлигини очиқ намоён қилмоқда, ҳукмдорлар эса унинг мустамлакачилик лойиҳаларига бўйсунмоқда
Юртимизда кетма-кет алмашган ҳукуматлар Американинг босимларига тиз чўкишдан тийила олмади. Улар Американинг дунёга ҳукмронлик қилишдаги мустамлакачилик стратегиясини қўллаб-қувватловчи ҳукуматлар сафидан ўрин олишга розилик берди. Бу ҳукмронлик сиёсати бизнинг араб минтақамиз билан бир қаторда Африка қитъасини ҳам қамраб олган. Бунга мисол сифатида Сабсий маъмуриятининг Тунисга НАТОдан ташқари АҚШнинг асосий иттифоқчиси мақомини бериш ҳақидаги Барак Обама қарорига имзо чекканини ҳамда юртимизнинг АҚШ режаси доирасида Африкада кетма-кет саккизинчи йил «Африка Арслони – 2025» ҳарбий машғулотига мезбонлик қилганини кўрсатиш мумкин. Шунингдек, АҚШнинг Африкадаги ҳарбий қўмондонлиги (Африком) қўмондони генерал-лейтенант Дагвин Андерсон АҚШ Конгрессининг қуролли кучлар қўмитаси олдидаги тинглов мажлисида Марокаш билан Тунис қитъада хавфсизликни таъминлаш ва тарқатиш қобилияти энг юқори бўлган ҳамкорларимиз қаторига киради, дея баёнот берди. Америка таъсирининг яна бир кўриниши сифатида, яна шуни ҳам мисол келтириш мумкинки, «TUNISIE TELEGRAPH» сайти хабар қилишича, келаси ҳафта Тунисда кимёвий, биологик, нурланиш ва ядровий (CBRN) хавф-хатарларга қарши курашишга оид илғор ўқув-машғулот тадбирлари бошланади. Бу машғулот АҚШга қарашли мудофаа соҳасидаги таҳдидларни камайтириш агентлиги (DTRA) махсус гуруҳи раҳбарлигида ўтказилиб, унда Тунис қуролли кучларига қарашли ҳарбий муҳандислик қўшинларининг 61-батальони иштирок этади. Ушбу машғулот икки томонлама ҳамкорлик доирасида амалга оширилади.
НАТО денгиз қўмондонлиги эълон қилганидек, «Денгиз қўриқчиси» амалиёти доирасидаги кемалар Тунисга етиб келди. Шу билан бирга, Тунис денгиз флоти Грецияда НАТОга қарашли Денгиз тўсиқ операциялари ўқув маркази томонидан ташкил этилган ихтисослаштирилган ўқув курсларида ҳам қатнашди. Жорий йил 2-12 сентябр кунлари оралиғида бўлиб ўтган ушбу воқеа юртимиз ва халқимиз устидан ҳукмронлик қилиб келаётган сиёсатчилар олиб келган ҳалокатли хавфнинг яққол далилидир. Шунга қарамай, улар бизга тобелик занжирини солиб қўйган ҳолда суверенлик ва уни асраб қолиш ҳақида кўзбўямачилик билан мақтанишда давом этмоқдалар.
Бугун «Тунис ва Америка ўртасидаги ҳарбий ва хавфсизлик ҳамкорлиги» деган ниқоб остида ана шундай адаштириш ҳаракатлари амалга оширилаётган экан, биз Ҳизб ут-Таҳрир — Тунис вилояти аъзолари ушбу Зайтуналар юрти аҳлини қуйидаги ҳақиқатлар билан огоҳлантирамиз:
Ўзини биз билан ишонч ўрнатиш ва ҳарбий операцияларга тайёргарликни мустаҳкамлашга уриняпти, деб кўрсатаётган Америка аслида Қатарга хиёнат қилди: у сионистик тузилманинг Давҳага зарба беришига йўл қўйиб, музокара олиб бораётган Ҳамас делегациясини ҳам сотди. АҚШнинг ветоси 2025 йил 18 сентябр, пайшанба куни олтинчи маротаба БМТ Хавфсизлик Кенгашининг қарорини тўхтатиб қўйди. Мазкур қарор Ғазога қарши урушни дарҳол, доимий ва ҳеч қандай шартсиз тўхтатиш ҳамда сионистик қотиллик машинаси ва мусулмон ҳукмдорларининг шармандали позициялари туфайли қонга ботирилган халқимизга инсонпарварлик ёрдамлари киришини тўсиб турган чекловларни бекор этиш талабини ўз ичига олган эди.
АҚШ мусулмонлар қонини қадрламаслигини ва бизга нисбатан очиқ душманлигини, айниқса 2023 йил 7 октябр воқеаларидан сўнг, яширмай қўйди. У бу юзсизлигини Ғазо ва Ғарбий соҳилда, шунингдек Ливан, Эрон, Яман ва Сурияда намоён қилди; яқинда эса ҳатто «ҳамкорим» деб атаган Қатарга нисбатан ҳам шундай қилди. У яҳудий вужудини ўзининг ғаддор қўли етадиган барча мусулмон юртларида очиқдан-очиқ қўллаб-қувватлади.
Америка шу тариқа сионистик тузилмани моддий ва ҳарбий жиҳатдан қўллаб-қувватлади: молиявий ёрдам кўрсатди, қурол-яроғ ва ҳарбий жиҳозлар етказиб берди; Унинг жиноятларини расмий сиёсий баёнотлар ва ҳуқуқий ниқоб орқали қўллаб-қувватлади; унга қарши чиқарилиши мумкин бўлган барча айблов қарорларининг қабул қилинишига тўсқинлик қилди. Бундан ташқари, у европалик ҳамкорлари ва араб иттифоқчиларига босим ўтказиб, Ғазодаги аҳлимизни изоляциядан чиқаришга қаратилган ҳар қандай ҳаракатни, шунингдек, сионистик тузилма ёки унинг урушидаги қотилларига қарши мустақил позициялар ва чора-тадбирларни блоклашга интилди. У бирорта имкониятни қўлдан бой бермасдан, бу тузилманинг жиноятларини қўллаб-қувватлади ва Фаластин халқига қарши олиб борилаётган геноцид урушида унга тўлиқ шерик эканлигини очиқ тасдиқлади.
Биз Американинг икки ҳафта муқаддам Туниснинг қўшниси Ливиядаги вазият устидан тўлиқ назорат ва ҳукмронлик ўрнатганини Римда бўлиб ўтган махфий саммитда очиқ намоён этганига гувоҳ бўлдик. Ушбу назорат ва ҳукмронлик юртдаги парчаланишни мустаҳкамлаш ҳамда рол ва манфаатларни ташқи ҳамкорлар ва мамлакат ичидаги янги раҳбарлар ўртасида тақсимлаш орқали амалга оширилмоқда. Бу жараёнда биринчи даражада манфаатдор бўлган қўшни давлатлар — Тунис, Жазоир ва Миср эса Американинг бундай сиёсий ва хавфсизлик ҳаракатларига мутлақо сукут сақлаш билан чекланди.
Тунис ҳам иқтисодий ва сиёсий санкциялар таҳдидидан омон қолмади. Айни вақтда унинг сиёсий раҳбарлари ҳануз минтақада Америка ўтказаётган кўплаб ҳарбий машқ ва манёврларда фаол иштирок этиш ва ҳамкорлик қилиш сиёсатини давом эттирмоқда. Ҳолбуки, бу машғулотларнинг асл мақсади — мустамлакачилик эканлиги аллақачон ошкор бўлган. Жумладан, Ўрта ер денгизининг жанубий соҳили ва Фаластиннинг ғарбий қисми устидан назорат ва ҳукмронлик ўрнатиш каби мақсадлар шулар жумласидандир. Токи бунинг натижасида келгинди яҳудийлар ўз турар-жойларини кенгайтириш имконига эга бўлсин, Уммат эса Ғазо аҳли учун кучларини бирлаштириб ҳаракат қилиш ва сионист тузилманинг қирғин машинасини тўхтатиш имкониятидан маҳрум этилсин. Зотан, бу қирғин машинаси АҚШ томонидан ёқиб берилган яшил чироқ остида ҳаракат қилмоқда.
Эй Туниснинг эр кишилари, мужоҳидлар авлоди!
Биз Ҳизб ут-Таҳрир — Тунис вилояти қуролли кучларимиз Америка қўшинлари билан бирга қатнашадиган ҳар бир машқ ва тадбирда доим шуни таъкидлаб келдикки, ўз адоватини очиқ эълон қилган, халқимизга доимий таҳдид солиб турган ва юртимизни тортиб олишга интилаётган бу душман билан ҳамкорлик қилишдан ҳеч қандай яхшилик кутиш мумкин эмас. Айниқса, бу ҳамкорлик уруш даврида амалга оширилса, бу йиллар ўтса ҳам ўчмайдиган оғир жиноят бўлиб қолади. Армияларимиздан душман лойиҳаси йўлида фойдаланиш эса зобит ва аскарларимиз учун ҳақоратдир. Зеро, бошқа мусулмонлар каби улар ҳам ўз динларига нусрат беришга, Умматларини, тупроқларини ва муқаддас даргоҳларини ҳимоя қилишга ташна бўлиб турибдилар. Аллоҳ Таоло бундай деган:
﴿وَلَا تَرۡكَنُوٓاْ إِلَى ٱلَّذِينَ ظَلَمُواْ فَتَمَسَّكُمُ ٱلنَّارُ وَمَا لَكُم مِّن دُونِ ٱللَّهِ مِنۡ أَوۡلِيَآءَ ثُمَّ لَا تُنصَرُونَ﴾
«Зулм йўлини тутган кимсаларга таянманглар (эргашманглар). Акс ҳолда сизларга дўзах ўти етар. Сизлар учун Аллоҳдан ўзга бирон дўст йўқдир. Кейин (яъни золимларга эргашсангиз) сизларга ёрдам берилмас» [Ҳуд 113]
Ҳизб ут-Таҳрирнинг Тунисдаги матбуот бўлими
