Аёлларга нисбатан зўравонликлар демократик тузумдан келиб чиқмоқда

بِسْمِ اللهِ الرَّحْمٰنِ الرَّحِيم

Ўзбекистон 1991 йил суверен демократик республика сифатида мустақил бўлганини ва капиталистик иқтисодиётга асосланган бозор иқтисодиётига ўтишини эълон қилди. Бунинг натижасида халқимиз оз вақт ичида барча нарсани пул билан ўлчашга, алоқаларини моддий манфаатга асосан юритишга кўника бошлади. Натижада оталар ўғрилик, порахўрлик ва ёлғон аралашган пулини фарзандларига кўнгил розилиги билан едирадиган бўлди. Оналар уйга олиб келинаётган нарсаларнинг ҳалолдан келяптими йўқми суриштирмай, аксинча кўпроқ пул ишлаб топишга, бойлик тўплашда бошқалардан ортда қолмасликка эрларини мажбурлай бошлашди. Оналар фарзандларининг дини, ахлоқ-одоби, тарбияси ва билими ҳақида қайғуриш ўрнига, кўчада тарқатилаётган ва телевидениеда кўрсатилаётган ҳаётнинг ялтироқлигидан кўзлари қамашди. Эрлари “замонавий ҳаёт” билан таъминлай олмаса, аёлларнинг ўзлари пул топиш учун кўчага чиқа бошлашди. Бир тарафда ишсизлик ва камбағаллик ортиб борар экан, покиза аёллар нотўғри йўлларга кирди, оқибатда ҳимоячи ҳисобланган оталарнинг шафқатли қўллари ожизаларнинг қонига беланди.

Ҳукумат эса, бу пайтда Ислом ва мусулмонларга қарши уруш эълон қилиб, ҳеч кимга ҳеч қандай жабр етказмаган диндорларни қамаш учун турмалар қураётган эди. Кейин ҳукумат Ислом олимларидан тортиб оддий намозхонларгача қамагач, аҳолига Исломни етказадиган, эрлик ва аёллик мажбуриятларини уқтирадиган ғамхўр даъватчилар қолмади. Натижада давлат белгилаб берган ҳукмларни ва фикрларнигина гапира оладиган имомларнинг ваъз-иршодлари муаммоларни баттар чигаллаштирди, мусулмонларни Исломдан бегоналаштирди. Бугунга келиб эса, аёлларга алоқадор муаммолар катталашиб жуда хатарли тус олди. Чунки Ўзбекистонга Саида Мирзиёева фаоллигида Ғарбнинг гендер тенглик ташкилотлари бузуқ фикр ва низомлари билан кириб келишди. Эндиликда “CEDAW” конвенцияси каби бошбошдоқлик пайдо қилиш ва оила қуришга қарши чиқишга чақирадиган ташкилотларнинг таъсири ортиши хавфи пайдо бўлди. Мустамлакачи Ғарб яхши биладики, мусулмон оила тинчини йўқотса ва Исломийликдан чиқарилса диндор насллар етишиши тўхтайди. Натижа мусулмонлар бутун Умматни бирлаштирадиган ва Ислом билан ҳукм юритадиган қудратли Давлатларини тиклай олмайди. Шубҳасиз, халқимизнинг бундай ўзгаришга юз тутишига давлат қабул қилган демократик тузум ва ҳукумат татбиқ қилаётган зўравон сиёсат асосий сабабдир.

Аёлларни реабилитация қилиш ва мослаштириш республика маркази директори Муқаддам Расуловага кўра, жорий йилнинг 10 ойида 4 518 нафар хотин-қизларга нисбатан турли зўравонликлар содир этилган. Шунингдек, Муқаддам Расулова тазйиқ, зўравонликдан жабр кўрган, ўз жонига суиқасд қилган ёки ўз жонига қасд қилишга мойиллиги бўлган хотин-қизларнинг мурожаат қилишлари учун 1146 “Ишонч телефони” ишга тушганини таъкидлаган.

Юқорида қайд этилган чора билан ҳукумат муаммонинг сабабларини эмас, оқибатларини бартараф қилишга уринмоқда. Зотан, бу каби муаммоларнинг тўғри ечимини демократияни байроқ қилган Ғарб давлатлари ҳам, уларга кўр-кўрона эргашаётган бошқа мусулмон ўлкалари ҳам топа олмаган. Шунингдек, аёлларга нисбатан бўлаётган зўравонликларни камайтириш учун айрим давлатларда “аёллар вазирлиги” ташкил қилиниб, уларга катта маблағ ва куч сарфланишига қарамай ижобий натижага эришилмаётгани расмий манбалардан маълум.

Ўзбекистондаги мусулмонлар қандай муаммоларга кириб бораётганини ҳукумат ҳалигача тушуниб етмади. Олий Мажлис Қонунчилик палатаси депутати, O'zLiDeP фракцияси аъзоси Барно Мирзамова “Шавкат Мирзиёев раислигида ўтган видеоселектор йиғилишида, узум етиштириш ва виночилик саноатини ривожлантириш мақсадида Қорақалпоғистон ва вилоятлардаги 44 та туманда янги экспортбоп узум плантациялари барпо қилинади. Шунингдек мазкур тармоқни ривожлантириш билан боғлиқ ишларни молиявий жиҳатдан қўллаб-қувватлаш, рағбатлантириш бўйича тегишли ташкилотларга топшириқлар берилди” деди.

Ҳеч кимга сир эмаски, дунё давлатларида бўлгани каби Ўзбекистонда ҳам аксар жиноятларга маст қилувчи ичимликлар ичиш сабаб бўлмоқда. Демак, давлат алкогол маҳсулотларига тақиқ киритса, аёлларга нисбатан бўлаётган зўравонликларни кескин камайтиришга имкон яратган бўлади. Ҳукумат эса, алкогол маҳсулотларига бўлган ички эҳтиёжни тўла қондиришни ва четга экспорт қилишни ўз олдига мақсад қилиб қўйган. Бундан ташқари, Мирзиёев сиёсати аёллар шаънига номуносиб муомалада бўлиш билан оммага ёмон ибрат бўлмоқда. Арз-додини ҳукуматга етказиш учун машиналар йўлини тўсишдан ўзга чораси қолмаган аёлларнинг талаби қондирилмай турли жазоларга тортилаётгани фикримизга яққол далилдир. Бундай шафқатсизларча муносабат бир қанча вилоятларда кузатилди.  Бундан ҳам даҳшатлиси Қуръони Каримдан дарс берган айбсиз онахонларни жазога тортиб, бу ҳам етмагандек уларни ҳужжатли филмда жиноятчи сифатида кўрсатилиши кечирилмайдиган оғир гуноҳдир!

Таъкид билан айтамизки, хотин-қизларга нисбатан зўравонлик муаммоси Давлат даражасида Ислом ҳукмлари татбиқ қилинсагина барҳам топади. Дарҳақиқат Росулулоҳ ﷺ Ислом ҳукмларини ижро қилиш учунгина Мадинада давлат барпо қилдилар ва видолашув ҳажида Ислом ва унинг татбиқига доир энг муҳим масалаларга тўхталиб, аёлларнинг ҳақлари ва бурчларини алоҳида таъкидлаганлар. Зеро, Исломгина жон ва мол фидо қилиниб эришиладиган жаннатнинг оналар оёғи остида эканини таъкидлаган. Қиз фарзанд ва рафиқани эркак учун Аллоҳнинг хос омонати эканини уқтирган. Барча муслималарни эса, асралиши ва ҳимоя қилиниши зарур бўлган номус деб қатъий белгилаган. Ҳукм ва ҳикмат соҳиби бўлган Аллоҳ айтади:

فَإِمَّا يَأْتِيَنَّكُمْ مِنِّي هُدًى فَمَنِ اتَّبَعَ هُدَايَ فَلَا يَضِلُّ وَلَا يَشْقَى

– “Бас, сизларга Мен тарафдан ҳидоят келганида ким Менинг ҳидоятимга эргашса, йўлдан озмас ва бахтсиз бўлмас”.                                         (Тоҳа:123)

Ҳизб ут–Таҳрирнинг Ўзбекистондаги матбуот бўлими аъзоси Абдураҳмон

13.01.2022й