Матбуот баёноти

Бангладеш муваффақият ва тараққиётга эришиш учун мустамлакачи Ғарб давлатларига интилмаслиги керак, акс ҳолда, АҚШ-Ҳиндистон геосиёсатининг қурбони бўлади

Сешанба куни Нью-Йоркда БМТ Бош ассамблеясининг 79-сессияси доирасида бўлиб ўтган учрашувлар чоғида Бангладеш муваққат ҳукумати бош вазири доктор Муҳаммад Юнус сўзга чиқиб, дунё раҳбарларини янги Бангладеш қурилишини қўллаб-қувватлашга чақирди. Унинг нутқи ортиданоқ АҚШ президенти Жо Байден «Модомики, бангладешлик талабалар ўз юртлари учун шунча кўп нарсани қурбон қила олган эканлар, демак, Қўшма Штатлар ҳам кўпроқ нарса қилиши керак», деди. Аввалроқ доктор Юнус АҚШ молия вазирининг халқаро молия бўйича ёрдамчиси Брент Нейман бошчилигидаги АҚШ делегациясини Даккада қабул қилиб, молиявий ёрдам сўраган эди. Ўз навбатида, АҚШ делегацияси ҳам муваққат ҳукумат билан ҳамкорлик қилиш бўйича ўзининг қатъий мажбуриятини билдирди. Дарҳақиқат, икки давлат ўртасида аллақачон имзоланган шартномада Қўшма Штатлар Бангладешга тараққиётни қўллаб-қувватлаш учун 202 миллион доллар ёрдам бериши айтилди.

Ҳизб ут-Таҳрир – Бангладеш вилояти муваққат ҳукуматни қуйидаги насиҳатларга эътибор беришга чақиради:

Биринчидан:

Нега биз Бангладешни қайта қуриш учун доимо мустамлакачи Ғарб давлатларидан «ёрдам» исташимиз керак?! Илгари тоғут Ҳасина ҳам АҚШ ва бошқа Ғарб давлатларидан мана шундай ёрдам олишга уринган. Бугун Америка муваққат ҳукуматни қўллаб-қувватлаётганидек, кеча золим Ҳасинага ҳам худди шундай ёрдам кўрсатган. Ҳасинага ўзларининг геосиёсий манфаатларига хизмат қиладиган тоғут бўлишига ундаган ҳам айнан мана шу макиавелли Ғарб давлатлари эди. Бинобарин, халқ томонидан Ҳасинанинг ағдарилиши, аслида, Ғарб дунёси тизимига ва унинг гегемонлигига қарши курашдир. Одамлар берган қурбонликлари, иродалари ва интилишлари мамлакатни Ҳиндистон ва ғарблик мустамлакачилар чангалига тушириш учун бўлгани йўқ. Шунинг учун биз муваққат ҳукуматга ҳокимият ва қонунийлик мустамлакачилардан келади, деган фикрдан воз кечишни маслаҳат берамиз. Сиз ўз кучингизни халқдан олишингиз керак. Сизнинг ҳаракатларингиз халқнинг иродаси ва хоҳишини ифодалаши даркор. Шунинг учун Ҳинд-АҚШ геосиёсий ўйинининг пиёдасига айланиб қолмаслик учун мустамлакачи АҚШга нисбатан ҳушёр бўлишингиз лозим. Эслатиб қўяйлик, Америка Ҳинд-Тинч океани минтақасидаги ўз стратегиясининг бир қисми сифатида, Ҳиндистон билан мудофаа ва хавфсизлик муносабатларини аллақачон сезиларли даражада чуқурлаштирган. АҚШ билан қўшни душманимиз ўртасидаги бундай стратегик ҳамкорлик Бангладеш учун жуда ёмон оқибатларга олиб келади.

Иккинчидан:

Шундай оғир паллада юртимиз учун зарур бўлган қўллаб-қувватлов ажнабийдан кўра кўпроқ халқнинг кучли гуруҳлари ўртасидаги бирдамликдир. Ҳиндистон тил бириктирувига қўшимча, сўнгги ўн беш йил ичида Ҳасина режимининг давлатдаги ҳар бир аппаратга экиб ташланган жосуслари зарба бериш учун қулай фурсат пойлаб турибди. Шунинг учун муваққат ҳукуматнинг устувор вазифаси барча аксил-империалист, ватанпарвар ва исломчи кучларни бирлаштириб, душманларимиз ва уларнинг маҳаллий малайларига қарши курашиш бўлиши керак. Шуни билайликки, ушбу бирлаштириш жараёни Ҳизб ут-Таҳрирга нисбатан қўйилган ноқонуний тақиқни бекор қилишдан бошланиши лозим. Чунки Ҳизб ут-Таҳрир мустамлакачи кучларга қарши бўлган, юрт ва Исломга ёрдам берадиган асосий кучлардан биридир. Бинобарин, Ҳизб ут-Таҳрирни юртимиздаги сиёсий жараёндан ташқарида қолдириш билан ушбу ҳал қилувчи чорраҳада бирдамлик мафкурасини тасаввур қилиб бўлмайди. Ҳасина шуғулланиб келган камситиш ва мустабидликни ўз ҳолида қолдириш билан мамлакат суверенлигига эришиш мумкин эмас. Биз муваққат ҳукуматни ушбу холис насиҳатимизга қулоқ солишга чақирамиз. Аллоҳ Азза ва Жалла шоҳидимиз бўлсинки, бизнинг сизга ҳам, халқимизга ҳам яхшиликдан ўзга ниятимиз йўқ. Шунинг учун ғарблик мустамлакачиларга эҳтиёткорлик билан ёндашинг. Чунки сиз томондан ташланган ҳар қандай заиф қадам душманимиз майдонида бизни мағлубиятга дучор этади.

﴿وَٱلۡمُؤۡمِنُونَ وَٱلۡمُؤۡمِنَٰتُ بَعۡضُهُمۡ أَوۡلِيَآءُ بَعۡضٖۚ يَأۡمُرُونَ بِٱلۡمَعۡرُوفِ وَيَنۡهَوۡنَ عَنِ ٱلۡمُنكَرِ﴾

«Мўмин ва мўминалар бир-бирларига дўстдирлар. Улар яхшиликка буюрадилар, ёмонликдан қайтарадилар»                                        [Тавба 71]

Ҳизб ут-Таҳрирнинг Бангладешдаги матбуот бўлими

0

0