بسم الله الرحمن الرحيم

Роя газетаси:

Барзоний яна Ироқдан ажралиб чиқишга чақирмоқда

Ўтган жума куни Ироқ Курдистон вилояти раҳбари Масъуд Барзоний яна Ироқдан ажралиб чиқишга даъват қилди. У курдларнинг «ўз лойиҳаларида ва давлатларини таъсис этишда давом этажакларини» таъкидлар экан, Ироқдан ажралиб чиқиш лойиҳаси хусусида эронликларни ҳам, туркларни ҳам рози қиладиган бирорта гапни асло гапирмаслигини билдирди.

Курд тилида тарқатилувчи ахборот воситаларида тарқатилишича, Барзоний «Мен илгари ҳам таъкидлаганман. Агар яна қон тўкадиган бўлсак, бу фақат мустақиллигимиз учун тўкилади, бошқа нарса учун эмас. Шу боис мана шунга ҳаракат қилиб, қонларимиз беҳуда тукилишига йўл қўймаслигимиз лозим», деди.

Кейин бундай қўшимча қилди: «Истиқлол ҳуқуқимиздир, унинг йўлида курашамиз ва бундан асло воз кечмаймиз. Истиқлол ким томонидан эълон этилиши муҳим эмас, ҳатто гўдак ҳам буни айтиши мумкин. Бу борада бизни қўллаб-қувватлайдиган ҳар қандай кишига ташаккур билдирамиз. Токи, шаҳиднинг онаси – ўғлимнинг қони нима учун тўкилди, деб сўраганда, унга жавоб қила олайлик». Унга кўра, «Хайрон қоладигани, Курдистондаги курдлар орасида истиқлолни рад этадиганлар ҳам борлигидир». Барзоний Анқара билан Теҳроннинг Курдистон мустақиллигига нисбатан позициялари тўғрисида гапирар экан, ҳаргиз уларни рози қиладиган, аммо мустақилликка зид бўлган сўзларни гапириш учун Эрон билан Туркияга бормаслигини билдирди. У Қўшма Штатларга масала соҳиблари бизмиз, «ё ҳалок бўламиз, ёки қон тўкиб истиқлолга эришамиз», дея етказиб қўйганини билдирди. (Арабий Жадид).

Роя газетаси шарҳи:

Ироқ Курдистон вилояти, дея аталаётган минтақа раҳбари Масъуд Барзоний Ироқдан ажралиб чиқишга очиқдан-очиқ даъват қилар экан, унинг бу даъвати мусулмонлар мана шу каби раҳбар ва мансабдорлар дастидан тушиб қолган аянчли аҳволни кўрсатиб турибди. У «Агар яна қон тўкадиган бўлсак, бу фақат мустақиллигимиз учун тўкилади, бошқа нарса учун эмас», деб айтяпти. Ваҳоланки, Ислом мусулмонларга битта давлатда бирлашишни буюрди, алоҳида ажралган ҳолда яшашни ёки бўлинган давлатларини яна парчалашни ҳаром қилди. Ҳатто мусулмонларга исломий юртларни бирлаштириш йўлида жонларини фидо қилишни вожиб қилди. Барзоний курд мусулмонларга етаётган зулмлардан уларнинг орасига низо солишда фойдаланяпти ва шу орқали бошқа мусулмонлардан ажралиб яшашга рози бўлишларини хоҳлаяпти. Бироқ курд мусулмонлари шуни билиб қўйсинларки, бу зулм Шом, Ироқ, Фаластин, Яман, Ливия ва бошқа юртлардаги мусулмонларга ҳам етмоқда. Мусулмонлардан иборат бир халқ ёки қавмнинг бошқа бир мусулмонлардан ажралиб чиқиши Ислом баён қилган ечим эмас. Аксинча Ислом мусулмонларнинг битта давлатда, яъни Пайғамбарлик минҳожи асосидаги рошид Халифалик давлатида бирлашишларини ечим дея баён қилган. Зеро, Халифалик давлати мусулмонларга арабни ажамдан, курдни туркдан… ажратмаган ҳолда қарайдиган Исломни татбиқ қилади. Мусулмонлар шуни унутмасинларки, ажралиб чиқиш ғояси ғарбча мафкура бўлиб, Ғарб давлатлари уни ўтган аср бошларида Исломий Халифаликни қулатишга ҳаракат қилаётган вақтда пайдо қилишган. Кейинчалик Америка ҳам шу мафкура бўйича ҳаракат қилди ва бугун уни кўплаб исломий юртларда амалга оширишга уринмоқда. Айтиш мумкинки, Америка босқинчилиги остида қабул қилинган Ироқ конституциясида федерал бошқарув қайд этилганлиги ва Ироқда вилоятлар пайдо қилишга рухсат берилганлиги бугун биз гувоҳи бўлаётган аҳволга сабабдир. Бундан ташқари, Америка Ироқ халқининг барча тоифаси ажралиб чиқишни қабул қилишлари учун сунний ва шиа мусулмонлари ўртасида бир-биридан нафратланиш уруғини сочди. Шунинг учун ажралиб чиқиш ҳаром бўлгани сабабли, унга қарши курашмоқ ва уни барбод этмоқ зарур. Шариатимиз бўлинишга қарши курашда қурбонлар беришга ҳамда Ғарб давлатларининг мустамлакачилик режалари, деган эътиборда, ажралиб чиқишни йўқ қилишга буюради. Мусулмонларнинг ўз динларини тушуниши кенгайиб бормоқда. Ғарб давлатлари исломий юртларнинг бирида пайғамбарлик минҳожи асосидаги рошид Халифалик тикланишидан қўрқмоқда. Албатта бу нарса мустамлакачи давлатлар нуфузига хавф туғдиради. Шунинг учун шу даврда Ғарб давлатлари минтақани мустамлакачилар манфаатига мос қадам ташловчи янгича бир шаклда ташкил қилишни кўзлашмоқда.

Роя газетасининг 2016 йил 16 март чоршанба кунги 69-сонидан