Биз йўл қўяётган энг катта хато

بِسْمِ اللهِ الرَّحْمٰنِ الرَّحِيم

Биз ўзимизга берилган умрни яшаб ўтар эканмиз, катта-кичик хатоларга йўл қўямиз. Уларнинг ҳаётимизда қолдирадиган изи ҳам шунга яраша бўлади. Албатта хато қилиш инсон табиатига хос бўлган табиий ҳолатдир. Лекин биз мусулмонлар ҳаётимизга, турмуш тарзимизга ҳалокатли таъсир кўрсатаётган энг катта хатога йўл қўяётганимизни англаяпмизми? Биз аслида диққат марказимизда бўлиши лозим бўлган нарсага жуда беэътиборлигимиз туфайли қандай катта хатога йўл қўяётганимизни сезмаяпмиз ҳам. Чунки хатони хато эканлигини тушуниш учун тўғрининг ўзи нима эканлигини англаш лозим бўлади. Бизда айнан тўғри нима эканлигини яхши тушуниб олиш ва шундан сўнг унга қатъий амал қилиш борасида хираликлар кўпайиб кетди. Йўл қўйилаётган катта хатонинг илдизи ҳам шунга бориб тақалади.

Бизнинг энг катта хатомиз шуки, мусулмон бўлган ҳолимизда ўз муаммоларимизга ечимни ўзимиз эътиқод қилаётган Ислом ақидасидан бошқа нарсадан излаяпмиз. Бу ҳолатимиз кўзойнакни тақиб олиб, кўзойнагини қидираётган одамнинг ҳолатига ўхшайди. Биз ўзимизда бор нарсани кўра олмаяпмиз. Қўлимизда ишончли, Яратувчимиз томонидан кафолатланган, бахт-саодат эшикларини очадиган дастури амал бўла туриб муаммоларимизни қандайдир бошқа нарсалар билан муолажа қилишга интиляпмиз. Бошқа халқларнинг тараққиёти сабабларини нотўғри тушундикми ёки уларнинг яшаш тарзидаги баъзи нарсалар кўзимизни қамаштирдими, хуллас фақат бизда мавжуд бўлган ва ўша ўзимиз ҳавас қилаётган халқлар ҳасад қиладиган Шариатимизга ўта беэътибормиз. Ҳақиқатдан ҳам бир ўйлаб кўринг, ўша халқларда Ислом Шариатига ўхшаш нима бор? Шариат бизга татбиқ қилиш учун тайёр лойиҳа сифатида Аллоҳ томонидан берилди. Бошқа умматлар эса, Аллоҳнинг шундай буюк неъматини рад қилиб, ўзларига “шариат” тузишга киришишди ва буни ҳали ҳам охирига етказа олишмаяпти. Чунки воқеликда кўриниб турибдики, улар қонун кетидан қонун чиқаришяпти, эскисини ўзгартиришяпти ё татбиқ қилинишини тўхтатишяпти ва ҳоказо. Бироқ мукаммал ҳолатга келтира олишмаяпти, келтира олишмайди ҳам.

Исломий Шариатимиз эса, бизга мукаммал қилиб берилди, унда ҳеч қандай хато-камчилик йўқ. Инсон ўзининг ҳар қандай муаммосига Исломдан ечим топа олади ва бу ягона тўғри ечимдир. Биз мусулмонлар буни тушуниш учун Исломимизга бўлган муносабатимизни ўзгартириб, унга ўзи талаб қилган эътиборда қарашимиз лозим. Яъни Исломга уни ҳаётга татбиқ қилиниши зарур бўлган тузум, деган эътиборда қарашимиз шарт. Шундай қараш билан юқорида айтилган катта хатомизни тўғрилаш сари қадам ташлаймиз. Зеро, мусулмон учун бундай хатога йўл қўйиш мумкин бўлмаган ишдир.

Ҳизб ут-Таҳрирнинг Ўзбекистондаги медиа офиси. Фаррух

07.12.2019й