Боламга насиҳат

بِسْمِ اللهِ الرَّحْمٰنِ الرَّحِيم

Болажоним, аввало, шуни билингки, ҳар бир ота-она ўз фарзандини керак бўлса ўзидан ҳам яхши кўради. Шунинг учун ўзида бўлмаган яхши нарсаларни боласига илинади ва боласи эришишини истайди. Албатта, ҳар бир мусулмон ота-она бу дунёда ҳам ва Охират диёрида ҳам яхшиликларга эга бўлишга интилади. Юқорида айтганимиздек, бу ҳолатни фарзандига ҳам раво кўради. Ҳеч ким ўзига ёмонликни хоҳламайди, айниқса ўз зурриёдига. Шунинг учун, болагинам, мени эшитиб тушунишга ҳаракат қилинг.

Болажоним, сиздан илтимос, сиз доим тўғри иш қилишга ҳаракат қилинг. Мақсадингиз доимо тўғрилик бўлсин. Бирор нарсага эришиш учун нотўғри йўлни танламанг, мисол учун ёлғон гапирманг. Аксинча, сиз ҳар бир нарсадан кўра, ҳатто у нарсаларнинг ичида сиз жуда ҳам яхши кўрган нарсалар бор бўлса ҳам, барибир тўғриликни энг керакли, муҳим нарса, деб билинг. Доимо тўғриликка интилинг, сиз тўғриликни кутманг, аксинча унга етиш учун сиз ҳаракат қилинг, изланинг. Тўғрилик аслида сизга жуда яқин бўлиши мумкин, лекин сиз уни танимасангиз, билингки, у сиздан жуда узоққа кетади. Сиз қачонки тўғриликка интилсангиз, шундагина тўғриликни топасиз, танийсиз.

Тўғриликни таниб олгач, сиз ҳеч қачон уни айланиб ўтишга ҳаракат қилманг. Тўғрилик доимо ҳамроҳингиз бўлсин. Озгина вақт тўғриликни унутсангиз, сиз адашиб нотўғриликка қадам қўйишингиз мумкин. Шунинг учун доимо сиз унга яқин бўлинг. Айтганча, тўғриликни сиз ушлаб уни ёнингизда тутиб тура олмайсиз, аксинча уни ушлаб ортидан эргашасиз.

Ўйлаб кўрмай одамларга эргашманг. Айниқса, бугунги кунда одамлар тўғриликдан узоқлашиб кетди. Ва кўпчиликка эргашиш одатга айланди. Шуни билингки, тўғрилик бу кўпчилик айтгани, дегани эмас. Аксинча, баъзида озчиликнинг айтгани тўғри бўлиши мумкин.

Энди тўғриликни таниш йўлини ўргатаман. Бизни ва бутун борлиқни, қуёш, ой, ер, барча юлдузлар, биз кўра оладиган ва кўра олмайдиган ҳамма нарсани яратган бир Зот борки, У Зот, болажоним, сизни ота-онангиздан ҳам кўпроқ яхши кўради. Ва ишонинг, сизни ота-онангизга ва ота-онангизни ҳам сизга У Зот берган. Бу вақтинчалик дунёда У Зот истаганидек яшаб ўтсак, кейинги тугамайдиган ҳаётда бизни жуда ҳам яхши ҳаёт билан мукофотлайди. У Зот биз бу дунёда Ислом дини бўйича яшашимизни истайди. Шунинг учун тўғрилик бу Исломдир. Исломни тўғриликнинг айнан ўзи, унинг ўлчови, деб билинг. Ислом буюрган ишни бажариш ва қайтарган ишни қилмаслик тўғриликдир. Агар биз Ислом буюрганидек яшасак, Яратувчимиз биздан рози бўлади, хурсанд бўлади ва У Зот ваъда қилганидек икки дунёда ҳам бахтга эришамиз. Ин ша Аллоҳ!

Ҳизб ут-Таҳрирнинг Ўзбекистондаги медиа офиси. Абдуллоҳ   

20.02.2020й