Ботил тузум татбиқ қилинар экан жамиятнинг Исломий уйғонишига тўсиқлар бўлаверади
بسم الله الرحمن الرحيم
Ботил тузум татбиқ қилинар экан жамиятнинг Исломий уйғонишига тўсиқлар бўлаверади
Бугун баъзи инсонларга Ўзбекистондаги ҳукуматнинг аҳолига нисбатан муносабатларида нималардир ўзгарганга ўхшаб туюлаётгандир. Лекин татбиқ қилинаётган тузум ўзгармас экан бугунги ҳукуматдан ўзгаришни умид қилиш хато. Ҳукумат бошқарувидаги инсонлар ёки шу тузумни татбиқ қилишдаги услуб воситалар ўзгариши мумкин, аммо бу ҳолатлар жамиятдаги асл ўзгаришга олиб бормайди. Бу тузум татбиқ қилинар экан бир қонхўр малай ўрнига иккинчи қонхўр малай келиб ўтираверади, аввалгиси қувиб юборган, таҳқирлаган, хорлаган инсонларнинг баъзиларига янгиси яхши муносабатда бўлиши мумкин, лекин бу ҳолат умумий жиҳатдан халққа нисбатан муносабатнинг ўзгарганини англатмайди. Хуллас аҳолидаги ҳукуматдан бўлган қўрқув шу ҳукуматнинг қуроли бўлиб қолаверади. Чунки татбиқ қилинаётган ботил тузум ўзгармади, уни татбиқ қилаётган золимларнинг ўрни алмашди, холос.
Айтиб ўтганимиздек бу ботил тузумнинг татбиқ қилинишида маълум бир маънодаги ўзгаришлар бўлиши мумкин. Мисол учун ҳукуматдаги баъзи шахсларнинг ўзгартирилиши, бу ҳукумат маълум маънода ўзини динга муҳаббатлидек тутиши, аҳолига нисбатан аввалги босимларнинг баъзилари енгиллатилиши, қайсидир таниқли шахсларга қўйилган расмий ёки норасмий тақиқлар олиб ташланиши, “иқтисодиётни юксалтириш учун” дея аввалгисидан бошқачароқ ҳаракатлар, келишувлар амалга оширилиши ва бошқалар. Лекин баъзи инсонларга ютуқдек туюлаётган бу ўзгаришлар жамиятни алдаш ва асл юксаклик йўлидан чалғитиш ҳамда ҳукумат бошқарувидаги шахсларнинг манфаати учун, холос. Чунки баъзи ўзгаришлар шу тузумнинг асл моҳиятини йўқотиш учун бўлмайди, аксинча шу тузумнинг асосига мувофиқ бўлганлиги учун ана шу арзимас ўзгаришларга йўл қўйилади. Бу каби чалғитувчи ўзгаришлар тузумни таназзули учун эмас, аксинча шу тузумнинг татбиқини мустаҳкамланиши учун хизмат қилади.
Ўзбекистон ҳукуматидан бўлган қўрқувнинг пайдо қилиниши жамиятда Исломга нисбатан қўйилган катта тўсиқдир. Биз бу тўғрисида кўплаб мақолларимизда айтиб ўтганмиз. Бу ҳолат жамиятда очиқ ойдин намоён бўлиб турган воқеликдир. Бу ҳолатни рад этиш ёки яширишга уруниш оқни қора дейиш билан баробар бўлиб, бундай қилишга уруниш соғлом ақл эгаларига хос бўлмаган ишдир. Аввалдан шакллантирилган бу қўрқув янги бошқарувчилар учун ҳам қўл келиши ва ўз манфаатлари йўлида ҳамда Исломий даъватчиларга тўсиқ бўлишда аҳолининг шу қўрқувидан фойдаланишларига шубҳа йўқ.
Инсоннинг табиатидаги, тадайюн ғаризасининг талаби бўлган ибодат қилиш, сиғинишга интилишни йўқотиб бўлмайди. Чунки инсоннинг яратилиш табиатида ана шу ғариза ва шу ғариза талаблари мавжуддир. Шунинг учун инсон ҳар қандай шароитда ниманидир муқаддаслайди ва нимагадир суянади. Шунинг учун бизнинг жамиятда ҳам ҳукумат томонидан бўлаётган босимлар қанчалик кучли бўлмасин инсонлар барибир қайсидир йўллар билан ўз тадайюнини қондиришга интилаверадилар. Ва бу ҳолатни биз воқеликда кўриб турибмиз. Мисол учун ҳукумат бир неча йиллардан буён мусулмонларга нисбатан очиқ душманлик қилиб уларни Исломга мувофиқ ҳаракат қилишларидан тўсиш мақсадида қамоққа тиқишни авж олдирди, хатто қамоқда кўплари иймонида собит туриб шаҳид бўлдилар, кўчаларда бозорларда ҳам Исломга мувофиқ кийинган ва соқол қўйган мусулмонларга нисбатан тазйиқлар кучайтирилди. Диний адабиётларни қатъий равишда назоратга олди, жиноятчи Каримовнинг шахсан ўзи томонидан интернетга тўсиқ қўйиб бўлмайди деган гаплари ҳам айнан ижтимоий тармоқлардаги Исломий даъватнинг ёйилишига нисбатан қаратилган эди. Шуларга қарамай бизнинг минтақада Исломга нисбатан мойиллик сўнмади, аксинча бу зулмлар ортидан жамиятимиздаги холис мусулмонларнинг иймони мустаҳкамланди, сабрли, Исломда собитқадам бўлишларига сабаб бўлди ва бундай хислатлари билан бизнинг минтақадаги баъзи мўминлар бутун дунё мусулмонларига ўрнак бўлдилар.
Ҳукумат бизнинг жамиятни ботқоққа ботириш учун хизмат қилди ва бугунги кунда ҳам ана шу ҳаракатини тўхтатгани йўқ. Бунинг асосий омилларидан бири унинг жамиятимизда Исломга зид бўлган ботил тузумни татбиқ қилиб келаётганидир. Ҳукумат ва унинг хизматчилари ана шу сабабдан жамиятни тубанлик ва жирканчлик ботқоғига ботиришдан бошқа иш қила олганлари йўқ. Шу ботил тузумни татбиқ қилишда давом этар эканлар уларнинг фаолияти ўзгача бўлиши мумкин эмас. Чунки инсоннинг ақлидан келиб чиққан қонунлар татбиқи бахтсизликка олиб боради, холос.
Ислом барча муаммоларимизга мукаммал ва гўзал ечимлар берувчи, Яратувчи томонидан бизларнинг яшаш тарзимизни тартибга солиш учун берилган диндир. Агарки биз Исломга қараб юрмас эканмиз хорликларга тўлган ҳаётимиздан қутулиб азизликка чиқа олмаймиз ва муаммолар гирдобида қолиб кетаверамиз. Исломдан узоқлашишимиз бизларни бугунгиданда баттарроқ хорлик ботқоғига ботириб, муаммолар гирдобида янада чуқурроқ чўкишимизга сабаб бўлади. Ислом мисоли бизни ботқоқдан олиб чиқиш учун узатилган бақувват арқондир, бу ҳолатда ҳукумат бизларни ботқоқдан чиқариш учун эмас аксинча, ботқоққа янада ботиришга ҳаракат қилаётган жирканчли қўл бўлмоқда. Шунинг учун бу хорликлардан қутулишни истасак, муаммолар гирдобидан озод бўлишга интилмоқчи бўлсак Исломга мос равишда ҳаракат қилайлик. Ислом ҳар қандай замонлар ва маконларда, яъни ҳар турли воқелик ва ҳолатда, ҳар вақтда муаммоларимизга ечим бера олади, бунга ишончимиз комил бўлсин ва буни хеч қачон унутмайлик. Агар биз мана шуларга иймон келтирган эканмиз асло Исломдан чекинмасдан, аксинча Исломга қараб интилайлик.
Ҳизб ут-Таҳрирнинг Ўзбекистондаги медиа офиси Абдуллоҳ
30.09.2016й.
