بِسْمِ اللهِ الرَّحْمنِ الرَّحِيمِ

2015 йилги сайловлар

Британияда яшовчи мусулмонлар диаспорасига: сиёсат билан Ислом асосида муносабатда бўлинг!

Киришиб мослашиб кетманг, узилиб ҳам қолманг, аксинча, бошқалар билан Ислом асосида муносабатда бўлинг

Британияда 2015 йилги сайловлар вақти келди. Мусулмонларга нисбатан бу сайловлар муҳити собиқ сайловлар муҳитидан фарқ қилади. Ўтган 2014 йил мобайнида Британ матбуоти ва сиёсий партиялари ҳалол гўшт ва исломий мактаблар каби масалаларни муҳокама қилиб мусулмонлар ақидасини ва исломий қадриятларини душманларча нишонга олган эди. 2015 йил хавфсизлик ва терроризмга қарши кураш (СТS) қонун лойиҳасини ишлаб чиқиш ҳамда «экстремизмни илдизи билан йўқ қилиш» номи остида мусулмонларни илмонийлаштиришга қаратилган «тақиқ» программасини жорий қилиш билан бошланди. Ҳозир янги бир сиёсат қўлланмоқда. У экстремизмга қарши кураш сиёсати бўлиб, бу сиёсат давлатга мусулмонларни нишонга олишда қўшимча салоҳиятларни беради.

Бу ҳодисалар мусулмонларда – ҳукумат ва ахборот воситаларининг бунчалик душманлигига сабаб нима, фарзандларимиз келажаги нима бўлади, бу сиёсатлар бизни қаерга олиб кетяпти… каби қатор саволлар пайдо қилди. Ҳатто куни кеча Британия Исломдан тўла рози, деган фикрда бўлган мусулмонлар бугун айни фикрларининг тўғрилигига гумон қилиб қолдилар.

Шунинг учун бу сайловлар мусулмонларда ўз келажаклари борасида жиддий саволлар жўш ураётган бир пайтда ҳамда айрим мусулмонлар сайловда овоз бериш билан қатнашишга эҳтирос билан даъват қилишдан чарчамаётган бир пайтда бўлиб ўтмоқда. Ҳозирда мусулмонлар ўзларига нисбатан душманликни бошдан кечираётгани ҳамда кўпсонли мусулмон депутатлар рўйхати муваффақиятсизликка учрагани сабабли сайловда қатнашишга чақиришга уларнинг баҳоналари қолмаган бўлсада айрим мусулмонлар ҳамон эҳтирос билан овоз беришга чақиришмоқда.

Бирлашган Қиролликда яшовчи мусулмонларнинг бу давлат сиёсатидаги фожиали аҳволни англашларига ортиқча вақт керак бўлгани йўқ. Чунки аллақачон сиёсий партиялар бутун жамиятда ишончсизлик, лоқайдлик, бахтсизлик ва қаттиқ тушкунлик пайдо қилишиб бўлган. Зеро, бу сиёсий режимдаги ишонч ўзининг бутун тарихи мобайнида энг паст даражасига тушиб кетган. Сон саноқсиз одамлар бу режимдан қўлларини ювиб, қўлтиқларига урмоқдалар.

Бу сиёсий режим юртда яшаётган соғлом ақида ва мумтоз қадрият соҳиблари бўлмиш мусулмонларга ҳануз ишонмаяпти, ўзи билан ҳамкорлик қилишлари масаласида ҳам ишончини йўқотяпти.

Бундай ёмон муҳитда мусулмонларнинг Исломга амал қилишларига нисбатан ҳам, келажакларига нисбатан ҳам жуда катта хавф турибди. Шу жиҳатдан, биз қуйида тўрт муҳим пунктни кўриб чиқамиз:

1 – Энг биринчи масала: исломий қадриятларга қаттиқ риоя қилиш;

Британияда яшовчи мусулмонлар Исломни маҳкам ушлашлари ва унинг элчиларига айланишлари керак. Бунинг учун Исломни тушунмоқ, у билан шуғулланмоқ, ундан таълим олмоқ ва фарзандларини Ислом асосида тарбияламоқ керак бўлади. Яна муҳими, биз бутун жамиятни бу ишда ўзимиз билан ҳамкорга айлантирмоғимиз лозим. Бу – Умматимизни қўллаб-қувватлашимизни ҳам ўз ичига олади ҳамда исломий юртлардаги хароб воқе ечимини, яъни Пайғамбарлик минҳожи асосидаги Халифаликни қўллаб-қувватлашни ҳам ўз ичига олади. Тўғри, бу иш бугунги аянчли муҳитда жуда қийин кўриниши мумкин. Бироқ бу иш Аллоҳ Субҳанаҳу ва Таолонинг рисолатига риоя қилиш орқали Унинг ризосига етишишга чақириқдир.

Аллоҳ Субҳанаҳу ва Таоло бундай деди:

وَمَنْ أَحْسَنُ قَوْلاً مِّمَّن دَعَا إِلَى اللَّهِ وَعَمِلَ صَالِحاً وَقَالَ إِنَّنِي مِنَ الْمُسْلِمِينَ

«Аллоҳга даъват қилган ва ўзи ҳам яхши амал қилиб, «Шак-шубҳасиз мен мусулмонларданман», деган кишидан ҳам чиройлироқ сўзловчи ким бор?»  [Фуссилат 33]

Буларни адо этишга бизни элтувчи йўл Британиядаги либерал илмоний қадрият ва эътиқодларни қабул қилиш эмас, унга қоришиб кетиш ҳам эмас. Қачон бу ерда яшовчи мусулмонлар уларни қабул қилгудек ва уларга қоришиб кетгудек бўлсалар, демак, улар ҳам бошқа диний илмоний жамоалар йўлидан кетган бўладилар. Бу билан Исломнинг бир қисмидан, унинг сиёсий, ижтимоий ва иқтисодий қисмларидан воз кечган бўладилар ва алал оқибат, Ғарбдан фарқ қилмай қоладилар. Ғарб бошига тушган ёшлар муаммолари, оилалар ажрашишлари, жинсий ва ижтимоий тартибсизликлар каби машаққатлар уларнниг ҳам бошларига тушади. Бу мусулмонлар учун рухсат этилган танлов эмас, албатта. Чунки бу Исломдан суғурилиб чиқиш демакдир, Аллоҳ Субҳанаҳу ва Таоло белгилаб берган яшаш тариқатига зид позицияни қабул қилиш демакдир. Аллоҳ Субҳанаҳу ва Таоло бундай дейди:

وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكاً وَنَحْشُرُهُ يَوْمَ الْقِيَامَةِ أَعْمَى

«Ким Менинг эслатмамдан юз ўгирса, бас, албатта унинг учун танг-бахтсиз ҳаёт бўлади ва Биз уни қиёмат кунида кўр ҳолда тирилтирурмиз»     [Тоҳа 124]

Лекин Исломни маҳкам ушлаш атрофимиздаги инсонлардан ўзимизни олиб қочиш билан амалга ошмайди. Аксинча, Ислом рисолатини етказиш учун бутун жамиятдаги инсонларга таъсир ўтказишимиз лозим. Мусулмонлар қоришишни рад этиш билан бир вақтда, яккаланишни ҳам рад этмоқлари керак. Рад этмоққина эмас, балки биз, ўз диаспорамиз ичкарисида бўладими, ё унинг ташқарисидами, фарқсиз, барчага Ислом асосида таъсир ўтказишимиз лозим.

Аммо сиёсий ҳамкорлик ушбу қарашимизни ифодаламайди. Аксинча, аслида у мусулмонларни мунтазам ва айни қарашдан узоқ равишда либерал илмоний қадриятларни қабул қилиш сари тортиб кетади. Албатта Исломда бундай эмас.

2 – Бу сиёсий амалиёт мусулмонлар диаспорасини илмоний диаспорага айлантириб юборади;

Мусулмонларни илмоний Вестминстер сиёсатида ҳамкорлик қилишга тарғиб қилишдан мақсад уларни ўзларининг илмоний сиёсий тузумларини, бу тузумларидаги қадриятлар ва сиёсатларни қўллаб-қувватлашга, қабул қилишга мойил қилишдир.

Бунинг натижаси ўлароқ, илгари гувоҳи бўлганимиздек, мусулмонлар қанчалик шу илмоний амалиётга аралашганлари сари, шунчалик илмонийлашишиб, ғайриисломий позицияни маъқуллайверадилар. Сайловларда рақобатлашувчи партиялар сиёсатлари қон тўкишга, мусулмонлар ерларини босиб олишга, экстремизм ва терроризмга қарши кураш қонунларини татбиқ қилишга рухсат беришни ўз ичига олади. Шунингдек, судхўрлик қилишга, иқтисодий эксплуатация қилишга, қимор ўйнашга, маст қилувчи ичимликлар истеъмол қилишга ва сионист яҳудийларга ёрдам беришга рухсат беришни ҳам ўз ичига олади.

Ўтган бир неча йиллар мобайнида сайланган мусулмон депутатлар ҳам мана шундай ғайриисломий позицияни қўллаб-қувватлаш учун Исломга орқа ўгиришди. Зотан, бундай партияларга аъзо бўлиш, уларга тарғиб қилиш ва овоз бериш билан уларни қўллаб-қувватлаш Исломга зид сиёсатларни очиқдан-очиқ қўллаб-қувватлаш демакдир.

3 – Сиёсий амалиёт самарасиз илмонийликдир

Ғарбда одамларнинг сиёсатдан ўзларини четга олишлари ортиб бормоқда ва сайловчилар сони озаймоқда. Ҳатто таниқли машҳурлар Ғарбдаги сиёсатдан узоқлашишга рағбатлантирмоқда. Уларнинг ҳужжати ҳам оддий, яъни «овоз бериш фойдасиз ва у асло бирор нарсани ўзгартирмайди».

Сайловда овоз беришни фойдасиз деб билиш ортидаги сабаб шуки, капиталистик давлатда низом оддий одамларнинг эмас, балки кичик бир элитага хизмат қилишини тушунишмоқда. Чунки, қонун ва сиёсатни белгиловчилар йирик савдо ширкатларидир. Шунингдек, қонун ва сиёсатни белгилашда босим ўтказувчи жамоалар ва уларнинг сиёсатчиларга боғлиқлиги рол ўйнайди.

Бир марта жаноб Хилшам айтган эди: Бу – «сайланган диктаторлик»дир: элитанинг элита манфаати йўлида ва элита воситасидаги бошқарувидир. Демак, якка шахс берган овознинг маъноси йўқ.

Бироқ айрим мусулмонлар овоз беришимизнинг қадр-қиммати бор, деган фикрда қайсарлик билан туришибди. Улар агар мусулмонлар яхшироқ уюшиб қолгудек бўлса, мусулмонларга хайриҳоҳ депутатлар муваффақиятини таъминлайдилар. Бу ноумид одамнинг позициясидир. Чунки улар қайсарлик билан ўзлари ёпишиб олган фикрни Ғарбнинг ўзи ҳам рад қилади. Чунки бугун Ғарбнинг омадсиз режимлари томонидан ишлатиб бўлинган кўпчилик кишилар альтернатив излашмоқда. Бироқ айрим мусулмонлар бўлса орқага, омадсизликка юз тутган режимга боқишяпти, исломий манфаатларга ишонишмаяпти.

4 – Бизнинг сиёсат ва қадриятлар;

Баъзиларнинг ишонишича, илмоний режим билан ҳамкорлик қилиш мусулмонлар диаспорасига фойда келтирар, исломофобияга қарши курашга ёрдам берар эмиш. Улар айрим ўзаро манфаатларни қўлга киритиш илинжида тубдан Исломга зид бўлган либерал илмоний партиялар сиёсатини қўллаб-қувватлаш билан қизил чизиқни ҳам ошиб ўтишга тайёрлар.

Бу иш нафақат хато, балки мусулмонлар шаънига ҳам путур етказмоқда. Чунки бу уларни ўз ҳуқуқларини қўлга киритиш учун ялинишга мажбур қиляпти. Бундан ҳам муҳими, бундай партиялар билан ҳамкорлик қилиш ва уларга ёрдам бериш Исломда рухсат этилмаган. Чунки амалда бу партиялар Ислом ақидасига зид ташвиқотни тарқатишмоқда.

Аллоҳ Таоло бундай деди:

قُلْ إِنِّي نُهِيتُ أَنْ أَعْبُدَ الَّذِينَ تَدْعُونَ مِن دُونِ اللّهِ قُل لاَّ أَتَّبِعُ أَهْوَاءكُمْ قَدْ ضَلَلْتُ إِذاً وَمَا أَنَاْ مِنَ الْمُهْتَدِينَ

«Айтинг: Мен Аллоҳдан ўзга сизлар илтижо қилаётган бутларга бандалик қилишдан қайтарилганман. Яна айтинг: Сизларнинг ҳавойи-нафсларингизга эргашмайман. Зеро у ҳолда йўлдан озурман ва ҳидоят топгувчилардан бўлмай қолурман»   [Анъом 56]

Мусулмонлар илмоний сиёсий амалиётда иштирок этмасдан ҳам кўп тадбирлар олиб борганлар ва буни ўзига таяниш принципига асосан ўз исломий манфаатларини таъминлаш мақсадида адо қилганлар.

Бу тадбирларга мисоллар кўп. Масалан, мусулмонлар исломофобия, дея номланган ишга қарши курашиш учун альтернатив сифатида ахборот воситаларини яратдилар, Ғарбнинг мустамлакачилик сиёсатларининг фикрий сиёсий асосларини кучли далиллар билан янчиб ташладилар, маҳаллий сиёсатларнинг ижро этилишини ҳамда ҳукумат олиб бораётган мусулмонларни нишонга олган ифлос қонунларнинг ижро этилишини тўхтатиб қолдилар. Шунингдек, мусулмонлар бундай илмоний сиёсий амалиётга қўшилмасдан ҳам, масжидлар, мадрасалар очдилар, ҳалол таомларни ишлаб чиқардилар. Шунинг учун мусулмонлар арзонгаров баҳс-тортишувларда қатнашмасликлари керак, чунки бу уларни ноаниқ фойда йўлида ўз исломий ақидалари масаласида чекинишга мажбур қилади.

Диаспорамиз ахборот воситаларида Ислом ҳақида тарқатилаётган бунга ўхшаш салбий нарсалар қаршисида Исломга қаттиқ ишонч билан амал қилмоқлари, буни бирламчи вазифа сифатида адо этмоқлари лозим. Биз барча амалларимиз программасида Исломни биринчи ўринга қўймагунимизча ҳамда унинг қадриятларига мос келувчи сиёсий йўлдан юрмагунимизча бундай ёлғонларга ва хато тушунчаларга қарши курашишимиз мумкин эмас. Бузғунчи Вестминстер сиёсатчиларининг дўстлигига эришишга уринмаслигимиз керак, чунки уларнинг мусулмонлар билан яхши муомалада бўлишаётганига сабаб, фақат ҳокимиятга чиқиб олишда фойдаланиш, холос.

Биз мусулмонлар диаспорасини исломий қадриятларни маҳкам ушлашга, Исломга ва исломий диаспора бирлигига – маъруфга буюриб, мункардан қайтаришга – асосланган сиёсий фаолият билан шуғулланишга давъат қиламиз. Шунингдек, мусулмонлар диаспорасини илмоний режимдаги нуфузини оширишга берилаётган ёлғон ваъдаларга қарши курашишга ҳам даъват қиламиз, зотан, бу нуфуз динимизни йўқотиш ҳисобига бўлади. Бу диаспорага ҳурмат ва иззатни ёлғиз Исломгина беради. Қачон шу ҳурмат ва иззатни йўқотсак, ҳар қандай сиёсий фаолиятимиз қадрласа арзигулик бирор натижа бермайди.

وَلاَ تَرْكَنُواْ إِلَى الَّذِينَ ظَلَمُواْ فَتَمَسَّكُمُ النَّارُ وَمَا لَكُم مِّن دُونِ اللّهِ مِنْ أَوْلِيَاء ثُمَّ لاَ تُنصَرُونَ

«Зулм йўлини тутган кимсаларга берилиб кетманглар (эргашманглар). Акс ҳолда, сизларга дўзах ўти етар. Сизлар учун Аллоҳдан ўзга бирон дўст йўқдир. кейин (яъни золимларга эргашсангиз) сизларга ёрдам берилмас»  [Ҳуд 113]

Ҳизб ут-Таҳрир                                                       14 жумодус-соний 1436ҳ

Британия                                                                  3 апрел 2015м