Бугунги “тинчлик”нинг ортида кўр-кўрона тобелик, мутелик, мазлумлик ва шу халқнинг хорлиги яширинган
بسم الله الرحمن الرحيم
Бугунги “тинчлик”нинг ортида кўр-кўрона тобелик, мутелик, мазлумлик ва шу халқнинг хорлиги яширинган
Тинчлик нима? Бугунги тинчликдан қалбингиз ҳотиржамми? Қалбалар ҳотиржам бўла олмаган “тинчлик”, тинчлик деб номланишга лойиқми? Жамиятимизда тинчлик деган тушунчага ёпишиб олиш шунчалар оммалаштирилдики, “тинчлик учун” деган шиорни ўзларига байроқ қилиб олиб унинг ортига истаган разиллигини яшириб олган манфур кимсаларнинг омади чопди. Бу манфур кимсаларнинг оғизларидан тинчлик деган сўзнинг тушмай қолганига алданган халқ уларнинг асл мақсадлари нима эканлиги тўғрисида фикрламай қўйди. Хатто шу халқнинг қони тўкилганда ҳам, бир неча бор берилган ваъдалар бажарилмай, алданганлиги фош бўлса ҳам тинчлик деб айтилган мана шу шиорга яна ва яна умид билан кўз тикаверадиган бўлиб қолди. Бу ҳолат эса айтиб ўтганимиздек манфур кимсаларнинг иштахаларини янада очиб юборди. Аслида ана шу манфур кимсалар бу халқни алданишга, ёлғон эканлигини билиб турса ҳам умидланишга ўргатиб, барча нарсалардан кўз юмиб, вахший хайвоннинг исканжасидан қочаётган инсон сингари фақат тинчлик, тинчлик, тинчлик дейдиган бўлиб қолиши учун ҳаракат қилишди.
Тинчлик дегани нима? Устимизда диктатор режими қонимизни сўриб турса ҳам шу бошқарувга рози эканлигимизни билдириб, бошимизни эгиб туришимизми? Тинчлик дегани ўз эътиқодимиз бўйича амал қилишга чекловлар қўйилса ҳам сукут қилишимизми? Тинчлик дегани, бахордан то қишгача пахта даласида сарсон бўлиш, таълим ва тиббиётга эътибор қаратмай тиббиёт ходимлари ва ўқитувчи, ўқувчиларнинг текин мардикор сифатида ишлашларими? Ёки 1999 йил 16-феврал ва 2005 йил Андижон воқеаларини ҳукумат истаганидек талқин қилишимиз, ҳукумат истамаган томонга эътибор қаратмаслигимизми? Ёхуд МХХ, ИИВ каби куч органларидан оёқларимизни қалтироқ тутадиган даражада қўрқишимизми? Бир тўда зўравон золимлар мамлакат худудидаги исталган соҳани монополлаштириб олишию хоҳлаган вақтларида корхона ва заводларни, мамлакат аҳолиси учун муҳим бўлишига қарамай, сунъий банкротлик ҳолатига тушириб чет эл сармоядорларига сотишими? Қисқача айтганда бу ҳукумат назарда тутаётган тинчлик қандай бўлади? Бу борада фикрлаётган инсонларни қийнайдиган саволлар кўплаб топилади.
Бу саволларга жавоб топишга ҳаракат қилиш керак, бу саволлар устида фикрлаш керак.
Бу саволларнинг жавобини излаш жараёнида ҳукумат томонидан ўйлаб топилган ёлғонлар исканжасига тушиб қолмасликка ҳаракат қилиш керак. Ана шу ёлғонлар бутун бир жамиятни ўз эътиқодидан бошқа томонга буриб юборди. Яъни бу жамиятдаги кўп инсонлар мусулмон бўла туриб “Ислом шариатида барча муаммоларга ечим бор” деб айта олмайдилар, лекин “Тинчлик бўлса барча нарса бўлади, аввало тинчлик” деган жумлани баралла айтишни канда қилишмайди. Албатта бу гапларимиздан бизни тинчликни ёмон кўради деган хулоса келиб чиқмаслиги керак. Лекин ҳукуматнинг алдовларига учган инсонларнинг кўпчилиги Ислом шариатидан кўра тинчликни муҳим деб таърифу тавсиф қилишлари кўпчилигимизда нотўғри тушунчаларни вужудга келтирди ва келтирмоқда. Ҳукумат ва унинг хизматчилари жамият онгига сингдиришлари бўйича ўз ҳаққини талаб қилиш, адолат учун курашиш, ўз эътиқоди бўйича яшашга интилиш ҳам тинчликка рахна солишдир. Демак, улар хоҳлаётган тинчлик – ўз ҳақ ҳуқуқларидан воз кечган халқнинг сукути, адолат учун курашмаслик ва зулмларга кўникиш ёки шу зулмларни худдики кўрмаётгандек кўз юмиш ёхуд эътиқоди талаб қилган амалларни бажаришдан узоқлашиш. Шу ўринда яна савол туғилади. Бу халққа тинчлик керак экан, лекин ўз ҳақ ҳуқуқи, адолат керак эмасми? Инсонларнинг ҳақ ҳуқуқлари таъминланмаса, адолат бўлмаса бундай ҳолатда қандай тинчлик бўлади?
Тинчлик шиорини ниқоб қилиб олган бу ҳукумат, мана шу шиор остида халқни алдаб, ҳақ йўлга даъват қилувчиларни “тинчликка рахна солмоқда” дея жамиятга ёмон кўрсатишни ўзига касб қилди. Аслида эса, адолат бўлмаган, зулмга ботган бошқарув остидаги жамият қандай қилиб тинч бўлиши мумкинлиги шу ёлғонларга ишонаётганларнинг ҳаёлларига ҳам келгани йўқ. Ҳа, бугунги ҳолат тинчдек кўриниши мумкин, лекин бу ёлғон тинчликнинг ортида кўр-кўрона тобелик, мутелик, мазлумлик ва шу халқнинг хорлиги яширинган. Наҳотки шундай зулмларга тўлган ёлғон тинчлик бизга керак бўлса?! Ахир бу асли тинчлик эмаску, бугунги ҳолат золимларнинг манфаати учун керак бўлган ва улар “тинчлик” деб номлаб олганидан бошқа нарса эмас.
Ҳукумат ўзининг зулмли бошқарувини янада мустахкамлаш учун жамиятни Ислом динига даъват қилиб инсонларни уйғотмоқчи бўлганларга қарши жинояткорона ҳаракатини кундан кунга кучайтириб, мусулмонларга нисбатан адоватини очиқ ойдин кўрсатиб, ўз душманлигини шиддатли тарзда, гоҳ яширин, гоҳ ошкора давом эттириб келмоқда. Исломга душманлигини яшириш учун ўзини тинчликни сақлашга ҳаракат қилаётгандек кўрсатиши ҳукуматнинг ёлғонларидан биридир. Ислом хеч қачон тинчликни бузувчи омил сифатида намоён бўлган эмас. Исломни кўтариб чиқувчилар адолат тикланиши учун зулмни йўқотиш мақсадида золимларга қарши курашади. Жамиятимиздаги кураш эса, Исломга даъват қилувчилар билан золим ҳукумат ўртасидаги курашдир. Даъватчиларнинг мақсади тинчликка рахна солиш эмас, аксинча даъватчиларнинг мақсади пок Исломий ҳаётни жамиятимизда ҳукмрон қилишдан иборатдир. Уларнинг фаолияти айнан мана шу мақсадга қаратилган. Даъватчилар Исломий ҳаёт тикланишини ва барча инсонларнинг ҳақ ҳуқуқлари поймол қилинишдан тўхтатилишини, золимларнинг мазлумларга қилаётган зулмларига чек қўйилишини ва бизнинг бошқарувимиз адолатли бошқарув бўлишини ният қилишган. Шуни билишмиз керакки адолат фақат Ислом тузуми татбиқи билангина тикланади. Асл фаровонлик, қалблар ҳотиржам бўладиган тинчлик Ислом бошқаруви остида шаклланади. Устимизда Ислом татбиқ қилинишлиги билан на фақат бу дунёда, балки Охират диёрида ҳам юксак мартабага эришиш имконияти кенгаяди. Исломий ҳаётдан Аллоҳ Таъоло рози бўлади.
Демак, бизга Исломий ҳаёт керак, бунинг учун Исломий йўл билан ҳаракат қилишимиз вожибдир.
Ҳизб ут-Таҳрирнинг Ўзбекистондаги медиа офиси. Абдуллоҳ
08.10.2016й
