Халқимизни мардикорга айлантириш билан ҳукумат нимага эришмоқчи?

بِسْمِ اللهِ الرَّحْمٰنِ الرَّحِيم

Ижтимоий тармоқларда тарқалган видеоларда бир нечта ўзбекистонликлар ўзларининг Мексика орқали АҚШга ўтиш уринишлари ҳалокат билан якун топганини сўзлайдилар.

«Акам билан участкамизни сотдик, машинамизни сотдик. Бир ой чангалзорлар, ботқоқликлардан, сувдан кемада ўтдик. Шундай қийинчиликларни кўрдик. У ерда нафақат ўзбекистонликлар, қирғизистонликлар, тожикистонликлар ҳам бор. Ёш боласи билан, оилаликлар ҳам боряпти. Болаликлар қийналиб, кемалар тешилиб, ҳайвонлар ҳужум қилиб… Америка чегарасига етдик деганда, ўрмондан чиқаётганда, акамни заҳарли илон чақди. Илоннинг заҳри акамнинг қонига тарқалиб кетди, шу билан акамни бой бердик», – дея ҳикоя қилади бир йигит. Яна бир аёл эса унинг учун Америка орзуси ўз оиласини йўқотиш билан якун топганини сўзлайди.

«Турмушимиз яхши эди, магазинимиз бор эди, (Самарқанддаги) Сиёб бозорида савдо қилардик. Дўконимизни сотдик, машинани сотдик. Ҳамма нарсамизни сотиб, қизимни олиб йўлга тушдик. Мексикага турист бўлиб бордик. Кейин у ерда йўл-йўриқни кўрсатадиган одамлар билан учрашиб, «қайиқда ўтамиз, ўрмон оралаб ўтамиз» дейишди. Шунда қайиққа миндик… Йигирматача одам бор эди қайиқда. Сузар-сузмас, қайиғимиз ағдарилиб кетди. Мени қутқариб олишди. Қизим билан ҳўжайинимни топишолмади… Нима қилишимни билмай, қайтдим», – дея йиғлайди у. (BBC Uzbek)

Аввало, ўтганларни Аллоҳ раҳматига олсин, гуноҳларини мағфират қилсин. Уларнинг яқинларига Аллоҳ сабр берсин. Ва минг афсуслар бўлсинки, тарихда бошқа юртларга Аллоҳнинг розилигини олиш йўлида бир байроқ остида Ислом даъватини ёйиш учун борган мусулмонлар бугун мана шундай хор аҳволга тушиб қолдилар. Бугун улар яхши яшаш илинжида ўз юртларини тарк этиб, ҳатто океан ошиб бўлса ҳам Америка орзусига етиш учун ўлимни ҳам бўйнига олмоқдалар. Мусулмонлар бу дунё ҳаётида қандай яшаш кераклигини унутиб, Ғарбнинг кўринишидан ялтироқ, аммо ичи тўла бадбўй ва бузуқ яшаш тарзига маҳлиё бўлиб қолди. Ёшларни инглиз тили баҳонасида Ғарб дунёқараши ва маданиятини ўрганишга ташвиқ қилиш мана шундай натижаларга олиб келди.

Юртимиздаги мусулмонларнинг ҳолати ҳам Ислом Уммати ҳолатидан катта фарқ қилмайди. Агар Ўзбекистондаги сиёсий воқелик ўрганилса, ҳукумат халқда ҳозирги хорликдан юксакликка олиб чиқадиган Исломий фикрлар ва туйғулар шаклланмаслиги учун турли хил чора-тадбирларни қўллаётгани ойдинлашади. Айнан юқоридаги ҳолат борасида гапирадиган бўлсак, масалан, сўнгги йилларда ўзбек кино ва сериалларида “янги бой” образи бўрттириб кўрсатилиб, унинг чет элда ишлашига урғу бериляпти. Расмий рўйхатдан ўтган сайтлар эса, мигрантларнинг ўртача ойлик даромади ҳақида ва умуман  ҳорижда ишлаш тўғрисидаги сон-саноқсиз материалларни бериб бориш билан аҳолини меҳнат муҳожири бўлишга тарғиб қилмоқда. Ташқи меҳнат миграцияси агентлиги директори ўринбосари Давлатназар Матрасуловга журналистнинг “тайёр кадрларнинг мамлакатни тарк этиши Ўзбекистонга қандай фойда келтиради?” деган саволига у “ушбу амалиёт кўплаб мамлакатларда оммалашган”, деб жавоб берди. У ўз фуқароларини меҳнат муҳожирлари сифатида юборишда етакчи ҳисобланган Филиппинни мисол қилиб келтирди. Бандлик ва меҳнат муносабатлари вазирлигининг шўъба мудири Одилжон Комилжонов эса, “Бу нарсани шундай тушуниш керак, миграция – бу экспорт. Ишчи кучи экспорти” деди. Давлатнинг мана шундай “саъй-ҳаракатлари” билан Ўзбекистонда “Суриш керак” деган фикр трендга чиқди.
Мустамлакачи давлатлар ўзларининг таъсир доираси остидаги мамлакатларнинг аҳолисини қора ишчига айлантиришни орзу қилишади. Бизнинг мулозимлар эса, халқимизни арзон ишчи кучига айланиши хорлик ва шармандалик эканлигини англаш тугул, дунёда ҳеч қандай таъсир кучига эга бўлмаган Филиппинни ўзига ўрнак қилишдан ҳеч уялишмаяпти. Бундай шармандали позицияни Шавкат Мирзиёев Жанубий Кореяга ташрифи чоғида янада очиқроқ баён қилиб: “Кореядан истиқболли технологиялар ва билимлар, Ўзбекистондан табиий ресурслар ва инсон капитали бирлашса…” деди.

Имом-домлаларнинг ризқ масаласини ёрқин ечиб бермагани ҳам одамларни ризқ Аллоҳдан эканлигини унутишига олиб келган омиллардан бўлди. Натижада ризқ дегани катта муаммога айланди, моддий манфаат буюк ғоя бўлиб қолди. Бу билан гўё банда Аллоҳнинг ишини ўз зиммасига олиб, ўзининг вазифаларини Аллоҳга топширди. Шу сабабдан дунёнинг ҳар бурчагидан Ўзбекистонлик аёллар, эркаклар тўғрисида қайғули хабарлар эшитадиган бўлдик. Шунингдек, халқни мардикорга айлантиришдан республиканинг иқтисодий салоҳиятини ошириш мақсад қилингани айтилаётган бўлса-да, аслида ҳукумат халқни иш билан таъминлаш муаммосидан қутилишни, аҳолининг тирикчилик ғамида юрт кезиб мамлакатдаги сиёсий ишлардан йироқлатишни, хонадон бошлиғи бўлган эрларни оиладан узоқлатиш билан аёлларнинг бузилишига имкон яратишни ва энг асосийси, Исломий уйғонишни олдини олишни мақсад қилган. Чунки қашшоқлаштириш сиёсати натижасида бир бурда нон топиш илинжида эрта тонгдан кечгача ишлайдиган халқда ўзининг хор ҳолати ҳақида фикрлашга вақти бўлмай қолади, вақти бўлган тақдирда ҳам фикрий танбал бўлганлиги сабабли фикрлашга эринади.

Юқоридаги фикрлардан келиб чиқиб айтишимиз мумкинки,  Ўзбекистон ҳукумати мустамлакачи ғарб давлатлари ундови билан  халқимизнинг онггига “ҳаёт бу яхши яшашдан иборат” деган тушунчани жойлашга уринмоқда ва Исломий ақида ва унинг ҳукмларига қарши ҳар жабҳада курашмоқда. Инсонларнинг фақат моддий жиҳатдан фаровон бўлган ўлкаларга етишиш учун жонини хатарга қўяётгани мафкуравий инқироздир. Ўзбекистонда Исломий даъватга таъқиқ қўйилгани учун одамларимиз Ғарбнинг бузуқ дунёқарашини қабул қилмоқда. Агар Давлат Исломий фикрларга қарши курашмаганида демократик бузуқ фикрлар одамларнинг онгига ва ҳаётига бу даражада мустаҳкам ўрнаша олмас эди. Мусулмонларда Исломий фикрий иммунитет бўлмагани учун Ғарб дунёқараши олдида осонгина мағлуб бўлишди. Агар мусулмонлар Исломини ўрганиб унга амал қилишса, қайтадан дунё халқларининг етакчисига айланадилар, фикрий бойлик ортидан моддий бойликларни ҳам қўлга киритадилар.

Аллоҳ Таоло айтади:

وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى

“Ким Менинг эслатмамдан юз ўгирса, бас, албатта унинг учун танг-бахтсиз ҳаёт бўлур ва Биз уни қиёмат кунида кўр ҳолда тирилтирурмиз”.     (Тоҳа:124)

Ҳизб ут–Таҳрирнинг Ўзбекистондаги матбуот бўлими аъзоси Абдураҳмон

08.01.2022й